ރަށްގިރުމުގެ މައްސަލަ ދިމާވަނީ ކުރިން ކަން ކޮށްފައި ހުރި ގޮތުން: ޑރ. ހުސައިން

ރަށް ގިރަން މެދުވެރިވާ އެންމެ ބޮޑު އެއް ސަބަބަކީ ރަށްރަށުގެ ބަނދަރުތައް ހަދާފައި ހުރި ގޮތުން ކަމަށާއި، ކުރިން ބަނދަރުތައް ހަދާފައި ހުރީ އެންމެ އެކަށީގެންވާ ގޮތަށް ބަލައިގެން ނޫން ކަމަށް އެންވަޔަރަމެންޓް މިނިސްޓަރު ޑރ. ހުސައިން ރަޝީދު ހަސަން ވިދާޅުވެއްޖެއެވެ.

ރަށް ގިރާ މައްސަލާގައި އާދިއްތަ ދުވަހު އެންވަޔަރަމެންޓް މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިނިސްޓަރު ވިދާޅުވީ، އިރުވައިގެ ހަޅާގައި ގިނަ ރަށްތަކެއް ގިރާ، ބޮޑެތި ގެއްލުންތަކެއް ވަމުުންދާ ކަމުގެ ޝަކުވާ އެ މިނިސްޓްރީ އަށް ލިބެމުންދާ ކަމަށެެެވެ.

Advertisement

ރަށްގިރާ މައްސަލައިގައި މިނިސްޓަރު ހިމެނިވަޑައިގަންނަވާ ގޮތަށް އެންވަޔަރަމެންޓް މިނިސްޓްރީގެ ވަަފުދެއް ވަނީ މީހުން ދިރިއުޅޭ ރަށްރަށުގެ އިތުރުން މީހުން ދިރިނޫޅޭ ޖުމްލަ 30 ރަށަކަށް ޒިޔާރަތް ކޮށްފައެވެ.

މިނިސްޓަރު ވިދާޅުވީ، ހުރިހާ ރަށަކަށްވެސް ގިރުމުގެ އަސަރު ކުރަމުންދާކަން ފާހަގަކުރެވިފައިވާ ކަމަށާއި، އެހެން އަހަރުތަކާއި ހިލާފަށް މި އަހަރު ރަށް ގިރުމުގެ މައްސަލަ ބޮޑުވެފައިވާ ކަމަށެވެ.

ޑރ. ހުސައިން ރަޝީދު ވިދާޅުވީ، ފަޅު ރަށްރަށުގެ ގޮނޑުދޮށްތައްވެސް ގިރާފައިވާ ކަމަށެވެ. އަދި ވަކިން ހާއްސަކޮށް މީހުން ދިރިއުޅޭ، ބަނދަރު ހަދާފައި ހުރި ރަށްރަށުގައި ގިރުން ބޮޑު ކަމަށް ވިދާޅުވިއެވެ. އެއީ މޫސުމަށް އަންނަ ބަދަލަކާއި ގުޅިގެން މޫސުން ވަކި ގޮތަކަށް ދިމާވުމުން ކުރާ އަސަރު ބޮޑުވުމުން ކަމަށް ފާހަގަކުރެއްވިއެވެ.

ސަރުކާރުން ގެންދަނީ ރަށްރަށަށް ދިމާވެފައިވާ ގެއްލުންތައް ބަލަމުންނެވެ. މިދިޔަ އަހަރުގެ ތެރޭގައި 123 ރަށަކުން ވަނީ ރަށްގިރާ ކަމުގެ ޝަކުވާ އެންވަޔަރަމެންޓް މިނިސްޓްރީ އަށް ހުށައަޅާފައެވެ. އެކަމަކު އެއީ ކޮންރަށްތަކެއް ކަމެއް މިނިސްޓަރު ހާމައެއް ނުކުރައްވައެވެ.

މިނިސްޓަރު ވިދާޅުވީ، ތިމާވެއްޓަށް ދިމާވާ މިފަދަ ކަންތައްތަކުގައި ރަށު ފެންވަރުގައި ފިޔަވަޅު އެޅޭނެ ގޮތްތަކުގެ އިންތިޒާމުތައް ހަމަޖައްސަން ޖެހޭ ކަމަށެވެ.

ރ. ފައިނުގެ ގޮނޑުދޮށް ގިރާ މައްސަލައަށް އިޝާރާތް ކުރައްވާ މިނިސްޓަރު ވިދާޅުވީ، އެރަށް ހިމާޔަތް ކުރުމުގެ މަސައްކަތް ކުރަމުންދާ ކަމަށެވެ. އަދި އެހެން ރަށްރަށްވެސް ހިމާޔަތް ކުރުމުގެ މަސައްކަތް ކުރިޔަށްދާ ކަމަށް އެންވަޔަރަމެންޓް މިނިސްޓްރީން މައުލޫމާތުދެއެވެ.

މިނިސްޓަރު ވިދާޅުވީ، ރަށްގިރުމުގެ މައްސަލައަށް ހައްލެއްގެ ގޮތުގައި ބާރުއަޅަނީ ހިލަ ތޮށި އެޅުމުގެ ބަދަލުގައި ''ނޭޗަރ ބޭސް ސޮލިއުޝަން'' ތަކެއް ކަމަށެވެ.

އޭނާ ވިދާޅުވީ، ބަނދަރުތައް ހަދާއިރު ބަލަންވީ ވެއްޓަށް އެކަމުން ލިބޭނެ ގެއްލުން ކުޑަކުރުން ކަމަށެވެ. ގުދުރަތީ ގޮތުން ރާއްޖެ އުފެދިފައި އޮންނަ ގޮތް ބަދަލުކުރުމަށް ކުރެވޭ ކޮންމެ ކަމަކާއި ގުޅިގެން ގުދުރަތީ ވެއްޓަށް ބަދަލުތަކެއް އަންނަ ކަމަށް ވިދާޅުވިއެވެ.

އެކަމަކު ވޭތުވެދިޔަ ތަނުގައި މިހާރު ކަންބޮޑުވާ ގޮތަށް ކަންބޮޑުވުންތައް ނެތުން އެކަށީގެންވާ ކަމަށާއި، އަދި އެންމެ ރަނގަޅަށް އެކަން ކުރަންވާ ގޮތަށް ބަލައިގެން ނުކުރެވުނީމަ ކަމަށްވުން އެކަށީގެންވާ ކަމަށެވެ.

އެކަން މިހާރު ދޫކޮށްލާފައި މިހާރު ވިސްނަން ޖެހޭނީ މިހާރަށް ވުރެ ވެއްޓަށް ކުޑަ ބަދަލުތަކެއް އަންނާނެ ގޮތަކަށް، ތަރައްގީއާ ކުރިއެރުމަށް ހުރަސް ނޭޅޭ ގޮތަކަށް ކަންކަން ކުރަން ކަމަށް ފާހަގަކުރެއްވިއެވެ.