އިނގިރޭސި ލީގު ކަޕްގެ ޗެމްޕިއަންކަން ތިންވަނަ ފަހަރަށް ސިޓީ ހޯދައިފި

އިނގިރޭސި ލީގު ކަޕްގެ ޗެމްޕިއަންކަން ޖެހިޖެހިގެން ތިންވަނަ ފަހަރަށް މެންޗެސްޓާ ސިޓީ ހޯދައިފި އެވެ.

މި ސީޒަނުގެ ލީގު ކަޕްގެ ޗެމްޕިއަންކަން ސިޓީ ހޯދީ އާދީއްތަ ދުވަހުގެރޭ ކުޅުނު ފައިނަލް މެޗުގައި އެސްޓަން ވިލާ އަތުން 2-1 އިން މޮޅުވެގެންނެވެ.

މި މުބާރާތް ޖެހިޖެހިގެން ތިންވަނަ ފަހަރަށް ސިޓީން ހޯދިއިރު، އެޓީމުން ވަނީ މިހާތަނަށް މި މުބާރާތް ހަތް ފަހަރު ކާމިޔާބުކޮށްފައެވެ.

އާދީއްތަ ދުވަހުގެރޭ ވެމްބްލީ ސްޓޭޑިއަމްގައި ކުޅުނު ފައިނަލް މެޗުގައި ފުރަތަމަ ލަނޑު ޖަހާ ލީޑު ނެގީ ސިޓީންނެވެ. މެޗުގެ 20 ވަނަ މިނެޓުގައި ފިލް ފޮޑެން ދިން ޕާހަކުން މި ލަނޑު އެޓީމަށް ކާމިޔާބުކޮށްދިނީ ސާޖިއޯ އަގުއޭރޯ އެވެ. އަދި އޭގެ 10 މިނެޓު ފަހުން އިލްކާއީ ގުންޑޮގާން ނަގައިދިން ކޯނަރަކުން ރޮޑްރީ ވަނީ ސިޓީއަށް ލީޑު ފުޅާކޮށްދީފައެވެ.

މި މެޗުގައި އެސްޓަން ވިލާއިން ފަރަގު ކުޑަކޮށްފައިވަނީ ފުރަތަމަ ހާފު ނިމެން ހަތަރު މިނެޓަށް ވެފައިވަނިކޮށެވެ. މި ލަނޑު އެޓީމަށް ޖަހައިދިނީ އެމްބަވާނާ ސަމާޓާ އެވެ.

އިނގިރޭސި ލީގު ކަޕްގެ ތައްޓާއެކު ސިޓީގެ ކޯޗު ޕެޕް ގާޑިއޯލާ ވަނީ އޭނާގެ ކެރިއަރުގައި 21 ތަށި ކާމިޔާބުކޮށްފައެވެ.