ޕީޖީ އޮފީހުގެ ލަފައަކަށް ޑރ. ޝަހީމްގެ މައްސަލަ އިތުރަށް ތަހުގީގުކުރުމަށް ފުލުހުންނަށް ހުށައަޅައިފި

ޑރ. މުހައްމަދު ޝަހީމް އަލީ ސައީދުގެ މައްޗަށް ދައުވާކޮށްދިނުމަށް އެދި މަރާލައިފައިވާ މީހުންނާއި ގެއްލުވާލައިފައިވާ މީހުންގެ މައްސަލަތައް ބަލާ ކޮމިޝަނުން ޕްރޮސިކިއުޓަރ ޖެނެރަލްގެ އޮފީހަށް ފޮނުވި މައްސަލަ ފުލުހުންނަށް ހުށައަޅައިފިއެވެ.

އެ ކޮމިޝަނުން ބަލަމުން ގެންދިޔަ ޑރ. އަފްރާޝީމްގެ މަރުގެ މައްސަލާގެ ތަހުގީގަށް ޑރ. ޝަހީމް ދޮގު މައުލޫމާތު ދެއްވާފައިވާތީ އާއި، ތަހުގީގަށް ހުރަސް އަޅުއްވާފައިވާތީވެ، އެ މައްސަލާގައި ޑރ. ޝަހީމުގެ މައްޗަށް ދައުވާ ކޮށްދެއްވުމަށް އެދި ޕީޖީ އޮފީހަށް ފޮނުވާފައިވާއިރު، އެ މައްސަލަ އިތުރަށް ތަޙުޤީޤު ކުރުމަށް ފުލުހުންނަށް ހުށައަޅާފައިވަނީވެސް ޕީޖީ އޮފީހުގެ ލަފައަކަށެވެ.

އަދި އެ މައްސަލަ މިހާރު ފުލުހުން ދަނީ ތަޙުޤީޤު ކުރަމުންނެވެ.

17 ނޮވެމްބަރު 2019 ގައި ރައްޔިތުންގެ މަޖިލީހުގެ ޖަލްސާގައި ޑރ. އަފްރާޝީމް އަލީގެ މަރުގެ ރިޕޯޓުގެ ހުލާސާ އިއްވާފައިވާއިރު ރައްޔިތުންގެ މަޖިލީހުގެ ރައީސް ވިދާޅުވީ މަރު ކޮމިޝަނަށް ފޮނުއްވެވި ސިޓީގައި ޑރ. އަފްރާޝީމް ރަހުމުކުޑަގޮތަކަށް މަރާލި ދުވަހު އިސްލާމިކް މިނިސްޓްރީއަށް ވަޑައިގެންނެވީ އެމަނިކުފާނަށް އެނގިވަޑައިގެން ނޫންކަމަށް ވިދާޅުވިޔަސް، އެ ދެ ބޭފުޅުންގެ ތެރޭގައި ބަދަލުކުރެވުނު އެސްއެމްއެސްތަކުން އެއީ ދޮގެއްކަން ހާމަވެގެންދާ ކަމަށެވެ.

ޑރ. ޝަހީމަކީ އަފްރާޝީމް މަރާލި ދުވަސްވަރު، އޭރުގެ ސަރުކާރުގެ އިސްލާމިކް މިނިސްޓަރގެ މަގާމުގައި ހުންނެވި ބޭފުޅާއެވެ.