ގައުމީ ބާސްކެޓްބޯޅަ ލީގު: ފިރިހެން ބައިގެ ޗެމްޕިއަންކަން ކިންގްސްއަށް

14 ވަނަ ގައުމީ ބާސްކެޓްބޯޅަ ލީގުގެ ފިރިހެން ޑިވިޝަނުގެ ޗެމްޕިއަންކަން ކިންގްސް ބާސްކެޓްބޯލް ކްލަބު ހޯދައިފި އެވެ.

މިފަހަރުގެ ފިރިހެން ޑިވިޝަނުގައި ފަސް ޓީމެއް ވަނީ ވާދަކޮށްފައެވެ. އެއީ ކިންގްސް އާއި ޓީރެކްސް ބާސްކެޓްބޯލް ކްލަބާއި ރެޕްޓާސް ބާސްކެޓްބޯލް ކްލަބާއި ސްޓިންގާސް ބާސްކެޓްބޯލް ކްލަބު އަދި ރެޑްވިންގްސް ބާސްކެޓްބޯލް ކްލަބެވެ.

ފިރިހެން ބައިގެ ޗެމްޕިއަންކަން ކިންގްސް ހޯދިއިރު، ލީގުގައި ބުރާސްފަތި ދުވަހުގެރޭ ކުޅުނު ފަހު މެޗުން ކިންގްސް ވަނީ އެންމެ ފަހުގެ ޗެމްޕިއަން ޓީރެކްސް ބާސްކެޓްބޯލް ކްލަބު އަތުން 77-71 ޕޮއިންޓުން ބަލިވެފައެވެ. ބުރާސްފަތި ދުވަހުގެރޭގެ ނަތީޖާއާއެކު ޕޮއިންޓުގެ ގޮތުން ކިންގްސް އާއި ޓީރެކްސް އެއްވަރުވި ނަމަވެސް، ކިންގްސްއަށް އެއްވަނަ ލިބުނީ ސްކޯގެ ތަފާތުންނެވެ.

ޒުވާނުންގެ މަރުކަޒު އެތެރޭ ކޯޓުގައި ކުޅުނު މެޗުގައި ދެ ޓީމުގެ ފަރާތުންވެސް ފެނިގެންދިޔައީ ވާދަވެރި ކުޅުމެކެވެ. ފުރަތަމަ ތިން ކުއާޓަރުގައި ޓީރެކްސްއިން ލީޑު ދެމެހެއްޓިއިރު، އެޓީމުން ތިންވަނަ ކުއާޓަރު ނިންމާލީ 69-53 ޕޮއިންޓުގެ ފަރަގަކާއެކު އެވެ. އެކަމަކު ފަހު ކުއާޓަރުގައި ކިންގްސްއިން ވަނީ ފަރަގު ކުޑަކޮށްފައެވެ.

މިފަހަރުގެ ގައުމީ ބާސްކެޓްބޯޅަ ލީގުގެ ފިރިހެން ޑިވިޝަނުގެ ޗެމްޕިއަންކަން ކިންގްސް ހޯދިއިރު، ލީގުގެ އަންހެން ޑިވިޝަނުގެ ޗެމްޕިއަންކަން ހޯދީ ކުއީންސް ބާސްކެޓްބޯލް ކްލަބެވެ.

14 ވަނަ ގައުމީ ބާސްކެޓްބޯޅަ ލީގުގެ ކުޅުން ނިމުމާއެކު ހުކުރު ދުވަހު 38 ވަނަ ގައުމީ ބާސްކެޓްބޯޅަ މުބާރާތުގެ ކުޅުން ފެށުމަށް ވަނީ ހަމަޖެހިފައެވެ.