ލޯކަލް ކައުންސިލްތަކުގެ އިންތިހާބު: އެމްޑީޕީން މުޅި ރާއްޖޭގައި ޕޯސްޓަރު ހަރުކުރުމުގެ ހަރަކާތް ފަށައިފި

އަންނަ އޭޕްރީލް މަހު ބާއްވާ ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ އިންތިޚާބުގައި އެމްޑީޕީން ވާދަކުރާ ކެންޑިޑޭޓުންގެ ކެމްޕެއިން ޙަރަކާތްތަކުގެ ތެރެއިން، މުޅި ރާއްޖޭގައި ޕޯސްޓަރު ހަރުކުރުމުގެ ހަރަކާތް ފަށައިފިއެވެ.

އެމްޑީޕީގެ ކެންޑިޑޭޓުންގެ ކެމްޕެއިން ޙަރަކާތުގެ ތެރެއިން ޕޯސްޓަރު ތަތްކުރުމުގެ ޙަރަކާތް ރަސްމީކޮށް ފައްޓަވާ ދެއްވީ ރައީސުލްޖުމްހޫރިއްޔާ އަދި އެމްޑީޕީގެ އެންމެ އިސްލީޑަރު އިބްރާހީމް މުޙަމަދު ޞާލިޙާއި، ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުޙައްމަދު ނަޝީދެވެ.

Advertisement

ޕޯސްޓަރު ހަރުކުރުމުގެ ޙަރަކާތް ރަސްމީކޮށް ފައްޓަވާފައިވަނީ މާލޭގައި ހުންނަ އެމްޑީޕީގެ ހަރުގެ ހުންނަ ޞަރަޙަރައްދުން ނެވެ. އެގޮތުން ހެނދުނުގެ ސައި ހަރުގޭގައި ބެއްލެވުމަށްފަހު، ރައީސް ޞާލިހުއާއި ރައީސް ނަޝީދު އަދި އެމްޑީޕީގެ ލީޑަރޝިޕްގެ ބޭފުޅުންނާއި އަދި މާލޭގައި މިވަގުުތު ތިއްބެވި ކެންޑިޑޭޓުނާއި ޢާންމު މެންބަރުން ވަނީ މާލޭގައި ޕޯސްޓަރު ތަތްކުރުމުގެ ޙަރަކާތް ހިންގާވާފަ އެވެ.

ޕޯސްޓަރު ތަތްކުރުމުގެ ޙަރަކާތް ފައްޓަވާ ދެއްވަމުން ރައީސް ޞާލިޙާއި ރައީސް ނަޝީދު ވަނީ އެމްޑީޕީގެ ހަރުގޭގޭ ފާރުގައި އެމްޑީޕީން ކައުންސިލްތަކުގެ އިންތިޚާބުގައި ބޭނުންކުރާ (ރަށްވެހި ފަތިސް)ގެ ޕޯސްޓަރުގެ މަންޒަރު ކުރަހައި ކުލަޖައްސަވައިދެއްވާފަ އެވެ.

އޭގެފަހުން ދެ ރައީސުން ވަނީ މަޖީދީމަގުގެ ބައެއް ތަންތަނުގައި ޕޯސްޓަރު ތަތްކުރުމުގެ ޙަރާކާތުގައިވެސް ބައިވެރިވެވަޑައިގަންނަވާފަ އެވެ.

އެމްޑީޕީން ބުނަނީ، ޕޯސްޓަރު ހަރުކުރުމުގެ ޙަރަކާތް ވިލިމާލޭގަ އާއި ހުޅުމާލޭގައި ވެސް ހޮނިހިރު ދުވަހު ކުރިއަށްދާނެ ކަމަށެވެ. އަދި މިޙަރަކާތް މިހާރު ރާއްޖޭގެ ހުރިހާ ރަށެއްގައި ކުރިއަށްދާނެ ކަމަށްވެސް އެމްޑީޕީން ބުނެއެވެ.

މީގެ އިތުރުން އެމްޑީޕީގެ ފަރާތުން ވާދަކުރާ ކެނޑިޑޭޓުންގެ ކެމްޕޭން ލޯންޗުކުރުމަށް ބާއްވާ ޚާއްޞަ ޖަލްސާ މި މަހުގެ 21 ވަނަ ދުވަހު ހުރިހާ ރެށެއްގައި އެއްވަގުތެއްގައި ބޭއްވުމަށްވެސް ވަނީ ހަމަޖެހިފައެވެ.

މި ޖަލްސާ ކުރިއަށް ދާއިރު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙާއި، ޕާޓީގެ ރައީސް ރައީސް މުޙައްމަދު ނަޝީދުގެ ވާހަކަފުޅު ހުރިހާ ރަށެއްގައިވެސް ވަގުތުން ދެއްކޭނެގޮތް ހަމަޖެހިގެންދާނެ ކަމަށް އެ ޕާޓީން މައުލޫމާތު ދެއެވެ.

ޕޯސްޓަރުގެ އިތުރުން ކެމްޕޭން ބެނަރ އާއި، ލީފްލެޓާއި، ބުކްލެޓް ތައްޔާރުކުރުމަށް ވަނީ ހަމަޖެހިފައެވެ.

އަދި ކޮންމެ ރަށަކަށް ވަކިން ޚާއްޞަކޮށް މެނިފެސްޓޯއެއް ތައްޔާރު ކުރުމަށް ހަމަޖެހިފައިވާ ކަމަށާއި އެ މެނިފެސްޓޯގައި އެ ރަށެއްގެ މަޢުލޫމާތުތާއި އެރަށެއްގެ ހިންގާ ޕްރޮޖެކްޓްތަކާއި، ޕީއެސްއައިޕީ ޕްރޮޖެކްޓުތަކުގެ އިތުރަށް ކުރިން ބޭއްވި ވާރކްޝޮޕްތަކުގައި ފޯމިއުލޭޓް ކުރި ޕްރޮޖެކްޓްތައް އޭގައި އެކުލަވާލެވިފައިވާނެ ކަމަށް އެ ޕާޓީން މައުލޫމާތު ދެއެވެ.