ޔުވެންޓަސް ބަލިކޮށް ލިޔޯނުން ކުއާޓާގެ އުންމީދު އާކޮށްފި

ޔޫއެފާ ޗެމްޕިއަންސް ލީގުގެ ގަދަ 16 ގައި އަމިއްލަ ދަނޑުގައި ޔުވެންޓަސް ބަލިކޮށް ލިޔޯނުން ކުއާޓާ ފައިނަލުގެ އުންމީދު އާކޮށްފި އެވެ.

ލިޔޯން ދަނޑުގައި ކުޅުނު މި މެޗު އެޓީމުން ކާމިޔާބުކުރީ 1-0 ގެ ނަތީޖާއަކުންނެވެ.

މި މެޗު ފަށައިގެން ޔުވެންޓަސްއިން މޮޅަށްކުޅެ ގިނަ ހަމަލާތަކެއް ލިޔޯންގެ ގޯލަށް ވަނީ ފޮނުވައިލައިފައެވެ. ނަމަވެސް ލިޔޯންގެ ވަރުގަދަ ޑިފެންސް ފޫއަޅުވައިލާ ޔުވެންޓަސް ކުޅުންތެރިންނަށް ނުރައްކާތެރި ހަމަލާއެއް ގޯލާ އަމާޒުކޮށް ފޮނުވައިލެވޭ ގޮތް ވަނީ ނުވެފައެވެ. މެޗުގެ 31 ވަނަ މިނެޓުގައި ލިޔޯން އިން ވަނީ ލަނޑު ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ ލޫކަސް ޓޫސާޓް އެވެ. އޯއާ ނަގައިދިން ހުރަހަކުން ޓޫސާޓް ފޮނުވައިލި ބޯޅަ އަމާޒުވީ ގޯލުގެ މަތީ ކަނަށެވެ.

މި ލަނޑަށްފަހު ވެސް ލިޔޯން އަށް ވަނީ ލަނޑު ޖެހުމަށް ފުރުސަތުތަކެއް ލިބި ބޭކާރުވެފައެވެ. އެގޮތުން ލިޔޯންގެ މޫސާ ޑެމްބެލޭ ހުސްކޮށްހުރެ ފޮނުވައިލި ބޯޅަ ދިޔައީ އަރިމަތީ ދަނޑި ކައިރިން ބޭރަށެވެ.

މި މެޗުގައި ޔުވެންޓަސްގެ ތަރި ކްރިސްޓިއާނޯ ރޮނާލްޑޯ ވަނީ ލިޔޯންގެ ގޯލަށް ގިނަ ހަމަލާތަކެއް ފޮނުވައިލައިފައެވެ. ނަމަވެސް އޭނާ ފޮނުވައިލި ހަމަލާތައް ގޯލާ އަމާޒުނުވެ ދިޔައީ ބޭރަށެވެ. މީގެ އިތުރުން ޔުވެންޓަސްގެ ފޯވާޑް ގޮންޒާލޯ ހިގައިން އާއި ޕައޮލޯ ޑިބާލާ ކުރި މަސައްކަތްވެސް ވަނީ ބޭކާރު ވެފައެވެ.

މެޗަށްފަހު ވާހަކަދައްކަމުން ޔުވެންޓަސްގެ ކޯޗު މައުރީޒިއޯ ސާރީ ބުނީ ޗެމްޕިއަންސް ލީގު މެޗެއްގައި އެއް ހާފު ރަނގަޅަށް ކުޅެގެން ކާމިޔާބު ނުލިބޭނެ ކަމަށާއި އެކަން ކުރެވޭނީ ދެ ހާފުގައި ވެސް ރަނގަޅަށް ކުޅެގެން ކަމަށެވެ.

ލިޔޯންގެ ކޯޗު ގާސިއާ ބުނީ މެޗުގައި ހުރިހާ ކަމެއް ވެސް ދިޔައީ އޭނާގެ ޕްލޭންއާއި އެއްގޮތަށް ކަމަށާއި މެޗުގައި އޭނާގެ ކުޅުންތެރިން ދެއްކި ކުޅުމާއި މެދު ހިތްހަމަ ޖެހޭ ކަމަށެވެ.

މި ދެ ޓީމު ބައްދަލުކުރާ ދެވަނަ ލެގުގެ މެޗު އޮންނާނީ މާރޗް މަހުގެ 18 ވަނަ ދުވަހު ޔުވެންޓަސްގެ ދަނޑުގައެވެ.