ދިރާސީ އައު އަހަރު ފެށީ ފޮތްތަކާއި ޓީޗަރުން ހަމަކުރުމަށްފަހު، ފުރިހަމައަށް ތައްޔާރުވެގެން: އެޑިއުކޭޝަން މިނިސްޓަރު
12 ޖެނުއަރީ 2020 | އާދީއްތަ 10:21ހެނދުނުގެ ނާސްތާ ޕްރޮގްރާމް ވަރަށް ކާމިޔާބު، ނަތީޖާ ފެންނަމުންދޭ
ެރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު އާއި އެޑިއުކޭޝަން މިނިސްޓަރު އާއިޝަތު އަލީ
ދިރާސީ އައު އަހަރުގެ ކިޔެވުން އާދިއްތަ ދުވަހު ފެށުނުއިރު، ރާއްޖޭގެ ހުރިހާ ސްކޫލްތަކަށް ބޭނުންވާ ފޮތްތަކާއި ސްކޫލްތަކަށް ބޭނުންވާ ޓީޗަރުން ހަމަކޮށް، ވަރަށް ފުރިހަމައަށް ތައްޔާރު ވެފައިވާ ކަމަށް އެޑިއުކޭޝަން މިނިސްޓަރު އާއިޝަތު އަލީ ވިދާޅުވެއްޖެ އެވެ.
އެޑިއުކޭޝަން މިނިސްޓްރީން އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި މިނިސްޓަރު އާއިޝަތު އަލީ ވިދާޅުވީ، މިދިއަ އަހަރު ދިރާސީީ އަހަރު ނިމުނުއިރު، މިއަހަރަށް ސްކޫލްތަކަށް ބޭނުންވާ ފޮތްތައް ދަރިވަރުންނާ ހަވާލުކުރެވިފައިވާތީ އެއީ ވަރަށް ބޮޑަށް ފާހަގަކޮށްލެވޭ ކަމެއް ކަމަަށެވެ. އަދި މިއަހަރަށް ސްކޫލްތަކަށް ބޭނުންވާ ޓީޗަރުން ހަމަކުރެވިފައިވާއިރު، ދަރިވަރުންގެ ތައުލީމީ ފެންވަރު އިތުރަށް ރަނގަޅު ކުރުމަށްޓަކައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙުގެ ސަރުކާރުގެ ސިޔާސަތުތަކުގެ ތެރެއިން ހިންގަމުންދާ ޕްރޮގުރާމުތަކުން ދަރިވަރުންގެ ކިބައިންވެސް އެކަން ފެންނަމުންދާ ކަމަށެވެ.
އެގޮތުން، ރައީސް ޞާލިޙުގެ ސަރުކާރުން ފަށާފައިވާ ހެނދުނުގެ ނާސްތާ ޕްރޮގުރާމަކީ، ކުދިންނަށް ދުޅަހެޔޮ ޞިއްޙަތަކާއި، ކިޔެވުމަށް ހުންނަ ޝައުޤު އިތުރުވެ، ދަރިވަރުންގެ ކިބައިން އުފާވެރިކަން ފެންނަމުންދާ ޕްރޮގުރާމެއް ކަމަށާއި، ހެނދުނު ނާސްތާ ޕްރޮގުރާމުގެ ނަތީޖާވެސް ފެންނަމުންދާ ކަމަށް މިނިސްޓަރު އާއިޝަތު އަލީ ވިދާޅުވި އެވެ.
މީގެއިތުރުން، ކުދިންގެ ކިޔެވުމުގެ ފެންވަރު ރަނގަޅު ކުރުމަށާއި ހަރުދަނާ ދަރިވަރުންގެ ގޮތުގައި ތަރުބިއްޔަރު ކުރުމަށްޓަކައި އެއްދަންފަޅިއަށް ސްކޫލުތައް ބަދަލު ކުރުމަކީ ވެސް ރައީސް ޞާލިޙުގެ ސަރުކާރުން ނިންމަވާފައިވާ ކަމެކެވެ. އެގޮތުން މިދިއަ އަހަރުވެސް 22 ސްކޫލެއް އެއް ދަންފަޅިއަށް ބަދަލުކޮށްފައިވާއިރު، މިއަހަރު ވެސް 22 ސްކޫލެއް އެއް ދަންފަޅިއަށް ވަނީ ބަދަލުކޮށްފަ އެވެ. އޭގެތެއިން ދިރާސީ އައު އަހަރާއެކު އާދިއްތަ ދުވަހު ހުޅުވި އިއްޒުއްދީން ސްކޫލް ހިމެނެ އެވެ.
މިނިސްޓަރު އާއިޝަތު އަލީ ވިދާޅުވީ، އެއްދަންފަޅިއަށް މަދަރުސާތައް ހިންގާއިރު ދުޅަހެޔޮ، ހަށި ހެޔޮ، ރަނގަޅު ޞިއްޙަތެއްގައި ދަރިވަރުން ބޭއްތިއްބުމަށް ވަރަށް ބޮޑަށް އަހައްމިއްޔަތުކަން ދެއްވާ ކަމަށެވެ.
މިނިސްޓަރު ވިދާޅުވީ މިއަދުގެ ސަރުކާރުން ތަޢުލީމަށް ދޭ އަހައްމިޔަތުކަން މިއަދު ވެސް ހާމަވެގެން ގޮސްފިކަމަށެވެ. އެގޮތުން ރާއްޖޭގެ ހުރިހާ އަތޮޅަކަށް މިނިސްޓަރުން ފޮނުވައި 20 ސްކޫލުގެ އެސެމްބްލީގައި މިނިސްޓަރުން ބައިވެރިވެވަޑައިގަންނަވާފައިވާ ކަމަށެވެ.
ދިރާސީ އާ އަހަރުގެ ކިޔެވުން އާދިއްތަ ދުވަހު ފެށީ ސަރުކާރުގެ ޖުމުލަ 212 ސުކޫލެއްގައި 73،067 ދަރިވަރުންނާ އެކުގައެވެ. ނަމަވެސް ރާއްޖޭގައި ހިންގާ އިންޓަރނޭޝަނަލް ސުކޫލުތަކާ އެކު މިޢަދަދު 83000އަށް އަރައެވެ.
