އެމްއެސްޔޫގެ ކޯސްތައް ސައިރިކްސް ކޮލެޖުގައި ހިންގުމަށް އެމްއޯޔޫއެއްގައި ސޮއިކޮށްފި
މި އެއްބަސްވުމުގެ ދަށުން އެޑިއުކޭޝަން، ސައިކޮލޮޖީ، ހޮސްޕިޓަލިޓީ އަދި ބިޒްނަސް، އައިޓީ ދާއިރާގެ ޕްރޮގްރާމްތައް ހިންގޭނެ
ސޮއި ކުރުމުގެ ރަސްމިއްޔާތު
މެލޭޝިޔާގެ މެނޭޖްމެންޓް އެންޑް ސައިންސް ޔުނިވަރސިޓީ (އެމް އެސް ޔޫ) އާއި ސައިރިކްސް ކޮލެޖާ ދެމެދު އެމް އޯ ޔޫއެއްގައި ސޮއިކޮށްފިއެވެ.
އާދީއްތަ ދުވަހު 11 ޖެހިއިރު ސައިރިކްސް ކޮލެޖް ގައި ބޭއްވި ސޮއި ކުރުމުގެ ރަސްމިއްޔާތުގައި އެމް އެސް ޔޫ ގެ ފަރާތުން ސޮއި ކުރެއްވީ އެ ޔުނިވަރސިޓީގެ ވައިސް ޗާންސެލަރ އެވެ. ސައިރިކްސް ކޮލެޖުގެ ފަރާތުން ސޮއި ކުރެއްވީ އެ ކޮލެޖުގެ ރެކްޓަރ އަލީ ފަވާޒް ރަޝީދުއެވެ.
މި އެއްބަސްވުމުގެ ދަށުން އެމްއެސްޔޫ ގެ ކޯސްތައް ސައިރިކްސް ކޮލެޖްގައި ހިންގަން ފެށޭނެ ކަމަށް އެ ކޮލެޖުން މަޢުލޫމާތު ދެއެވެ. ފަވާޒް ވިދާޅުވީ ރާއްޖޭގައި ތިބެގެން އެމްއެސްޔޫގެ ޑިގްރީ އަދި މާސްޓަރސް ޕްރޮގުރާމުތަކުގައި ބައިވެރިވެވޭނެކަމަށެވެ. އެގޮތުން މި އެއްބަސްވުމުގެ ދަށުން އެޑިއުކޭޝަން، ސައިކޮލޮޖީ، ހޮސްޕިޓާލިޓީ، ބިޒްނަސް، އަދި އައިޓީ ދާއިރާގެ ޕްރޮގުރާމުތައް ހިންގޭނެ ކަމަށެވެ. އެގޮތުން އެންމެ ފުރަތަމަ ފެށުމަށް ގަސްތު ކުރަވަނީ އެޑިއުކޭޝަންގެ ދާއިރާގެ ކޯސްތައް ކަމަށާއި، ޖޫން ހިސާބުގައި ފެށިގެންދާނެ ކަމަށް ލަފާ ކުރެވޭ ކަމަށް ފަވާޒް ވިދާޅުވިއެވެ.
މީގެ އިތުރުން އެމްއޯޔޫގެ ދަށުން ސްޓާފް އަދި ސްޓޫޑެންޓް އެކްސްޗޭންޖް ޕްރޮގުރާމުތައް ހިންގޭނެ ކަމަށާއި ސައިރިކްސް ކޮލެޖްގެ ލެކްޗަރަރސް ތަމްރީނުކުރުމުގައިވެސް އެމްއެސްޔޫގެ އެހީތެރިކަން ލިބިގެން ދާނެކަމަށެވެ.
