ސޫރިޔާގެ އަސްކަރިއްޔާއިން އެޤައުމުގެ ސަރުކާރާއިދެކޮޅު ފަރާތްތަކަށް ޢަމާޒުކޮށް އިދްލީބު އަވަށުގައި ދެމުން ގެންދާ ޙަމަލާތަކުގައި ގިނަ ޢަދަދެއްގެ މަދަނީން ކޮންމެ ދުވަހަކު މަރުވަމުންދާތީ އދ އިން އެކަމާއި ކަންބޮޑުވާކަން ފާޅުކޮށްފިއެވެ.

ސޫރިޔާގެ މަޞްރާޙާއި ބެހޭ ގޮތުން ދެއްވި ބަޔާނެއްގައި އދ ގެ އިންސާނީ ޙައްޤުތަކާއި ބެހޭ އެންމެ އިސްވެރިޔާ މިޝޭލް ބެޗެލެޓް ވިދާޅުވީ، އެއްގަމާއި ވައިގެ މަގުން ކޮންމެ ދުވަހަކުހެން ޢާންމު ރައްޔިތުން ދިރިއުޅޭ ޞަރަޙައްދުތަކަށް ޢާމާޒުކޮށް އެއްގަމާއި ވައިގެ މަގުން އަސްކަރީ ޙަމަލާތައް ދެމުންދާކަމަށާއި، މިޙަމަލާތަކުގައި ކޮންމެ ދުވަހަކުވެސް މަދަނީން މަރުވަމުންދާ ކަމަށެވެ.

މިޝޭލް ވިދާޅުވީ ޙަމަލާ ބަދަލުކުރުން ހުއްޓާލާ އެއްބަސްވުމަކަށް އައިސްފައިވީ ނަމަވެސް، އެ އެއްބަސްވުން ތަންފީޒުކުރުމުގައި ސޫރިޔާ ސަރުކާރާއި ، ސޫރިޔާއަށް ވާގިވެރިވެދޭ ޤައުމުތަކުގެ ފައުޖުތައް ފޭލިވެފައިވާކަމަށެވެ. މަދަނީންގެ ޙިމާޔަތަށާއި ރައްކަލަކަށް ވެވުނު އެއްްބަސްވުމާއި ޚިލާފަށް އިދްލީބް އަވަށަށް ޙަމަލާދެމުންދާތީ މިޝޭލް ވަނީ އެކަން ކުށްވެރިކުރައްވާފައެވެ. އަދި މަދަނީންނަށް ޢަމާޒުކޮށްދޭ އަސްކަރީ ޙަމަލާތައް ވަގުތުން ހުއްޓާލުމަށްވެސް މިޝޭލް ވަނީ ގޮވާލާފައެވެ.

ސޫރިޔާގެ ޢާންމު ޙާލަތާއި ބެހޭ ގޮތުން ބުރާސްފަތި ދުވަހު އދ އިން ޢާންމު ކުރި ރިޕޯޓެއްގައި ބުނެފައިވަނީ އިދްލީބުގައި ސޫރިޔާ ސިފައިންނާއި، ރަޝިޔާގެ ގުޅިފައިވާ ލަޝްކަރުން ދިން ޙަމާލާތަކުގައި، ލިބުނު ގެއްލުންތަކުގެ ސަބަބުން 350،000 މީހުން ގެދޮރު ގެއްލި ޙާލުގައި ޖެހިގެން އިދްލީބު އަވަށުން ފައިބާފައިވާކަމަށެވެ. މިއީ ހަމަ އެކަނީ ޑިސެންބަރު މަހުގެ ކުރީކޮޅުން ފެށިގެން މި ދިޔަ ބުރާސްފަތި ދުވަހާއި ހަމަޔަށް ދިން ޙަމަލާތަކުގެ ސަބަބުން އަމިއްލަ ވަޒަނުން ފޭބި މަދަނީންކަމަށް އދ ގެ ރިޕޯޓުގައި ވެއެވެ. ޙާލުގައި ޖެހުނު މީހުންގެ ތެރޭގައި ގިނައީ އަންހެނުންނާއި ތުއްތު ކުދިންކަމަށާއި، މިމީހުން މިހާރު ދިރިއުޅެމުންދަނީ ސޫރިޔާއާއި، ތުރުކީވިލާތް ގުޅޭ ޞަރަޙައްދީ އިން ކައިރީގައި ފޭލިގެ ޖަހައިގެންނާއި، ބައެއް ވަގުތީ ހިޔާތަކުގައިކަމަށްވެސް ރިޕޯޓުގައި ވެއެވެ.

ސޫރިޔާގެ މަދަދާއެކު، ރަޝިޔާގެ އަސްކަރީން ކުރިޔަށްގެންދާ އޮޕަރޭޝަނުގައި ދެމުންގެންދާ ޙަމަލާތަކުގައި އިދްލީބަށް ވަނީ ބޮޑެތި އުމްރާނީ ގެއްލުންތައް ލިބިފައެވެ. އެގޮތުން ސްކޫލްތަކާއި، ހޮސްޕިޓަލްތަކާއި، ކުއްލި އެހީ އަދި އިންސާނީ އެހީދޭ ބަސއެއް އޭޖެންސީތައްވެސް ވަނީ ބިމާ ހަމަވެފައިއެވެ.

އިދްލީބުގެ އެތެރޭގައި މިހާރު ތިބި މަދަަނީން އަސާސި ޚިދުމަތްތަކަށް ޖެހިފައިވާއިރު، ޙާލުގައި ޖެހިގެން އަވަށުން ފޭބި މީހުންނަށްވެސް ވަނީ ފެނާއި ކާބޯތަކެތި ލިބުމުގައި ދަތިތަކާއި ކުރިމަތިލާންޖެހިފައެވެ. އދ އާއި އެހީދޭ ބައިނަލް އަޤުވާމީ އެހެނިހެން ޖަމްޢިއްޔާ ޖަމާޢަތްތަކުން އެހީތެރިވަމުން ދިޔަނަމަވެސް، ޙަމަލާތަކާއި ގުޅިގެން ޙާލުގައި ޖެހޭ މަދަނީންގެ ޢަދަދު ގިނަ ކަމުން އެފަރާތްކަށްވެސް ވަނީ އެހީ ދިނުމުގައި ދަތިތަކާއި ކުރިމަތިލާންޖެހިފައެވެ. ޙާލުގައި ޖެހޭ މީހުން ދުވަހުން ދުވަހަށް ގިނަވަމުންދާއިރު، އެންމެނަށް އެކަށީގެންވާ މިންވަރެެއްގައި އެހީތެރިކަން ފޯރުކޮށްދިނުމަށް ފަންޑް ނެތުމުގެ ސަަބަބުން ވަނީ ނުކުޅެދިފައެވެ.

2011 ވަނަ އަހަރު ރައީސް ބައްޝާރުލް އަސަދުގެ ސަރުކާރާއި ދެކޮޅަށް އެޤައުމުގެ މަދަނީން ތެދުވިފަހުން، އެޤައުމުގައި ސިޔާސީ މަޝްރަހު ގޯސްވެ، ޤައުމުގައި ވަނީ ދާޚިލީ ހަނގުރާމައަށް ފެށިފައެވެ. މިހާތަނަށް އައިއިރު އެތައް މިލިޔަން މީހުނެއް ޙާލުގައި ޖެހި، މުޅި ޤައުމުހެން ވަނީ ވީރާނާވެފައެވެ. އެހެންނަމަވެސް ރައްޔިތުންގެ ގޮވާލުންތަކަށް އިޖާބަ ނުދެއްވާ، ބައްޝާރުލް އަސަދު އަދިވެސް ހުންނެވީ ވެރިކަމުގައެވެ. ދުލެއް ނުދެއްވައެވެ.