އީރާނުން އިރާޤުގެ ދެ ޞަރަޙައްދަކަށް ދިން މިސައިލް ޙަމަލާތަކަކީ، އިރާޤުގައި ޙަރަކާތްތެރިވާ އެމެރިކާގެ ފައުޖުތަކަށް ނުވަތަ އަސްކަރީންނަށް ޢަމާޒުކޮށް ދިން ޙަމަލާއެއް ނޫންކަމަށް އިރާންގެ އަސްކަރީ ކޮމާންޑަރ، ޖެނެރަލް އާމިރު އަލީ ހާޖީޒާދާ ވިދާޅުވެއްޖެއެވެ.

އީރާނުގެ ދައުލަތުގެ މީޑިއާއަށް ފާރްސް އަށް ދެއްވި ޚާއްޞަ ބަސްދީގަތުމެއްގައި ޖެނެރަލް އާމިރު ވިދާޅުވީ، އެއްވެސް ޙާލަތެއްގައި އީރާނުގެ ޙަމަލާއަކީ އެމެރިކާ ވަކި ވަކި ސިފައިން ނުވަތަ، އިރާޤުގައި ރުކުރުވާލާ އެމެރިކާގެ އަސްކަރީން ނުވަތަ ފައުޖުތައް މަރަން ދިން ޙަމަލާއެއް ނޫންކަމަށެވެ. އަދި ޙަމަލާއަކީ އެމެރިކާގެ އަސްކަރީ ބާރު މެދުއިރުމަތީ ޞަރަޙައްދުގައި ކަނޑުވާލުމުގެ ބޭނުމުގައި ދިން ޙަމަލާއެއްކަމަށެވެ. ޚާއްޞަ ގޮތެއްގައި، އެމެރިކާއިން ޖާސޫސް ކުރުމަށް ގެންގުޅޭ މެޝީނަރީޒްތަކާއި، މަރުކަޒުކޮށްފައިވާ ތަންތަން ފުނޑާލުމަކީ މިސައިލް ޙަމަލާއެއް މައިގަނޑު އެއްބޭނުމުގެ ގޮތުގައި ޖެނެރަލް ފާހަގަކޮށްފައިވެއެވެ.

ޖެނެރަލް އާމިރު ވިދާޅުވީ، އީރާނުގެ ސަލާމަތީ ބާރުތަކުގެ އިސްވެރިޔާ ޤާސިމް ސުލައިމާނީ އަވަހާރަކޮށްލަން އެމެރިކާއިން ދިން ޙަމަލާގެ، ރައްދުގައި އީރާނުން ދިން މިޙަމަލާއަކީ އެމެރިކާގެ ވަސް މެދުއިރުމަތީ ޞަރަޙައްދުން ފޮހެލުމުގެ ބޭނުމުގައި ދިން ޙަމަލާއެއް ކަމަށެވެ. އަދި މި ރައްދު ޙަމަލާތައް ދެމެހެއްޓެނިވި ގޮތެއްގައި ދޭނެކަމަށެވެ.

އީރާނުން ވަނީ ސިލްސިލާ ގޮތެއްގައި މިސައިލް ޙަމަލާތައްދޭ ޚާއްޞަ އޮޕަރޭޝަނެއް ބުދަ ދުވަހު ލޯންޗުކޮށްފައެވެ. ތައްޔާރީ ޙާލަތުގައި އެތައް ސަތޭކަ މިސައިލެއް އޮތް އިރު، އެމެރިކާއިން ދީފާނެ ސައިބަރ ޙަމަލާ، އަސްކަރީ ވައިގެ ޙަމަލާ އަދި ޑްރޯން ޙަމަލާ ނެވިގޭޝަން ސިސްޓަމް ހަލާކުކޮށްލުމަށްވެސް އީރާނުން ވަރަށް ފުރިހަމަޔަށް ތައްޔާރުވެފައިވާކަމަށް ޖެނެރަލް އާމިރުގެ ބަޔާނުގައި ވިދާޅުވެފައިވެއެވެ.