ސަތިޔަމޭވް ޖަޔަތޭ ދޭއްގެ މަސައްކަތް އޭޕްރީލް މަހު ފަށަނީ
2 ޖެނުއަރީ 2020 | ބުރާސްފަތި 03:13ފިލްމުގެ ދެވަނަ ބައިވެސް ޑައިރެކްޓްކުރަނީ މިލަފް
ސަތިޔަމޭވް ޖަޔަތޭ 2 ގެ ދެ ޕޯސްޓަރެއް
ކޮރަޕްޝަނާ ދެކޮޅަށް ފުލުހަކު ކުރާ ހިތްވަރުގަދަ މަސައްކަތްތައް ދައްކުވައިދޭ ފިލްމު "ސަތިޔަމޭވް ޖަޔަތޭ" ގެ ދެވަނަ ބައި ހެދުމުގެ މަސައްކަތް އޭޕްރީލް މަހު ފަށަން ހަމަޖެހިފައިވާ ކަމަށް ފިލްމުގެ ޑައިރެކްޓަރ މިލަޕް ޒަވޭރީ ހާމަކޮށްފި އެވެ.
ފިލްމާއި ބެހޭ ގޮތުން އިންޑިއާގެ ނޫހަކަށް ދިން އިންޓަވިއުއެއްގައި މިލަޕް ބުނީ، ފުރަތަމަ ފިލްމުގައި ހަމައެކަނި ކޮރަޕްޝަނާ ދެކޮޅަށް މަސައްކަތް ކުރާތަން ފެނިގެން ދިޔަސް، ދެވަނަ ބައިގައި ހުރިހާ މުއައްސަސާތަކެއްގައި އަށަގަނެފައިވާ ކޮރަޕްޝަން ނައްތާލުމަށް ހިތްވަރުގަދަ ފުލުހަކު ކުރާ މަސައްކަތް ފެންނާނެ ކަމަށެވެ.
ޖޯން އަބްރަހަމް ފުލުހެއްގެ ރޯލުން ފެނިގެންދާ މި ފިލްމު ރިލީޒްކުރަން ހަމަޖެހިފައިވަނީ އޮކްޓޯބަރު މަހުގެ ދެވަނަ ދުވަހުއެވެ.
މިލަޕް ބުނީ، މި ފަހަރުގެ ފިލްމުގައި ބެލުންތެރިންނަށް ފެނިގެންދާނީ ފުލުސް އޮފިސަރު ކިތަންމެ މުސްކުޅިވިޔަސް އިންސާފު ހޯދައިދިނުމަށް އޭނާގެ ހުރި ހުށިޔާރުކަން ކަމަށެވެ. މިލަޕް އެންމެ ފަހުން ޑައިރެކްޓް ކޮށްފައިވަނީ މަރްޖަވާން އެވެ. ސަތްޔަމަވޭ ޖަޔަތޭވްގެ ޕޯސްޓަރު އާއްމުކޮށްފައިވަނީ އޮކްޓޫބަރު މަހު އެވެ. މި ފަހަރުގެ ފިލްމުގައި ވެސް ބަތަލުގެ ރޯލުން ފެނިގެންދާނީ ޖޯން އަބްރަހަމް އެވެ.
ޖޯން އާއެކު ބަތަލާގެ ރޯލުން ފެނިގެންދާނީ ދިވްޔާ ކުމާރް ހޯސްލާ އެވެ. ދިވްޔާ އަކީ މިހާރު ޓީސީރީޒްގެ ވެރިޔާ ބުޝަން ކުމާރުގެ އަންހެނުންނެވެ.
މިދިޔަ އަހަރު ނެރުނު ކާމިޔާބު ފިލްމު "ސަތިޔަމޭވް ޖަޔަތޭ" ގެ ލީޑު ބަތަލާއެއްގެ ގޮތުގައި ފެނިގެންދިޔައީ އައިޝާ ޝަރުމާއެވެ.
