އިރާޤުގަ ތިބޭ އެމެރިކާ ސިފައިން މަދުކުރުމާއި ބެހޭ ގޮތުން މަޝްވަރާކޮށްފި

އިރާޤުގައި ޙަރަކާތްތެރިވަމުންދާ އެމެރިކާގެ އަސްކަރީ ފައުޖުގެ ޢަދަދު މަދުކުރަން އެމެރިކާއާއި އިރާޤުން މަޝްވަރާކޮށްފިއެވެ.

މިކަމާއި ގުޅޭ މަޝްވަރާކުރައްވާފައިވަނީ، ސްވިޓްޒަރލޭންޑުގެ ޑާވޯސްގައި މިހާރު ކުރިޔަށްދާ ވަރލްޑް އިކޮނޮމިކް ފޯރަމްގެ ހަވާސާގައި އެމެރިކާގެ ރައީސް ޑޮނާލްޑް ޓްރަމްޕާއި އިރާޤުގެ ރައީސް ބަރްޙާމް ޞާލިޙާއި ދެބޭފުޅުން ބޭއްވި ބައްދަލުވުމެއްގައެވެ. މި ބައްދަލުކުރެއްވުމާއި ގުޅޭ ގޮތުން އެމެރިކާގެ ރިޔާސީ ގަނޑުވަރު ވައިޓްހައުސް އިން ޢާންމުކޮށްފައިވާ ބަޔާނެއްގައި ބުނެފައިވަނީ، ދެބޭފުޅުންގެ ބައްދަލުކުރެއްވުމުގައި މައިގަނޑުގޮތެއްގައި މަޝްވަރާ ކުރެއްވީ، އިރާޤުގައި ޙަރަކާތްތެރިވަމުންދާ އެެމެރިކާ ސިފައިންގެ މަދުކުރުމާއި ބެހޭ ގޮތުންކަމަށެވެ.

އިރާޤުގެ ރައީސްގެ ވާހަކަފުޅުގައި، އިރާޤުގެ މިނިވަންކަމާއި އިސްތިޤުލާލު ހިފެހެއްޓުމަށް، އެޤައުމުގެ ސަލާމަތީ ކަންކަމުގައި އަމިއްލަ ސިފައިން ޙަރަކާތްތެރިވުމުގެ މުހިންމުކަމުގެ މައްޗަށް ވަނީ އަލިއަޅުއްވާލައްވާފައެވެ. އެގޮތުން މިހާރު އެމެރިކާގައި ރުކުރުވާލާފައިވާ އިރާޤުގެ އަސްކަަރީ ފައުޖުތައް މަދުކޮށް، ވަކި އުޞޫލެއްގެ ދަށުން ރޭވިގެން އެކަން ކުރިޔަށްގެންދިއުމަށް އެމެރިކާގެ ރައީސް ގެ ކިބައިން އެދިވަޑައިގެންފައިވެއެވެ. އަދި މިއީ އެމެރިކާ ރައްޔިތުންގެ އެދުމެއްކަން ފާހަގަކުރައްވާ، ރައްޔިތުންގެ ގޮވާލުމަށް އިޖާބަދެއްވުމަށް އިރާޤުގެ ރައީސް އެދިވަޑައިގެންނެވިއެވެ. މީގެ ކުރިންވެސް އެމެރިކާ ސިފައިން ބޭލުމަށް އެދި އިރާޤުން އެމެރިކާ ސަރުކާރުގައި އެދިފައިވެއެވެ.

ވައިޓް ހައުސްގެ ބަޔާނުގައި މިބައްދަލުވުމާއި ބެހޭ ގޮތުން އިތުރަށް ވިދާޅުވެފައިވަނީ، އިރާޤު ސިފައިން މަދުކުރިޔަސް އަދި އެއްކޮށް އިރާޤުން ބޭލިނަމަވެސް، ދެމެހެއްޓެނިވި ގޮތެއްގައި އަސްކަރީ އަދި ދިފާޢީ ދާއިރާއިން އަބަދުވެސް އެމެެރިކާގެ އަސްކަރީ ދައުރެއް އިރާޤުގައި އަޮންނާނެ ފަދަ ގޮތަކަށް ދެބޭފުޅުން އެބަސްވެ ވަޑައިގެންފައިވާކަމަށެވެ.

އިރާޤުގެ ޤާނޫނު ހަދާ މަޖިލީހުންވަނީ ޖެނުއަރީ މަހުގެ 5 ވަނަ ދުވަހު، އިރާޤުގައި ތިބި އެމެރިކާ ސިފައިން އެޤައުމުން ބޭލުމަށް އެދި، ސަރުކާރަށް އެކަމަށް ގޮވާލާ ޤަރާރެއް ފާސްކޮށްފައެވެ. އޭރު އެ ޤަރާރު ފާސްކުރީ އިރާޤުގައި އެމެރިކާގެ އަސްކަރީން ދިން ޙަމަލާއެއްގައި އިރާނުގެ އަސްކަރިއްޔާގެ އެންމެ އިސްވެރިޔާ ޖެނެރަލް ޤާސިމް ސުލައިމަނީއާއި، އިރަޤުގެ އަސްކަރިއްޔާގެ ކޮމާންޑަރެއްކަމަށްވާ އަބޫ މަހްދީ އަލް-މުހަންދިން އަވަހާރަކޮށްލުމާއި ގުޅިގެންނެވެ.

މި ދެބޭފުޅުން އަވަހާރަކޮށްލި މައްސަލައިގައި، އީރާނާއި އެމެރިކާގެ މަޞްރަޙު ހޫނުވެ، ފަހުން އިރާނުން އިރާޤުގައި ޤާއިމުކޮށްފައިވާ އެމެރިކާގެ އަސްކަރީ 2 މަރުކަޒަކަށް ދިން ޙަމަލާތަކާއި ގުޅިގެން އިރާޤު ރައްޔިތުންވެސް ދަނީ އެކަމާިއ ކަންބޮޑުވާކަން ފާޅުކުރަމުންނެވެ. ވަކިން ޚާއްޞަކޮށް އިރަޤުގެ ހުއްދަ ނެތި އެ ދެޤައުމުން ޙަމަލާދިނުމަށް އިރާޤުގެ ބިމާއި ވައިގެ ޞަރަޙައްދު ބޭނުންކުރަމުންދާތީ ގިނަ ފަރާތްތަކަކުން ދަނީ ސަރުކާރަށް ފާޑިކިޔަމުންނެވެ. ސިޔާސީ އިދިކޮޅު ފަރާތްތަކުން ބުނެފައިވަނީ ބޭރުގެ ބާރުތައް އިރާޤުގައި ތިބުމަކީ ވަކިން ޚާއްޞަކޮށް އެމެރިކާފަދަ ނުފޫޒުގަދަ ޤައުމެއްގެ އަސްކަރީން އިރާޤުގައި ޙަރަކާތްތެރިވުމަކީ އޭގެ ޒާތުގައި އިރާާޤަށް އޮތް ބޮޑު ނުރައްކަލެއްކަމަށެވެ.

އިރާޤުގެ ޤާނޫނު ހަދާ މަޖިލީހުން ފާސް ކުރި ޤަރާރު ތަންފީޒުކުރެއްވުމުގެ ބޭނުމުގައި އިރާޤުގެ ބޮޑުވަޒީރު އާދިލް ޢަބްދުލް މަޙްދީ ވަނީ އިރާޤުގައި ޙަރަކާތްތެރިވާ އެމެރިކާގެ އަސްކަރީ ފައުޖުތައް އެޤައުމުން ބޭލުމަށް ތައްޔާރުވުމަށް އެމެރިކާ ސަރުކާރުގައި އެދިވަޑައިގެންފައެވެ. އެހެންނަމަވެސް އިރާޤުން ބޭނުންވާ ގޮތުގެ ބަދަލުގައި އެމެރިކާއިން ޢަމަލުކުރަމުންދަނީ އެމެރިކާއަށް އޭގެ މަންފާ ލިބޭގޮތަކަށް ކަމަށް މެދުއިރުމަތީގެ މަޞްރަޙު ދިރާސާ ކުރާ މުޙައްލިލުން ވިދާޅުވެއެވެ.