މޯލްޑިވްސް ބާސްކެޓްބޯލް އެސޯސިއޭޝަން (އެމްބީއޭ) އިން އިންތިޒާމުކޮށްގެން ބާއްވާ 14 ވަނަ ޤައުމީ ބާސްކެޓްބޯޅަ ލީގުގައި ބައިވެރިވުމުގެ ފުރުސަތު ހުޅުވައިލައިފިއެވެ.

އެމްބީއޭއިން ބުނީ މިމަހުގެ 26 ވަނަ ދުވަހު ބޭއްވުމަށް ހަމަޖެހިފައިވާ 14 ވަނަ ޤައުމީ ބާސްކެޓް ބޯޅަ ލީގުގެ ފިރިހެން (1 ވަނަ ޑިވިޝަން) އަދި އަންހެން ޑިވިޝަނުގައި ބައިވެރިވުމަށް ބޭނުންވާ ކްލަބުތަކާއި ޖަމްޢިއްޔާތަކަށް ބައިވެރިވުމުގެ ފުރުޞަތު ޢާންމުކޮށް ހުޅުވާލާފައިވާކަމަށެވެ.

އެގޮތުން، މި މުބާރާތުގައި ބައިވެރިވާން ބޭނުންވާ ކްލަބުތަކާއި ޖަމްޢިއްޔާތަކުން 9 ޖަނަވަރީ 2020 ވާ ބުރާސްފަތި ދުވަހުގެ 13:00 ގެ ކުރިން އެމްބީއޭއަށް ލިޔުމަކުން އެންގުމަށް އެދޭކަމަށެވެ. އަދި ޓީމު ލިސްޓު 21 ޖަނަވަރީ 2020 ވާ އަންގާރަ ދުވަހުގެ 11:00 ގެ ކުރިން އެސޯސިއޭޝަނުގެ މެއިލް ކުރުމަށްވެސް އެމްބީއޭއިން ވަނީ އެދިފައެވެ. އެމްބިއޭއިން އިތުރަށް ބުނެފައިވަނީ، ޓީމު ލިސްޓުގެ އަސްލު ހުށަހެޅުމަށް ހަމަ އެދުވަހުގެ 14:00 ގެ ކުރިން ބޭއްވުމަށް ހަމަޖެހިފައިވާ ގުރުއަތުލުމުގެ ޖަލްސާއަށް ބައިވެރިވުމަށް އަންނަ ޓީމުތަކުގެ މެނޭޖަރުން ގެނައުމަށެވެ.

14 ވަނަ ޤައުމީ ބާސްކެޓް ބޯޅަ ލީގު (ފިރިހެން 1 ވަނަ އަދި އަންހެން ޑިވިޝަން) ގައި ޓިމުތަކުގައި ބިދޭސީ ކުޅުންތެރިން ހިމަނަން ބޭނުންވާ ޓީމުތަކަށް އެފަދަ ކުޅުންތެރިން ހިމެނުމުގެ އެންމެ ފަހު ތާރީޚެއްގެ ގޮތުގައި އެމްބީއޭއިން ދީފައިވާ ސުންގަޑިއަކީ، 21 ޖަނަވަރީ 2020 ގެ 14:00 އެވެ.

14 ވަނަ ޤައުމީ ބާސްކެޓްބޯޅަ ލީގު ބައިވެރިވުމުގެ ފުރުސަތު އޮންނާނީ 01 ޖަނަވަރީ 2020 ކުރިން ކޮމިޝަނަރ އޮފް ސްޕޯރޓްގައި ރަޖިސްޓްރީވެފައިވާ އަދި އެ އެސޯސިއޭޝަނަށް ކާމާއިގުޅޭ ލިޔުންތައް ހުށަހަޅާފައިވާ ކްލަބުތަކަށާއި ޖަމްޢިއްޔާތަކަށް ކަމަށް މޯލްޑިވްސް ބާސްކެޓްބޯލް އެސޯސިއޭޝަން (އެމްބީއޭ) އިން ބުނެއެވެ.