އެމްއެމްޕީއާރްސީގެ މައްސަލަ އަވަހަށް ނިންމަން ޖެހޭ: ޕީޖީ ޝަމީމް
12 ފެބުރުއަރީ 2020 | ބުދަ 10:06267 މީހުންނަށް ހިޔާނާތުގެ ފައިސާ ލިބިފައިވޭ
ހިޔާނާތުގެ ފައިސާގައި ޖެހުނު މީހުންގެ ތެރޭގައި ސަރުކާރުގެ އިސްވެރިންވެސް ހިމެނޭ
މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝާން (އެމްއެމްޕީއާރްސީ) މެދުވެރިކޮށް ރާއްޖޭގެ ފަޅުތަކާއި ރަށްތައް ވިއްކައިގެން ދައުލަތަށް ހިޔާނާތްތެރިވި ފައިސާގައި ޖެހުނު މީހުންގެ ތަހުގީގު ވީހާވެސް އަވަހަށް ނިންމަން ޖެހޭ ކަމަށް ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.
އެމްއެމްޕީއާރްސީއިން ހިޔާނާތްވީ ފައިސާގެ ތެރެއިން އޭރާއި މިހާރުގެ ސަރުކާރުގައި ތިއްބެވި އިސްވެރިންނަށާއި، މަޖިލިސް މެމްބަރުންނަށާއި، ފަނޑިޔާރުންނާއި އަދި މުއައްސަސާތަކުގެ އިސްވެރިންތަކަކަށް މަންފާ ވެފައިވާ ކަމަށް ވަނީ ހާމަވެފައެވެ. އެގޮތުން ގާތްގަނޑަކަށް 267 މީހުންނަށް ހިޔާނާތުގެ ފައިސާ ލިބިފައިވާ ކަމަށް ކަމާއި ބެހޭ އިދާރާތަކުން މީގެ ކުރިން ބޭއްވި ނޫސްވެރިންގެ ކޮންފަރެންސެއްގައި ވަނީ ބުނެފައެވެ
ބުދަ ދުވަހު ޕީޖީ އޮފީހުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު ކުރި ސުވާލަކަށް ޖަވާބުދެއްވަމުން ޝަމީމް ވިދާޅުވީ، ހިޔާނާތުގެ މައްސަލައިގެ ތަހުގީގު މި ދޭތެރެއިން ވަރަށް ވަރަށް ބާރަށް ދިޔަ ކަމަށެވެ. އެކަމަކު މިހާރު އެ މަސައްކަތް ހުއްޓިފައިވާ ކަމަށް ވިދާޅުވިއެވެ.
ޕީޖީ ބޭނުންފުޅުވަނީ ހިޔާނާތުގައި ބައިވެރިވި މީހުންގެ ލިސްޓު އޮތް ގޮތަށް ނުބާއްވައި އެ މައްސަލަ އަށް ވީހާވެސް އަވަހަށް ގޮތެއް ނިންމުމަށެވެ.
ޝަމީމް ވިދާޅުވީ، ވަކި ތާވަލެއް ހަދައިގެން މަސައްކަތް ކުރިޔަށް ގެންގޮސް އެމްއެމްޕީއާރްސީގެ މައްސަލަ ނިންމާނެ ކަމަށެވެ. އެކަމަކު ލިސްޓުގައި ތިބި މީހުންގެ ތެރެއިން ވަކި ބަޔަކަށް ޓާގެޓް ކޮށްގެން ދިޔުމަކީ އެންމެ ރަނގަޅު ކަމަކަށް ނުވާނެ ކަމަށް ވިދާޅުވިއެވެ.
އެމްއެމްޕީއާރްސީގެ ހިޔާނާތާ ގުޅިގެން ބޭއްވި ނޫސްވެރިންގެ ބައްދަލުވުމުގައި އެސެޓް ރިކަވަރީ ކޮމިޝަންގެ ރައީސް އަހްމަދު އައްސަދު ވިދާޅުވެފައިވާ ގޮތުން ބޮޑު ހިޔާނާތުގެ ތެރެއިން ދައުލަތަށް ޖުމްލަ 220 މިލިއަން ޑޮލަރު (3.3 ބިލިއަން ރުފިޔާ) ލިބެންޖެހޭ ކަމަށެވެ.
މީގެ ކުރިން ރައީސް އިބްރާހިމް މުހައްމަދު ސޯލިހު ވެސް ވަނީ އެ ހިޔާނާތުގެ އަގު 220 މިލިއަން ޑޮލަރަށް އަރާކަމަށް ވިދާޅުވެފައެވެ. މިއީ ކުރިން އޭސީސީން ހާމަކުރި އަދަދަށް ވުރެ، 143 މިލިއަން ޑޮލަރު އިތުރު އަދަދެކެވެ
