14 ވަނަ ގައުމީ ބާސްކެޓްބޯޅަ މުބާރާތުގެ އަންހެން ޑިވިޝަނުގެ ކުޅުން ފަށައިފި

ފަސް ޓީމާއިއެކު 14 ވަނަ ގައުމީ ބާސްކެޓް ބޯޅަ މުބާރާތުގެ އަންހެން ޑިވިޝަނުގެ ކުޅުން ހޮނިހިރު ދުވަހު ފަށައިފިއެވެ.

ޒުވާނުންގެ މަރުކަޒު އެތެރޭ ކޯޓުގެ ހޯލުގައި ކުރިޔަށްދާ މި މުބާރާތުގެ ފުރަތަމަ މެޗުގައި ބައްދަލުކުރީ ކުއީންސް ބާސްކެޓް ބޯޅަ ކްލަބާއި ބެންޗް ސްޕޮޓްސް ކްލަބްއެވެ. މި މެޗު 58 ޕޮއިންޓް 35 ޕޮއިންޓް އިން ކާމިޔާބު ކޮށްފައިވަނީ ކްއީންސް ބާސްކެޓް ކްލަބްއެވެ.

މެޗުގެ ފުރަތަމަ ކުއާޓާގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު މި ކުއާޓާގައި ބެންޗް އެސްސީގެ ޒުވާން ކުޅުންތެރިން ވަނީ މޮޅަށް ކުޅެފައެވެ. އެގޮތުން މި ކުއާޓާ ބެންޗް އެސްސީއިން ކާމިޔާބުކުރީ 13 ޕޮއިންޓް 11 ޕޮއިންޓުންނެވެ.

ޖެހިގެން އައި ކުއާޓާގައި ކްއީންސް ބީސީ އިން ވަނީ އެޓީމުގެ ކުޅުން ރަނގަޅުކޮށް ތަޖުރިބާކާރު ކުޅުންތެރިންގެ ބޭނުން ހިފައިފައެވެ. މި ކުއާޓާގައި ކްއީންސް ބީސީއިން ވަނީ ފަހަތުން އަރައި ބޮޑު ލީޑެއް ނަގައިފައެވެ. މި ކުއާޓާ ކްއީންސް ބީސީ އިން ނިންމައިލީ 30 ޕޮއިންޓް 18 ޕޮއިންޓުންނެވެ.

މެޗުގެ ތިންވަނަ ކުއާޓާ އެއްކޮށްކަހަލަ ގޮތަކަށް ކޮންޓްރޯލް ކުރީ ކްއީންސް ބީސީއިންނެވެ. އެގޮތުން މި ކުއާޓާ ކްއީންސް ބީސީ އިން ނިންމައިލީ 50 ޕޮއިންޓް 38 ޕޮއިންޓުންނެވެ.

މެޗުގެ ފަހު ކުއާޓާގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު މި ކުއާޓާ ނިމިގެންދިޔައީ 58 ޕޮއިންޓް 35 ޕޮއިންޓުންނެވެ.

މި މެޗުގެ މޮޅު ކުޅުންތެރިޔަކަށް ހޮވިގެންދިޔައީ ކްއީންސް ބީސީގެ ފާތިމަތު ރިޝްމާ އެވެ.

އަންހެން ޑިވިޝަނުގެ ދެވަނަ މެޗުގައި ބައްދަލުކުރީ އެލީޓް ސްޕޯޓްސް ކްލަބް އާއި ލައިނެސް އެވެ.

މި މެޗު ފަސޭހަކަމާއިއެކު އެލީޓް ސްޕޯޓްސް ކްލަބްއިން ވަނީ ކާމިޔާބުކޮށްފައެވެ.

މި މެޗުގެ ފުރަތަމަ ކުއާޓާ ނިމުނުއިރު އެލީޓްއިން 14 ޕޮއިންޓް ސްކޯ ކޮށްފައެވެ. މި ކުއާޓާގައި ލައިނެސް އަށް ކާމިޔާބުކުރެވުނީ އެންމެ 5 ޕޮއިންޓެވެ. ދެވަނަ ކުއާޓާ ނިމުނުއިރު އެލީޓްއިން 31 ޕޮއިންޓް ސްކޯކޮށްފައިވާއިރު މި ކުއާޓާ ނިމުނުއިރު ލައިނެސް އަށް އަށް ކާމިޔާބުކުރެވުނީ 9 ޕޮއިންޓެވެ. ތިންވަނަ ކުއާޓާގައި އެލީޓްއިން 44 ޕޮއިންޓް ސްކޯކޮށްފައިވާއިރު މި ކުއާޓާ ވެސް ލައިނެސްއިން ނިންމާލީ 9 ޕޮއިންޓާއިއެކުގައެވެ. ފަހު ކުއާޓާ ނިމުނުއިރު އެލީޓްއިން ވަނީ 58 ޕޮއިންޓް ސްކޯކޮށްފައެވެ. މި ކުއާޓާ ނިމުނުއިރު ލައިނެސް އަށް ސްކޯކުރެވުނީ 12 ޕޮއިންޓެވެ.

މި މެޗުގެ މޮޅު ކުޅުންތެރިޔާއަށް ހޮވިގެންދިޔައީ އެލީޓްގެ އައިމިނަތު ޝިއުރާ އެވެ.

މި މުބާރާތުގެ އަންހެން ޑިވިޝަނުގައި ކުޅޭ ޓީމުތަކަކީ އެލީޓް ސްޕޯޓްސް ކްލަބް، ޓީއެސްއޭ، ކުއީންސް ބީސީ، ބެންޗް ބާސްކެޓް ބޯޅަ ކްލަބް އަދި ލައިނެސް ސްޕޯޓްސް އެވެ.