ކޮރޯނާވައިރަސްގެ ބަލިމަޑުކަމަކީ ގެއްލުންދެނިވި ކާރިޘާއެއްގެ ގޮތުގައި ކެރެލާއިން ކަނޑައަޅައިފި

އިންޑިއާގެ ދެކުނު ކެރަލާ ސްޓޭޓުގައި، ނޮވެލް ކޮރޯނާވައިރަސްގެ ބަލިމަޑުކަމަކީ އެސްޓޭޓަށް ކުރިމަތިވި ކުއްލި ކާރިޘާއެއްގެ ގޮތުގައި ކަނޑައަޅައިފިއެވެ.

ކެރެލާ ސްޓޭޓްގެ ޞަރަޙައްދީ ސަރުކާރުން މި ގޮތައް ކަނޑައެޅިކަން ރަސްމީކޮށް އިޢުލާން ކުރެއްވީ އެސްޓޭޓުގެ ޗީފް މިނިސްޓަރ ޕިނެރާޔީ ވިޖޭޔަންއެވެ. އޭނާ ވިދާޅުވިކަމަށް އިންޑިއާގެ ނޫސްތަކުގައި ބުނެފައިވަނީ، ކުއްލި ގެއްލުންދެނިވި ކާރިޘާއެއްގެ ގޮތުގައި އެސްޓޭޓުން ކޮރޯނާވައިރަސްގެ ބަލިމަޑުކަން ކަނޑައެޅީ، އެސްޓޭޓުން ތިން މީހަކު ނޮވެލް ކޮރޯނާވައިރަސް އަށް ޕޮޒިޓިވްވުމާއި ގުޅިގެންކަމަށެވެ.

މިކަމާއި ގުޅޭގޮތުން ކެރެލާ ސްޓޭޓުގެ ހެލްތު މިނިސްޓަރ ކޭކޭ ޝައިލާޖާ ވިދާޅުވީ ނޮވެލް ކޮރޯނާވައިރަސްގެ ބަލިމަޑުކަމަކީ "ކުއްލި ކާރިޘާއެއް"ގެ ގޮތުގައި ކަނޑައެޅީ މިބަލިމަޑުކަން ކޮންޓްރޯލް ކުރުމަށް އެކަށީގެންވާ ހަރުދަނާ ފިޔަވަޅު އެޅުމުގެ ގޮތުންކަމަށެވެ. އަދި ސަރުކާރުން މިގޮތައް ކަނޑައެޅުމާއި ގުޅިގެން، ސަރުކާރުގެ ކަމާއި ގުޅުން ހުރިހައި އިދާރާތައް މިކަމަށް ތައްޔާރުވެ، ޗުއްޓީގައި ތިބި ޑޮކްޓަރުންނާއި ޞިއްޙީ އެހީތެރިން މިހާރު ޑިއުޓީއަށް ނިކުމެފައިވާކަމަށް އެޤައުމުގެ ހެލްތު މިނިސްޓްރީން ބުނެއެވެ.

ކޮރޯނާވައިރަސްއަށް ޕޮޒިޓިވްވި ތިން މީހުންނަކީވެސް، ކޮރޯނާވައިރަސް ހަލުވިކަމާއެކު ފެތުރެމުން އަންނަ ޗައިނާގެ ވޫހާން ސިޓީގެ ޔުނިވަރިސިޓީއެއްގައި ތަޢުލީމު ޙާޞިލުކުރަމުންދާ ކެރެލާ ސްޓޭޓްގެ ތިން މީހުންނެވެ. މި ތިން މީހުންނަށް މިހާރު ތްރިޝޫރާއި، އަލައްޕުޒާ މެޑިކަލް ކޮލެޖުގައި ކަރަންޓީންކޮށްގެން ފަރުވާދެމުންދާކަމަށް ކެރެލާ ސަރުކާރުން ވަނީ ބުނެފައެވެ. އަދި މިކުދިންގެ ޙާލަތު މިހާރު ރަނގަޅުކަމަށް މަޢުލޫމާތު ލިބެއެވެ.

ކެރެލާ ސްޓޭޓުގެ ޑިސާސްޓަރ މެނޭޖްމެންޓް ސެންޓަރާއި ޙަވާލާދީ އިންޑިއާގެ ނިއުސް އޭޖެންސީތަކުން ރިޕޯޓުކުރާގޮތުގައި، ޗައިނާއާއި ،ކޮރޯނާވައިރަސް ފެތުރިފައިވާ ޤައުމުތަކަށް ފާއިތުވެދިޔަ ދުވަސްތަކުގައި ދަތުރު ކުރި އެސްޓޭޓްގެ މީހުން ހޯދުމަށް ސަރވައިލެންސް ޕްރޮގުރާމެއް ހިންގާ މިހާތަނަށް އައިއިރު 2،239 މީހުން ހޯދިފައިވާކަމަށެވެ. އަދި މީގެ ތެރެއިން 2،155 މީހުންގެ ގޭގައި ކަރަންޓީންކޮށްފައިވާކަމަށެވެ. އަދި އަނެއް 84 މީހުން ހޮސްޕިޓަލްތަކުގެ އައިސޮލޭޓް ވޯޑްތަކުގައި އެޑްމިޓްކޮށްގެން ފަރުވާދެމުން އަންނަކަމަށެވެ. މީގެ ތެރެއިން 82 މީހުންނަނީ ކޮރޯނާވައިރަސްއަށް ޕޮޒިޓިވްވި 3 މީހުންނާއި އެކި ގޮތްގޮތުން ދިމާވެފައިވާ މީހުންކަމަށްވެސް ރިޕޯޓުތައް ބުނެއެވެ.

ކަރަންޓީން ކުރި 2،239 މީހުންގެ ތެރެއިން 40 މީހުންނަކީ ޓްރިސޫރް އަވަށުގެ މީހުންކަން ހާމަކޮށްފައިވީނަމަވެސް ދެންތިބި މީހުން ނިޞްބަތްވާ އަވަށެއް ހާމަކޮށްފައެއް ނުވެއެވެ.

ރެލާ ސްޓޭޓުގެ ހެލްތު މިނިސްޓަރ ކޭކޭ ޝައިލާޖާވަނީ ވައިރަސް ފެތުރިފައިވާ ޤައުމުތަކަށް އެެއްވެސް ބޭނުމެއްގައި ޒިޔާރަތްކޮށްފައިވާ ފަރާތެއް ނަމަ އެމިނިސްޓްރީއަށް ނުވަތަ ކަމާއި ގުޅުން ހުރި އިދާރާއަކަށް އިންޑިއާއަށް އައިސް މަޑުނުވެ ރިޕޯޓްކުރަން އަންގާ އެކަން އިޢުލާންކޮށްފައެވެ. އަދި ރިޕޯޓުނުކޮށްތިބޭ ފަރާތްތަކާމެދު ވަކި އުޞޫލެއްގެ ދަށުން ފިޔަވަޅު އަޅާނެކަމަށްވެސް ހެލްތު މިނިސްޓަރ ވަނީ ވިދާޅުވެފައެވެ. މިނިސްޓަރ ވިދާޅުވެފައިވަނީ ރިޕޯޓުނުކުރުން އެއީ ވަރަށް ނުރައްކާ ކަމެއް ކަމަށެވެ. އެއީ ރިޕޯޓުނުކޮށްފިނަމަ، އިތުރު ބަޔަކު މިކަމުގެ ނުރައްކަލަށް ހުށަހެޅިގެން ދާނެތީކަމަށެވެ.

ކެރެލާ ސްޓޭޓުގެ ގިނަ ޢަދަދެއްގެ ކުދިން ވޫހާން ސިޓީގައި ތަޢުލީމު ޙާޞިލު ކުރަމުންދާތީ ކަރަންޓީން ކުރާ މުއްދަތުގެ ގޮތުގައި 28 ދުވަސް ކެރެލާ ސަރުކާރުން ވަނީ ކަނޑައާޅާފައެވެ. އަދި ކެރެލާ ސްޓޭޓުގެ 14 އަވަށެއްގައި ސަރވައިލެންސް ޕްރޮގުރާމުގެ ދަށުން މީހުން ހޯދުމަށް ސްޕެޝަލް ކޮންޓްރޯލް ރޫމުތައް ވަނީ ޤާއިމުކޮށްފައެވެ.

ކޮރޯނާ ވައިރަސްގެ ބަލިމަޑުކަމާއި ގުޅިގެން ކަރަންޓީން ކުރެވޭ މީހުންނަށާއި އެމީހުންގެ ޢާއިލާގެ މެންބަރުންނަށް ސައިކޯ ސޯޝަލް ޕްރޮގުރާމް ހިންގުމަށް ސަރުކާރުން 178 ކައުންސިލަރުން ހަމަޖައްސާފައިވާކަމަށްވެސް ކެރެލާގެ ހެލްތު މިނިސްޓްރީން ބުނެއެވެ. މިހާތަނަށް އައިއިރު 371 މީހަކަށް ކައުންސެލިންގެ ދީފައިވާކަމަށް ވެސް އެމިނިސްޓްރީން ބުނެއެވެ.