އޭއީއެޗްގެ ލޯގޯ ފަރުމާކުރުމުގެ މުބާރާތުގައި އެއްވަނައަށް ދާ ފަރާތަކަށް 10،000 ރުފިޔާ!
10 ޖެނުއަރީ 2020 | ހުކުރު 07:18މުބާރާތެއްގައި ބައިވެރިކޮށްފައިވާ ލޯގޯއަކަށް ވެގެން ނުވާނެ
އައްޑޫ އެކުއެޓޯރިއަލް ހޮސްޕިޓަލް
އައްޑޫ އެކުއެޓޯރިއަލް ހޮސްޕިޓަލް (އޭއީއެޗް) ގެ ލޯގޯ ފަރުމާކުރުމުގެ މުބާރާތުގައި ބައިވެރިވުމުގެ ފުރުސަތު ހުޅުވާލައިފިއެވެ.
ހިތަދޫ ރީޖަނަލް ހޮސްޕިޓަލުން ބުނީ އޭއީއެޗް ގެ ލޯގޯ ފަރުމާކުރުމުގެ ފުރުސަތު އާންމު ހުރިހާ ފަރާތްތަކަށް ހުޅުވާލާފައިވާ ކަމަށާއި، މުބާރާތުގައި ބައިވެރިވާން އެދޭ ފަރާތްތަކުން، މިމުބާރާތަށް ހުށަހަޅާ ލޯގޯއަކީ މީގެ ކުރިން ބޭނުންކުރެވިފައި ނުވަތަ މުބާރާތެއްގައި ބައިވެރިކޮށްފައިވާ ލޯގޯއެއް ކަމަށް ވެގެން ނުވޭނެ ކަމަށެވެ.
އޭއީއެޗް އިން ފޯރުކޮއްދޭ ޙިދުމަތް ރަމްޒުކޮށްދޭ ލޯގޯއެއް ކަމުގައިވާންޖެހޭ ކަމަށާއި، މުބާރާތަށް ހުށަހަޅާ ލޯގޯއަކީ އުފެއްދުންތެރި، އަމިއްލަވަންތަ ލޯގޯއެއް ކަމުގައިވާން ޖެހޭ ކަމަށް ހިތަދޫ ރީޖަނަލް ހޮސްޕިޓަލުން ބުނެއެވެ.
ހިތަދޫ ރީޖަނަލް ހޮސްޕިޓަލުން ބުނީ ލޯގޯގެ ޑިޒައިންއަކީ ހޮސްޕިޓަލުގެ ބިޒްނަސް ކާޑު، ލެޓަރ ހެޑް، ބެނަރ، ޔުނިފޯރމް އަދި ޓީޝާޓްފަދަ ތަކެތީގައި ބޭނުންކުރުމަށް އެކަށޭނަ ފަރުމާއަކަށްވާންޖެހޭ ކަމަށާއި، އެހެން ލޯގޯއެއް އަސްލަކަށް ބަލައިގެން ފަރުމާކުރާނަމަ އެލޯގޯގެ ކޮޕީ އާއި ތަފްސީލު ހުށަހެޅަންޖެހޭ ކަމަށެވެ. އަދި ލޯގޯ ޑިޒައިން ކުރުމުގައި ހަނދުފަޅި އަދި ކްރޮސް ބޭނުން ނުކުރުމަށާއި، އައްޑޫވަންތަކަން ރަމްޒުކޮށްދޭންޖެހެއެވެ.
ލޯގޯގެ ފަރުމާތަކަށް އިންސާފު ކުރައްވާނީ ހުށަހެޅި ފަރާތް ސިއްރުކުރުމަށްފަހު، މިކަމަށް އެކުލަވާލާފައިވާ ކޮމިޓީއަކުންކަން ފާހަގަކޮށް ހިތަދޫ ރީޖަނަލް ހޮސްޕިޓަލުން ބުނީ ހުށަހަޅާ ލޯގޯއަށް މާކްސް ދިނުމުގައި ލޯގޯގެ ޓެކްނިކަލް ފެންވަރާއި ކޮލިޓީ (ކޮމްޕޮޒިޝަން)، މިހޮސްޕިޓަލުގެ ސިފަތައް ރަމްޒުކޮށްދޭ މިންވަރު، އުފެއްދުންތެރިކަމާއި އަމިއްލަވަންތަކަމަށް ބެލޭނެ ކަމަށެވެ.
މީގެ އިތުރުން އެހޮސްޕިޓަލުން ބުނީ އެއްވަނައަށް ހޮވޭ ފަރާތަށް އީމެއިލް ނުވަތަ ފޯނުގެ ޒަރީއާއިން އެންގޭނެ ކަމަށާއި، އެއްވަނައަށް ހޮވޭ ލޯގޯ ހުށަހެޅުއްވި ފަރާތަކަށް ލިބޭ އިނާމަކަށް 10،000 ރުފިޔާ ލިބޭނެ ކަމަށެވެ. އަދި އެއްވަނައަށް ހޮވޭ ލޯގޯގެ ފުރިހަމަ ކޮޕީރައިޓް، އޭ.އީ.އެޗް އާ ހަވާލުކުރާނެ ކަމަށް ވެސް ހިތަދޫ ރީޖަނަލް ހޮސްޕިޓަލުން މައުލޫމާތުދެއެވެ.
ލޯގޯގެ ސޮފްޓް ކޮޕީތައް ހިމެނޭ ސީ.ޑީ އާއި ހާރޑްކޮޕީ މިމަހުގެ 19 ވާ އާދިއްތަ ދުވަހުގެ 12:00 ގެ ކުރިން ހިތަދޫ ރީޖަނަލް ހޮސްޕިޓަލަށް ހުށަހަޅަންޖެހެއެވެ. އަދި މިމުބާރާތަށް ލޯގޯ ހުށަހަޅާ ފަރާތުގެ ފުރިހަމަ ނަން، އައިޑީ ކާޑު ނަންބަރާއި ކޮޕީ، އެޑްރެސް އަދި ގުޅޭނެ ނަންބަރެއް ލޯގޯއާ އެކު ހުށަހަޅަންޖެހެއެވެ.
އައްޑޫ އެކުއެޓޯރިއަލް ހޮސްޕިޓަލް (އޭ.އީ.އެޗް) އަކީ މާލެ ފިޔަވައި ރާއްޖޭގެ އެހެންތަނެއްގައި ޓާޝާރީ ހޮސްޕިޓަލްފެންވަރުގައި ތަރައްގީ ކުރެވިގެންދާ ފުރަތަމަ ހޮސްޕިޓަލެވެ. މި މަޝްރޫއަކީ ކުރީގެ ރައީސް ޔާމީންގެ ދައުރުގައި ފެށި މަޝްރޫއެކެވެ. މިހާރު ހޮސްޕިޓަލް ރަސްމީކޮށް ހުޅުވުމުގެ އެންމެ ފަހުގެ ތައްޔާރީތައް ވަމުން އަންނަ ކަމަށް ހެލްތް މިނިސްޓްރީން ވަނީ މައުލޫމާތު ދީފައެވެ.
