ކ. ކަގި ފަރަށް އެރި މުދާ އުފުލާ ދޯންޏެއްގެ ކެޕްޓަން ގެއްލުނު މައްސަލަ ފުލުހުން ތަހުޤީޤު ކުރަން ފަށައިފިއެވެ.

ފުލުހުން އެމައްސަލަ މިހާރު ބަލަމުން ދާއިރު އެ މައްސަލަ ފުލުހުންނަށް ހުށަހަޅާފައިވަނީ އެމްއެންޑީއެފުން ކަމަށް ފުލުހުން މަޢުލޫމާތު ދެއެވެ. ގެއްލިގެން ހޯދަމުންދަނީ މުޙައްމަދު ޔޫސުފް ނަމަކަށް ކިޔާ 37 އަހަރުގެ ދިވެއްސެކެވެ.

މި ޙާދިސާގައި އެދޯނީގައި ހުރި މީހާ ގެއްލިގެން އުޅޭ ކަމުގެ ރިޕޯޓު ލިބުނީ ހޯމަ ދުވަހުގެ ހެނދުނު 8:09 ގައި ކަމަށް އެމްއެންޑީއެފުން ވަނީ ބުނެފައެވެ. އަދި އޭނާ ގެއްލުނުއިރު އޭނާ ގެންގުޅުނު ދަބަހާއި، ފޯނު ދޯނީގައި އޮތް ކަމަށް ވެސް އެމްއެންޑީއެފުން ވަނީ މަޢުލޫމާތު ދީފައެވެ.

އެމްއެންޑީއެފުން ބުނީ ފަރަށް އެރި "ޓީޓީއެސް ފާން" ނަމަކަށް ކިޔާ މިދޯނީގަ ދެން ތިބީ ދެ ބިދޭސީން ކަމަށެވެ.

37 އަހަރުގެ މީހަކު ގެއްލިގެން ހޯދަމުންދާއިރު، މިމަހުގެ 02 ވީ ބުރާސްފަތި ދުވަހުގެ ރޭ ބ. ދޮންފަނު ކައިރިން ޑިންގީއަކާއި ލޯންޗެއް ޖެހި ހިނގި އެކްސިޑެންޓުގައި ޑިންގީން ގެއްލުނު މީހާ އަދިވެސް ނުފެނެއެވެ.