ސިޓީ ބަލިކޮށް ޓޮޓެންހަމް ފަސްވަނައަށް

އިނގިރޭސި ޕްރިމިއާ ލީގުގައި އާދީއްތަ ދުވަހުގެރޭ މެންޗެސްޓާ ސިޓީ އަތުން 2-0 އިން މޮޅުވެ ތާވަލުގެ ފަސްވަނައަށް ޓޮޓެންހަމް ހޮޓްސްޕާސް ޖެހިލައިފި އެވެ.

މި މެޗުން ބަލިވެ ސިޓީ ތާވަލުގެ ދެވަނައިގައި އޮތީ 25 މެޗުން 51 ޕޮއިންޓާއެކު އެވެ. އެއްވަނައިގައި އޮތް ލިވަޕޫލަށް 25 މެޗުން 73 ޕޮއިންޓު ލިބިފައިވާއިރު، ދެޓީމުގެ ދެމެދު 22 ޕޮއިންޓުގެ ފަރަގެއް އެބައޮތެވެ. އަދި ޓޮޓެންހަމް އަތުން ސިޓީ ބަލިވުމުން، ލީގު ތަށި ހޯދުމަށް ލިވަޕޫލަށް ދެން ބޭނުންވަނީ 18 ޕޮއިންޓެވެ.

ޓޮޓެންހަމްގެ ދަނޑުގައި ކުޅުނު މި މެޗުގެ ފުރަތަމަ ހާފު ޑޯމިނޭޓުކޮށްގެން ކުޅުނީ ސިޓީންނެވެ. އެގޮތުން މި ހާފުގައި ލީޑު ނެގުމަށް ސިޓީއަށް ވަނީ ޕެނަލްޓީއެއްވެސް ލިބިފައެވެ. އެކަމަކު ސިޓީގެ އިލްކާއި ގުންޑޮގާން ފޮނުވާލި ޕެނަލްޓީ ޓޮޓެންހަމްގެ ގޯލްކީޕަރު ހޫގޯ ލޮރިސް ވަނީ މަތަކޮށްފައެވެ.

ދެވަނަ ހާފުގައި ސިޓީއަށް ގެންޖެހުންތަކާ ކުރިމަތިލާން ޖެހުނީ 60 ވަނަ މިނެޓުގައި އެޓީމުގެ ޑިފެންޑަރު އޮލެކްޒަންޑާ ޒިންޗެންކޯއަށް ދެވަނަ ރީނދޫ ކާޑާއެކު ރަތް ކާޑެއް ދައްކާ ދަނޑުން ފޮނުވާލި ހިސާބުންނެވެ. އެގޮތުން އޭގެ ތިން މިނެޓު ފަހުން ޓޮޓެންހަމުން ވަނީ މެޗުގައި ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ނިމިދިޔަ ޖެނުއަރީ ޓްރާންސްފާގައި އެޓީމާ އަލަށް ގުޅުނު ސްޓީވަން ބާގްވިން އެވެ. މި މެޗަކީ މީގެ ކުރިން ޕީއެސްވީ އެއިންދޯވަން އަށް ކުޅުނު ބާގްވިން ޓޮޓެންހަމަށް ކުޅެދިން ފުރަތަމަ މެޗެވެ.

މެޗުގައި ޓޮޓެންހަމުން ލީޑު ފުޅާކުރީ 71 ވަނަ މިނެޓުގައެވެ. އެންޑޮމްބެލޭ ދިން ޕާހަކުން މި ލަނޑު އެޓީމަށް ޖަހައިދިނީ ސޮން ހުއެން-މިން އެވެ.

މި މޮޅާއެކު ޓޮޓެންހަމް ތާވަލުގެ ފަސްވަނައަށް ޖެހިލީ 25 މެޗުން 37 ޕޮއިންޓާއެކު އެވެ. ތާވަލުގެ ހަވަނއަށް ވެއްޓުނު ޝެފީލްޑް ޔުނައިޓެޑަށް 25 މެޗުން ލިބިފައިވަނީ 36 ޕޮއިންޓެވެ.

މީގެ އިތުރުން ލީގުގައި އާދީއްތަ ދުވަހުގެރޭ ބާންލީ އާއި އާސެނަލް ބައްދަލުކުރި މެޗު ނިމުނީ ދެޓީމުންކުރެ ޓީމަކަށް ގޯލެއް ކާމިޔާބުނުކުރެވި އެވެ. މި މެޗު އެއްވަރުވުމުން އާސެނަލް އޮތީ ތާވަލުގެ ދިހަވަނައިގައި 25 މެޗުން 31 ޕޮއިންޓާއެކު އެވެ.