ކުރިއަށް އޮތް އިންތިޚާބާއި މިހާރު ކައުންސިލުން ކުރާ މަސައްކަތާ ގުޅުން އެބައޮތް!

މާލޭގެ ރައްޔިތުންގެ ވަރަށް ގިނަ ޝަކުވާތަކަށް ކުއްލިއަކަށް ކޮންމެވެސް ވަރެއްގެ ޙައްލުތަކެއް އަންނަތަން ފެންނަން ފަށައިފިއެވެ. ޕާކިން ޒޯންތަކެއް މާލޭގެ އެކި ޞަރަޙައްދުތަކުން ފެނިއްޖެއެވެ. ފޮހެވިފައިވާ މަގުމަތީގައި ހުރި ރޮނގުތަކުގައި ކުލަ ލެވިއްޖެއެވެ. ފަޅުގައި އަޅާފައިވާ ގިނަ ދުވަސްވެފައިވާ އޮޑިތައް ނެގުމުގެ މަސައްކަތް ފެށިއްޖެއެވެ. މަގުތައް ކޮންމެވެސް ވަރަކަށް ހަދަން ފެށިއްޖެއެވެ.

މިފަދަ މަންޒަރުތަކެއް ފެނުމުން ހަނދާނަށް އަންނަނީ ރައީސް މައުމޫންގެ ވެރިކަމުގައި ކޮންމެ ފަސް އަހަރަކުން އެއް ފަހަރު އަންނަ ކަމެއްގެ ވާހަކައެވެ. ކަޑަ ޖަހާ ވާހަކައެވެ. އިންތިޚާބުތަކާއި ދިމާކޮށް ހިނގާ މިފަދަ ކަންކަމާއި، މިހާރު މާލޭގައި ހިނގާ ކަންކަމާ ގުޅުވަން ވަރަށް ފަސޭހަވެއެވެ. އެހެންނަމަވެސް އެއީ އިންތިޚާބާއި ދިމާކޮށް ކުރާ ކަމެއް ނޫންކަމަށް މާލޭ ސިޓީ ކައުންސިލުން ވަނީ ބުނެފައެވެ. ހައިރާން ވާން ނުޖެހޭ ކަމަކީ އެހެން ވިދާޅުވާ ކައުންސިލަރުންނަކީ ކުރިއަށް އޮތް ލޯކަލް ކައުންސިލް އިންތިޚާބުގައި މާލޭގެ މޭޔަރު ކަމަށް ވާދަކުރައްވާ ބޭފުޅުންނެވެ.

އަޞްލު ވާހަކަޔަށް ޖެހިލާނަމެވެ. މާލޭގެ މޭޔަރުކަމަށް ވާދަކުރައްވާ ބޭފުޅުން ކިތަންމެ ނޫންކަމަށް ދައްކަން އުޅުނަސް، ހަޤީޤަތުގައި މާލެ ސިޓީ ކައުންސިލް އޮތީ ނިމިދިޔަ ދައުރުގައި ފެއިލްވެފައެވެ. ރައްޔިތުންނަށް ޚިދުމަތްކުރުމަށް އެމީހުންނަށް ބޮޑެތި ހުރަސްތަކެއް ނެތް ވާހަކައެއް ނޫނެވެ. ހުރަސްތައް ހުއްޓެވެ. އެހެންނަމަވެސް އެ ހުރަސްތަކާއެކުވެސް ކުރެވޭނެ ކަންކަންވެސް ހުއްޓެވެ. ހުރަސްތައް ގިރާ ކުރެވޭނެ ގޮތްތައްވެސް ހުއްޓެވެ. ފުވައްމުލައް ސިޓީ ކައުންސިލާއި އެމްޑީޕީގެ މެޖޯރިޓީ އޮތް އެހެން ކައުންސިލްތަކުންވެސް ރައްޔިތުންނަށް ދަތިތަކާއެކު ނަމަވެސް ޚިދުމަތްތަކެއް ފޯރުކޮށްދިނެވެ. އެކަން މާލެ ސިޓީ ކައުންސިލަށް ނުކުރެވުނީ ކީއްވެތޯއެވެ؟ އެ ހުރަސްތައް ގިރާކުރުމުގެ ޤާބިލުކަން ކައުންސިލްގައި ނެތީ ކީއްވެތޯއެވެ؟ މިއީ ވޯޓު ހޯދަން އެބޭފުޅުން އެ ހިންގަވާ ހިންގެވުމުގައި ކުރިމަތިވާނެކަން ޔަޤީން ސުވާލުތަކެވެ. އެސުވާލުތަކަށް އެބޭފުޅުން އެ ދެއްވާ ޖަވާބެއް ދެއްވަނީ ކޮން ހިތްވަރެއް ނެރެގެންބާވައޭ ހިތަށް ނާރާތޯއެވެ؟

ކުރެވެން ހުރި ކަންކަމުގައިވެސް މިދިޔަ އަހަރުވެސް ފެނުނީ ކައުންސިލަރުން އެއް ގަލަކަށް ނޭރިގެން އުޅުނުތަނެވެ. މޭޔަރާއި ޑެޕިއުޓީ މޭޔަރާއި ދެން ތިއްބެވި ކައުންސިލަރުންނަށް އެއް ގަލަކަށް ނޭރިގެން އެ މައްސަލައިގެ ތެރެއަށް މަޖިލީހުންނާއި ޕާޓީން އަންނަ ހިސާބަށް ދިޔުމުން މޭޔަރާއި ޑެޕިއުޓީ މޭޔަރުގެ ޤާބިލުކަމާމެދު ސުވާލު އުފެދެއެވެ. ރައީސް ސާލިޙުގެ ވެރިކަމަށް އަހަރެއް ވެގެންދިޔަ އިރު، މިއީ އެމްޑީޕީގެ ވެރިކަމެއްކަން އެމްޑީޕީގެ މެޖޯރިޓީ އޮތް މާލެ ސިޓީ ކައުންސިލަށް ދެއްކިފައެއް ނުވެއެވެ. އެ ޙަޤީޤަތް ބަދަލެއް ނުކުރެވޭނެއެވެ.

ޕާޓީގެ ސިޔާސަތު ކޮންމެ ގޮތަކަށް އޮތަސް، ރައްޔިތުންނަށް ބޭނުންވަނީ ޚިދުމަތެވެ. ތޮއްޖެހިފައިވާ މާލޭ ރައްޔިތުން ބޭނުންވަނީ ސަރުކާރާއި ގުޅިގެން މަސައްކަތްކުރެވޭނެ ކައުންސިލެކެވެ. ލާމަރުކަޒީ ޤާނޫނުން ލިބުނު އިތުރު ބާރުވެރިކަމާއެކު ރައްޔިތުންނަށް ޚިދުމަތް ކުރެވޭނެ ކައުންސިލެކެވެ. އެ ކައުންސިލަކީ މިހާރު އޮތް ކައުންސިލުކަމަށް ޤަބޫލެއް ނުކުރެވެއެވެ. މޭޔަރުކަމަށް އަންނަ ބޭފުޅަކީ މިހާރުވެސް ކައުންސިލްގައި ހުންނެވި ބޭފުޅަކަށް ވެއްޖެނަމަ، މާލޭގެ ރައްޔިތުންގެ އުއްމީދުތައް ހަގީގަތަކަށް ހެދިދާނެތޯ ރައްޔިތުން ވިސްނަން ޖެހެއެވެ. ޚާއްޞަކޮށް މާލޭގެ މޭޔަރުކަމަށް އެ ޕާޓީއެއްގެ ބޭފުޅަކު އައުން ގާތް އެމްޑީޕީގެ މެންބަރުން ކުރިއަށް އޮތް އެޕާޓީގެ ޕްރައިމަރީގައި މިކަމަށް ވިސްނަން ޖެހެއެވެ. މިހާރު ކައުންސިލްގައި ތިއްބެވި ބޭފުޅުންނާއި، ކުރިން ކައުންސިލުގައި ތިއްބެވި ބޭފުޅުން މިފަހަރު މޭޔަރުކަމަށް ކުރިމަތިލައްވާއިރު، އެބޭފުޅުންގެ ޓްރެކް ރެކޯޑާމެދު ވިސްނަން ޖެހެއެވެ. ރައްޔިތުން ސަމާލު ނުވެއްޖެނަމަ ދެންވެސް މާލޭގެ ރައްޔިތުންގެ މައްސަލަތަކަށް ޙައްލެއް އަންނާނެތޯއެވެ؟

މަސައްކަތް ކުރަނީ ކެމްޕޭނާއި ދިމާކޮށް ނޫންކަމަށް ބުންޏަސް، ރައްޔިތުން އެކަން ޤަބޫލުކުރާނެ ކަމާމެދު ޝައްކެވެ.