މޫސުމަށް އަންނަ ބަދަލުތަކުގެ ސަބަބުން، ދުނިޔޭގެ ދެބައިކުޅައި އެއްބައި ގޮނޑުދޮށްތައް މި ގަރުނުގެ ތެރޭގައި ނެތިގެން ހިނގާދާނެ ކަމުގެ ބިރުއެބައޮތް ކަމަށް ދިރާސާއަކުން ދައްކައިފިއެވެ.

މި ދިރާސާއަކީ ޔޫރަޕިއަން ކޮމިޝަންގެ ސައިންޓިސްޓުންނާއި ސްޕޭން، ޕޯޗްގަލްގެ އިތުރުން ނެދަރލޭންޑުގެ ޔުނިވާސީޓީތައް އެކުވެގެން ހަދާފައިވާ ދިރާސާއެކެވެ. މިހާރު ގިރަމުންދާ ބާރުމިނުގައި ގޮނޑުދޮއްތައް ގިރަމުންދާނަމަ 2050 ވަަނަ އަހަރާ ހަމަޔަށް، ގޮނޑުދޮށުގެ 15 އިންސައްތަ ގިރައިގެން ހިނގައިދާނެ ކަމަށް ދިރާސާގައި ވަނީ ބުނެފައެވެ.

މި ދިރާސާއިން ދައްކާ ގޮތުންނަމަ، ގޮނޑުދޮއްތައް ގިރުމާއި ގުޅިގެން ކަނޑާއި އެއްގަމުގެ ދިރުންތަކަށް އޭގެ ނޭދެވޭ އަސަރު ކުރާނެއެވެ. އަދި އައްސޭރިފަށުގެ ސަރަހައްދުތަކުގައި ދިރިއުޅޭ އާބާދީތަކަށް ލިބިފައިވާ ގުދުރަތީ ރައްކާތެރިކަމުގެ ފަށަލަ ނެތިގެންގޮސް، ކަނޑުގެ ލޮނުގަނޑު އުފުލުމާއި، ބޯ ވިއްސާރައިގެ ސަބަބުން ލިބޭ ގެއްލުންތައް އިތުރުވާނެއެވެ.

އެ ދިރާސާގައި އަންދާޒާ ކޮށްފައިވާ ގޮތުން ގަރުނުގެ މެދުތެރެއާ ހަމަޔަށްދާއިރު ހާލަތު މިއަށްވުރެ ގޯސްވެ ދުނިޔޭގެ 25.7 ޕަސެންޓް ގޮނޑުދޮއްތައް އެއްކޮށް ހިނގައިދާނެއެވެ. ދުނިޔޭގެ އެކި ގައުމުތަކުގެ ސަރުކާރުތަކުން މި ގެއްލުންތަކާއި ދެކޮޅަށް ކުރަން ޖެހޭ މަސައްކަތް ގިނަވެ، އަރައިގަތުމަށް ކުރަންޖެހޭ ހޭދަތައް ބޮޑުވާނެ ކަމަށް ދިރާސާގައި ވަނީ އަންދާޒާ ކޮށްފައެވެ.

މި ދިރާސާ ހެދުމުގައި އެންމެ އިސްކޮށް ހަރަކާތްތެރިވި މިކާލިސް ވޮސްޑޫކަސް ވިދާޅުވީ، 100 މީޓަރުގެ ތްރެޝްހޯލްޑެއް މިންގަނޑެއްގެ ގޮތުގައި ގެންގުޅެފައިވަނީ ދުނިޔޭގެ ގިނަ ގައުމުތަކުގެ އައްސޭރިފަށަކީ 100 މީޓަރަށް ވުރެ ކުޑަ އައްސޭރިތަކަށް ވުމުންނެވެ. ވޮސްޑޫކަސް އަކީ ކޯސްޓަލް އޯޝަނޮގްރާފަރައެއްގެ އިތުރުން ޔޫރަޕިއަން ކޮމިޝަންގެ ސައިންޓިފިކް އޮފިސަރެކެވެ.

އެކި ސަރަހައްދުތަކުގެ އައްސޭރި ގެއްލޭ މިންވަރުގައި ތަފާތުތަކެއް ހުރެދާނެކަމަށް ދިރާސާގައި ބަޔާންކޮށްފައިވާއިރު، އެމެރިކާގެ އިރުމަތީ އައްސޭރިއާއި، ދެކުނު އޭޝިއާ އަދި މެދުތެރޭ ޔޫރަޕުގެ އައްސޭރީގެ 100 މީޓަރު ގިރައިގެން ގޮސް، 2100 ވަނަ އަހަރާ ހަމައަށް އެއްކޮށް ނެތިގެން ގޮސްދާނެ ކަމަށް ދިރާސާގައި ވެއެވެ.