ރިހާނާއާއި ސައުދި ވިޔަފާރިވެރިޔާ ހަސަން ޖަމީލް ރުޅިވީތަ؟

މަޝްހޫރު ލަވަކިޔުންތެރިޔާ ރިހާނާއާއި ލޯބިވެރިޔާއާ ރުޅިވެއްޖެކަމުގެ ރިޕޯޓުތައް ފެތުރެން ފަށައިފިއެވެ.

ތިން އަހަރު އެކުގައި އުޅުމަށްފަހު ރިހާނާއި ސަޢުދީ ޢަރަބިއްޔާގެ ވިޔަފާރިވެރިއެއް ކަމަށްވާ ޙަސަން ޖަމީލު ރުޅިވިކަމުގެ ޚަބަރުތައް ފެތުރެމުންދާއިރު، ދެ މީހުން ކައިވެނި ކުރަން އުޅޭ ވާހަކަވެސް މީގެ ކުރިން ބައިނަލްއަޤުވާމީ މީޑިއާތަކުން ރިޕޯޓުކޮށްފައިވެއެވެ.

މި ދެ މީހުންގެ ގުޅުމުގެ ވާހަކަ ފުރަތަމަ ދެކެވުނީ 2017 ވަނަ އަހަރެވެ. ދެ މީހުން އެކުގައި ސްޕެއިންގައި ޗުއްޓީ ހޭދަ ކުރަނިކޮށް ނަގާފައިވާ ފޮޓޯތަކެއް ސޯޝަލް މީޑިއާގައި ޢާންމުވުމާއި ގުޅިގެންނެވެ.

ޙަސަންއާ ގުޅޭ ގޮތުން ރިހާނާ މާ ގިނަ ވާހަކަ ދައްކާފައި ނުވިނަމަވެސް، 2019 ވަނަ އަހަރުގެ ޖޫން މަހު ދިން އިންޓަވިއުއެއްގައި މީހަކު ދެކެ ލޯބިވާކަމަށް އޭނާ ބުނެފައިވެއެވެ. ޙަސަންގެ ޢާއިލާއާއެކު ރިހާނާ ޗުއްޓީ ހޭދަކުރާ ފޮޓޯތަކެއް ވެސް ސޯޝަލް މީޑިއާގައި އޭރި ޢާންމުވިއެވެ.

ރިހާނާއާއި ޙަސަންއާ ރުޅިވިކަމަށް ޓީއެމްޒީއާއި ޔޫއެސް ވީކްލީން ރިޕޯޓު ކުރާއިރު، ދެ މީހުންނާ ގާތް ފަރާތުން އެ ނޫސްތަކަށް މިކަން ކަށަވަރުކޮށްދީފައިވާކަމަށް ބުނެފައިވެއެވެ. ނަމަވެސް، ދެ މީހުން ވަކިވާން މެދުވެރިވި ސަބަބެއް ބުނެފައި ނުވާއިރު، ރިހާނާ ނުވަތަ ޙަސަންގެ ފަރާތުން މިކަމާ ގުޅޭގޮތުން ބަހެއް ބުނެފައެއް ނުވެއެވެ.

ލަވަކިޔުންތެރިއެއްގޮތަށް ދުނިޔެއަށް ތަޢާރަފުވި، ބާބެޑޯސްއަށް ނިޞްބަތްވާ ރިހާނާ މިހާރު ބޮޑަށް ކުރަމުން އަންނަނީ އޭނާގެ 'ފެންޓީ ބިއުޓީ ލައިން' އާއި 'ސެވޭޖް' ލޯންޖްރޭ ލައިންގެ މަސައްކަތެވެ. 1.5 ބިލިއަން ޑޮލަރުގެ އަގުހުރި ޙަސަން ޖަމީލްގެ ޢާއިލާއަކީ ސަޢުދީ ޢަރަބިއްޔާގެ 12އަށް އެންމެ މުއްސަނދި ޢާއިލާއެވެ.