އިނގިރޭސި ޕްރިމިއާ ލީގުގައި ވަރުގަދަ މެންޗެސްޓާ ޔުނައިޓެޑް ބަލިކޮށް އާސެނަލްއިން ލީގު ތާވަލުގެ 10 ވަނައަށް ޖެހިލައިފިއެވެ.

އާސެނަލް ދަނޑުގައި ކުޅުނު މި މެޗު އާސެނަލްއިން ކާމިޔާބުކުރީ 2-0 ގެ ނަތީޖާއަކުންނެވެ.

މެޗު ފަށައިގެން އާސެނަލްއިން ވަނީ ޔުނައިޓެޑްގެ ގޯލަށް ނުރައްކާ ކޮށްފައެވެ. އެގޮތުން މެޗުގެ 8 ވަނަ މިނެޓުގައި އާސެނަލްއިން ވަނީ ލަނޑު ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ ނިކޮލަސް ޕެޕޭއެވެ. މި ލަނޑާއެކު ވެސް އާސެނަލްއިން ވަނީ ޔުނައިޓެޑްގެ ގޯލަށް ނުރައްކާ ކޮށްފައެވެ. އެގޮތުން މެޗުގެ 32 ވަނަ މިނެޓުގައި އާސެނަލްގެ ލެކަޒެޓް އަށްވަނީ ލަނޑު ޖަހަން ރަނުގެ ފުރުސަތެއްލިބި ބޭކާރުވެފައެވެ. ޔުނައިޓެޑްގެ ދެ ކުޅުންތެރިންގެ ކައިރިން ނައްޓާލުމަށްފަހު އޭނާ ފޮނުވާލި ބޯޅަ ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ. އަދި މެޗުގެ 38 ވަނަ މިނެޓުގައި އާސެނަލްގެ ޕެޕޭ އޭރިޔާ ބޭރުން ފޮނުވައިލި ބޯޅަ ގޯލުގެ އަރިމަތީ ދަނޑިއަށް އަމާޒުވިއިރު، މެޗުގެ 42 ވަނަ މިނެޓުގައި އާސެނަލްއިން ވަނީ ލަނޑު ޖަހައި ލީޑު ފުޅާ ކޮށްފައެވެ. މި ލަނޑު އެޓީމަށް ކާމިޔާބު ކޮށްދިނީ ސްކޮރާޓިސްއެވެ.

މެޗުގެ ދެވަނަ ހާފު ފަށައިގެން ދެޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔައިރު މިހާފުގައި ޔުނައިޓެޑް ކުޅުންތެރިން ކުރިޔަށްޖެހި ލަނޑު ޖަހަން ފުރުސަތު ތަނަވަސްކުރިއެވެ. އެގޮތުން މެޗުގެ 72 ވަނަ މިނެޓުގައި ޔުނައިޓެޑްގެ ގްރީންވުޑް ފޮނުވާލި ބޯޅަ އާސެނަލްގެ ކީޕަރު ވަނީ ދިފާއު ކޮށްފައެވެ.

މި ނަތީޖާއާއި އެކު އާސެނަލްއިން ވަނީ ކުޅުނު 21 މެޗުން ލިބުނު 27 ޕޮއިންޓާއިއެކު ލީގު ތާވަލުގެ 10 ވަނައަށް ޖެހިލައިފައެވެ. ލީގު ތާވަލުގެ އެއްވަނައިގައި އޮތް ލިވަރޕޫލަށް 19 މެޗުން 55 ޕޮއިންޓް ލިބިފައިވާއިރު ދެވަނައިގައި ލެސްޓާ ސިޓީ އޮތީ ކުޅުނު 21 މެޗުން ލިބުނު 45 ޕޮއިންޓާއެކުގައެވެ. މި މެޗުން ބަލިވި ޔުނައިޓެޑް އޮތީ ލީގު ތާވަލުގެ ފަސްވަނައިގައެވެ. އެޓީމަށް ވަނީ ކުޅުނު 21 މެޗުން 31 ޕޮއިންޓް ލިބިފައެވެ.