އިޓަލީގެ އުތުރު ހިސާބުތަކުގައި ފެތުރެމުންދާ ކޮރޯނާވައިރަސް (ކޮވިޑް-19) ގެ ސަބަބުން، ޔުރޮޕާ ލީގުގައި އިޓަލީގެ އިންޓަރ މިލާނާއި ބަލްގޭރިއާގެ ލުޑޮގޮރެޓްސް ބައްދަލުކުރާ މެޗު ސަޕޯޓަރުން ނުވައްދާ ކުޅޭ ގޮތަށް ހަމަޖައްސައިފި އެވެ.

އިންޓަ އާއި ލުޑޮގޮރެޓްސް ބައްދަލުކުރާ ދެވަނަ ލެގުގެ މެޗު ކުޅޭނީ އަންނަ ބުރާސްފަތި ދުވަހުގެރޭ މިލާނުގައެވެ.

މިހާތަނަށް އިޓަލީގެ އުތުރު ސަރަހައްދުގައި ކޮރޯނާވައިރަސް 76 މީހަކަށް ޖެހިފައިވާއިރު މިބަލީގައި ހަތް މީހަކު ވަނީ މަރުވެފައެވެ. އިޓަލީގެ މީޑިއާ ރިޕޯޓުތައް ބުނާގޮތުން ކޮރޯނާވައިރަސް ޖެހުނު މީހުންގެ އަދަދު އިތުރުވީ ކުއްލިއަކަށެވެ. އަދި މި ވައިރަސްގެ ސަބަބުން މިލާން ހިމެނޭ ލޮމްބާޑީ ސަރަހައްދުގެ ގިނަ އަވަށްތައް މިހާރު ވަނީ ބަންދުކޮށްފައެވެ.

އިންޓަރ އާއި ލުޑޮގޮރެޓްސް ބައްދަލުކުރާ މެޗު ސަޕޯޓަރުން ނުވައްދާ ކުޅޭ ގޮތަށް ނިންމިއިރު، މި މެޗު ބަލަން ބަލްގޭރިއާ އިން 600 ސަޕޯޓަރުން މިލާނަށް ދަތުރުކުރާ ގޮތަށް ކުރިން އޮތީ ރާވާފައެވެ. މި ދެޓީމު ބައްދަލުކުރި ފުރަތަމަ ލެގުގެ މެޗު 2-0 އިން ކާމިޔާބުކޮށްފައިވަނީ އިންޓަ އިންނެވެ.

ޔޫރޮޕާ ލީގުގައި އިންޓަރ އާއި ލުޑޮގޮރެޓްސް ބައްދަލުކުރާ ދެވަނަ ލެގުގެ މެޗު ސަޕޯޓަރުން ނުވައްދައި ކުޅޭ ގޮތަށް ހަމަޖެއްސިއިރު، ކޮރޯނާވައިރަސް އިތުރަށް ފެތުރެދާނެކަމުގެ ބިރަށްޓަކައި އިޓާލިއަން ލީގުގެ ބައެއް މެޗުތައްވެސް ވަނީ ފަސްކޮށްފައެވެ.

އިޓާލިއަން ލީގުގައި ފަސްކުރި މެޗުތަކަކީ އިންޓަ މިލާން އާއި ސަމްޕްޑޯރިއާ ކުޅެން ރާވައިފައިވާ މެޗާއި، ވެރޯނާ އާއި ކަގްލިއާރީގެ މެޗުގެ އިތުރުން އެޓަލާންޓާ އާއި ސަސުއޮލޯގެ މެޗެވެ.