މިދިއަ އަހަރު އެންމެ ގިނަ މައްސަލަތައް ރައްދުވެފައިވަނީ ފުލުހުންގެ އިދާރާއަށް: އެޓަރނީ ޖެނެރަލް
މިދިއަ އަހަރު މަދަނީ މައްސަލަތަކުގައި ދައުލަތުން ދައުވާކުރި މައްސަލަތަކަށްވުރެ ދައުލަތަށް ރައްދުވި މައްސަލަތައް ގިނަ
އެޓާރނީ ޖެނެރަލް އިބްރާހީމް ރިފްއަތު
މިދިއަ އަހަރު ދައުލަތުގެ އިދާރާތަކުގެ ތެރެއިން މަދަނީ މައްސަލަތަކުގައި އެންމެ ގިނަ ދައުވާ ރައްދުވެފައިވަނީ ފުލުހުންގެ މުއައްސަސާއަށް ކަމަށް އެޓަރނީ ޖެނެރަލް (އޭޖީ)ގެ އޮފީހުން ބުނެފި އެވެ.
އެޓަރނީ ޖެނެރަލްގެ އޮފީހުން ޢާންމުކޮށްފައިވާ ތަފާސްހިސާބުތަކަށް ބަލާއިރު، ނިމިދިޔަ 2019 ވަނަ އަހަރު ފުލުހުންގެ އިދާރާއަށް ރައްދުވާ 43 މައްސަލައެއް ހުށަހެޅިފައިވެއެވެ. އަދި ހައުސިންގ މިނިސްޓްރީއާ ގުޅޭ 26 މައްސަލައެއް ހުށަހެޅިފައިވާއިރު، ޑިފެންސް މިނިސްޓްރީއާ ގުޅޭ 18 މައްސަލަ އަދި އަދި ޓުރިޒަމާ ގުޅޭ 15 މައްސަލަ ހުށަހެޅިފައި ވެއެވެ.
މީގެއިތުރުން، މިދިއަ އަހަރު ދައުލަތުން ދައުވާ ކުރި މައްސަލަތަކަށް ވުރެ ދައުވާ ރައްދުވި މައްސަލަތައް އިތުރެވެ. މިދިއަ އަހަރު ދައުލަތާ ދެކޮޅަށް 226 މައްސަލަ ކޯޓުގައި ކުރިއަށް ދިޔައެވެ. ނަމަވެސް ދައުލަތުން އިސްވެ ދައުވާ ކުރީ 158 މައްސަލާގައެވެ. ނަމަވެސް އޭގެ ކުރި އަހަރު، 2018 ވަނަ އަހަރު ދައުލަތަށް ރައްދުވި މައްސަލަތަކަށް ވުރެ، ދައުލަތުން އިސްވެ، ދައުވާ ކުރި މައްސަލަތައް ގިނައެވެ. އެގޮތުން އެ އަހަރު ދައުލަތުން އެކި މީހުންނަށާއި ކުންފުނިތަކަށް ދައުވާ ކުރި މައްސަލަތަކުގެ ޢަދަދު 429 އަށް އަރައެވެ.
އެޓަރނީ ޖެނެރަލްގެ އޮފީހުގެ ތަފާސްހިސާބުތައް ދައްކާގޮތުން، މިދިއަ އަހަރު ދައުލަތަށް ދައުވާ ރައްދުވި މައްސަލަތަކުގެ ތެރޭގައި އެންމެ ގިނައިން ހިމެނެނީ ވަޒީފާއާ ގުޅޭ މައްސަލަތަކެވެ. އެގޮތުން ވަޒީފާއާ ގުޅޭ 60 މައްސަލާގައި ދައުލަތާ ދެކޮޅަށް ދައުވާކޮށްފައިވެއެވެ.
މިދިޔަ އަހަރު އެޓަރނީ ޖެނަރަލް އޮފީހުގެ ޤާނުނީ ވަކީލުން 1924 އަޑުއެހުމަކަށް ހާޒިރުވެ، ވަކާލާތުކޮށްފައިވާއިރު، ދައުލަތުގެ އިދާރާތަކަށް ރައްދުވި ދައުވާތަކުގެ ތެރެއިން އެންމެ ގިނައިން އޭޖީ އޮފީހުގެ ވަކީލުން ކޯޓުގައި ވަކާލާތު ކުރަންޖެހުނީ ފުލުހުންގެ މުއައްސަސާއާ ގުޅޭ ގޮތުން ކޯޓަށް ހުށަހަޅާފައިވާ މައްސަލަތަކުގައެވެ.
އެޓަރނީ ޖެނެރަލްއަކީ ރައީސުލްޖުމްހޫރިއްޔާއަށް ޤާނޫނީ ލަފާ ދެއްވުމަށް ވަޒީރުންގެ މަޖިލީހުގައި ހިމެނިވަޑައިވާ ބޭފުޅެކެވެ. އަދި ދައުލަތުގެ އިދާރާތަކަށް ޤާނޫނީ ލަފާ ދެއްވުމާއި، މަދަނީ މައްސަލަތަކުގައި ދައުލަތް ތަމްސީލު ކުރައްވާ ފަރާތަކީ ވެސް އެޓަރނީ ޖެނެރަލް އެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު، 17 ނޮވެމްބަރު 2018 ވަނަ ދުވަހު ވެރިކަމުގެ ހުވާ ކުރެއްވުމާއެކު، އެޓާރނީ ޖެނެރަލް ކަމުގެ މަޤާމު ފުރުއްވަމުން ގެންދަވަނީ އިބްރާހީމް ރިފްއަތު އެވެ.
