ދެވަނަ ޑިވިޝަން ފުޓުބޯޅަ މުބާރާތުގައި ކްލަބު ޕީކޭއިން ކުޑަ ހެންވޭރު ޔުނައިޓެޑް ބަލިކޮށްފިއެވެ.

ޤައުމީ ފުޓުބޯޅަ ސްޓޭޑިއަމްގައި ކުޅުނު މި މެޗު ޕީކޭއިން ކާމިޔާބު ކުރީ 2-1 ގެ ނަތީޖާ އަކުންނެވެ.

ފޯރިގަދަ ކުޅުމެއް ފެނިގެންދިޔަ މި މެޗު ފަށައިގެން ދެޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު ކުޑަހެންވޭރުން ގެންދިޔައީ ފުލުފުލުގައި ޕީކޭގެ ގޯލަށް ޙަމަލާތައް ފޮނުވާލަމުންނެވެ. ނަމަވެސް ޕީކޭގެ ކީޕަރު ވަނީ ހުޝިޔާރު ކަމާއެކު ކުޑަ ހެންވޭރުގެ ޙަމަލާތައް ދިފާޢުކޮށްފައެވެ. މި ހާފުގައި ޕީކޭގެ ކުޅުންތެރިންނަށް ވެސް ވަނީ ލަނޑު ޖެހުމަށް ފުރުޞަތުތަކެއް ލިބި ބޭކާރުވެފައެވެ. މެޗުގެ 45 ވަނަ މިނެޓުގައި ޕީކޭއިން ވަނީ ލަނޑު ޖަހާ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށް ދިނީ ޝިފާޒް އާދިލް އެވެ.

މެޗުގެ ފުރަތަމަ ހާފު ނިމިގެން ދިޔައީ 1-0 ގެ ނަތީޖާއަކުން ޕީކޭ ކުރީގައި އޮވެގެންނެވެ.

ދެވަނަ ހާފު ފަށައިގެން ޕީކޭއިން ވަނީ އެޓީމުގެ ޙަމަލާތައް އިތުރަށް ވަރުގަދަކޮށްފައެވެ. އެގޮތުން މެޗުގެ 50 ވަނަ މިނެޓުގައި އެޓީމުން ވަނީ ލަނޑު ޖަހާ ލީޑު ފުޅާ ކޮށްފައެވެ. މި ލަނޑު އެޓީމަށް ކާމިޔާބުކޮށް ދިނީ ބިދޭސީ ކުޅުންތެރިޔާ ބޯޑު ޕްރިންސް އެވެ. މި ލަނޑާއެކު ކުޑަ ހެންވޭރުން އެޓީމުގެ ކުޅުން ވަނީ އިތުރަށް ރަނގަޅުކޮށް ޕީކޭގެ ގޯލަށް ނުރައްކާ ކޮށްފައެވެ. އެގޮތުން މެޗުގެ 79 ވަނަ މިނެޓުގައި ކުޑަ ހެންވޭރުން ވަނީ ލަނޑު ޖަހާ ފަރަޤު ކުޑަކޮށްފައެވެ. މި ލަނޑު އެޓީމަށް ކާމިޔާބުކޮށް ދިނީ މުޙައްމަދު ނާޝިދު އަޙްމަދު ނަސީމެވެ. މި ލަނޑަށްފަހު ވެސް ކުޑަ ހެންވޭރުން ވަނީ ޕީކޭގެ ގޯލަށް ނުރައްކާ ކޮށްފައެވެ. ކުޑަ ހެންވެރުން ފޮނުވާލި ޙަމަލާތަކުގެ ހުރަހަކަށް ވެގެންދިޔައީ ޕީކޭގެ ކީޕަރެވެ.