ޔޫވީ އަތުން ދަ ގްރާންޑޭއަށް ޕޮއިންޓެއް

ދިރާގު ދިވެހި ޕްރިމިއަރ ލީގުގަ ދަ ގްރާންޑޭ ސްޕޯޓްސް ކްލަބާއި، ޔުނައިޓެޑް ވިކްޓްރީ ބައްދަލުކުރި މެޗު އެއްވަރުވެގެން ނިމިއްޖެއެވެ.

ގަލޮޅު ރަސްމީ ފުޓުބޯޅަ ދަނޑުގައި ކުޅުނު މި މެޗު ނިމިގެންދިޔައީ 1-1 ގެ ނަތީޖާއަކުންނެވެ.

މި މެޗު ފަށައިގެން ދެ ޓީމުގެ ފަރާތުން އާދައިގެ ކުޅުމެއް ފެނިގެންދިޔައިރު ދެ ޓީމުންވެސް ގެންދިޔައީ ލަނޑު ޖަހާނެ ފުރުސަތުތައް ތަނަވަސް ކުރަމުންނެވެ. އެގޮތުން މެޗުގެ 19 ވަނަ މިނެޓުގައި ދަ ގްރާންޑޭއިން ވަނީ ލަނޑު ޖަހާ މެޗުގެ ލީޑު ނަގާފައެވެ. މި ގޯލު އެޓީމަށް ކާމިޔާބުކޮށްދިނީ ފޯވަރޑް އަހުމަދު އިމާޒް (އާއްކޮ) އެވެ. ނަމަވެސް މި ލަނޑާއެކު ޔޫވީއިން އެޓީމުގެ ކުޅުން ރަނގަޅު ކުރިއިރު އެޓީމަށް ވަނީ ލަނޑު ޖަހަން ރަނުގެ ފުރުސަތެއް ލިބި ބޭކާރުވެފައެވެ. އެގޮތުން ޔޫވީގެ އަލީ ހައިޝަމް (ޗުމްޕު) ބޮލުން ފޮނުވާލި ބޯޅަ ގްރާންޑޭ ކުޅުންތެރިއެއްގެ ގައިގަ ޖެހިފަ އަމާޒުވީ ގޯލުގެ ހުރަސް ދަނޑިއަށެވެ.

ދެވަނަ ހާފު ފަށައިގެން ގްރާންޑޭއިން މޮޅަށް ކުޅުނުއިރު މެޗުގެ 50 ވަނަ މިނެޓުގައި އަހުމަދު އަޔާޒް (އަޔާ) ވަނީ ނުރައްކާތެރި ހަމަލާއެއް ފޮނުވާލާފައެވެ. ނަމަވެސް އޭނާ ފޮނުވާލި ބާރު ހަމަލާ ގޯލާ އަމާޒު ނުވެ ދިޔައީ ބޭރަށެވެ. މެޗުގެ 72 ވަނަ މިނެޓުގަ ޔޫވީގެ ޗުމްޕު އަށް ވަނީ ރަނގަޅު ފުރުސަތެއް ލިބި ބޭކާރުވެފައެވެ. އޭނާ ފޮނުވާލި ހަމަލާ ގްރާންޑޭގެ ކީޕަރު ފައިސަލް ވަނީ ހުށިޔާރުކަމާއެކު ދިފާއުކޮށްފައެވެ. މެޗުގެ 83 ވަނަ މިނެޓުގައި ޔޫވީން ވަނީ ލަނޑު ޖަހާ ނަތީޖާ ހަމަހަމަ ކޮށްފައެވެ. މި ލަނޑު އެޓީމަށް ކާމިޔާބުކޮށް ދިނީ ބަދަލު ކުޅުންތެރިޔާ ސިލިޗްއެވެ.

މި މެޗުން ލިބުނު ޕޮއިންޓާއެކު ދަ ގްރާންޑޭއިން ވަނީ ތާވަލުގެ ފަސްވަނައަށް ޖެހިލާފައެވެ. ދަ ގްރާންޑޭއަށް 15 މެޗުން 20 ޕޮއިންޓް ލިބިފައިވާއިރު ތާވަލުގެ އެއްވައިނައިގަ އޮތް މާޒިޔާއަށް 15 މެޗުން 38 ޕޮއިންޓް ލިބިފައިވެއެވެ.