ބާންލީ ބަލިކޮށް ޔުނައިޓެޑުން ގަދަ ހަތަރަކަށް އެރުމުގެ އުންމީދު އާކޮށްފި

އިނގިރޭސި ޕްރިމިއަރ ލީގުގަ ބާންލީ އަދި މެންޗެސްޓަރ ޔުނައިޓެޑް ބައްދަލުކުރި މެޗު ޔުނައިޓެޑުން ކާމިޔާބުކޮށް ލީގު ތާވަލުގެ ގަދަ ހަތަރަކަށް އެރުމުގެ އުންމީދު ޔުނައިޓެޑުން އާކޮށްފިއެވެ.

ބާންލީ ދަނޑުގައި ކުޅުނު މި މެޗު ޔުނައިޓެޑުން ކާމިޔާބުކުރީ 2-0 ގެ ނަތީޖާ އަކުންނެވެ.

މެޗު ފަށައިގެން ދެ ޓީމަށްވެސް މޮޅު އެޓޭކިންގ ގޭމެއް ކުޅެމުން ގެންދިޔައިރު މެންޗެސްޓަރ ޔުނައިޓެޑުން ވަނީ ފުލުފުލުގައި ބާންލީގެ ގޯލަށް ހަމަލާތައް ފޮނުވައިލާފައެވެ. އެގޮތުން މެޗުގެ 19 ވަނަ މިނެޓުގައި މާކަސް ރަސްފޯޑަށް ވަނީ ނުރައްކާތެރި ހަމަލާއެއް ބާންލީގެ ގޯލަށް ފޮނުވާލާފައެވެ. އޭނާ ފޮނުވާލި ހަމަލާ އަމާޒުވީ ގޯލުގެ އަރިމަތީ ދަނޑިއަށެވެ. މި ހާފުގައި ޔުނައިޓެޑުން ފޮނުވާލި ގިނަ ހަމަލާތަކުގެ ހުރަހަކަށް ވެގެންދިޔައީ ބާންލީގެ ޑިފެންޑަރުންނެވެ. މި މެޗުގެ 44 ވަނަ މިނެޓުގައި މެންޗެސްޓަރ ޔުނައިޓެޑުން ވަނީ ލަނޑު ޖަހާ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ އެންތަނީ މާޝަލް އެވެ.

މި މެޗުގެ ފުރަތަމަ ހާފު ނިމިގެންދިޔައީ 1-0 ގެ ނަތީޖާ އަކުންނެވެ.

މެޗުގެ ދެވަނަ ހާފު ފަށައިގެން ދެޓީމުގެ ފަރާތުން ވެސް ހަމަހަމަ ކުޅުމެއް ފެނިގެންދިޔައިރު، މެޗުގެ 58 ވަނަ މިނެޓުގައި ބާންލީގެ ޑިވިޓް ފޮނުވާލި ހަމަލާ ގޯލާ އަމާޒުނުވެ ދިޔައީ ބޭރަށެވެ. އަދި މެޗުގެ 60 މިނެޓުގައި ޔުނައިޓެޑްގެ މާކަސް ރަޝްފާޑް ފޮނުވާލި ހަމަލާ ބާންލީގެ ކީޕަރު ވަނީ ހުށިޔާރު ކަމާއިއެކު ދިފާއުކޮށްފައެވެ.

މި މެޗުގެ އިތުރު ވަގުތުގައި ޔުނައިޓެޑުން ވަނީ އިތުރު ލަނޑެއް ޖަހާ ލީޑު ފުޅާ ކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ މާކަސް ރަޝްފޯޑްއެވެ.

މި ނަތީޖާ އާއެކު ޔުނައިޓެޑުން ވަނީ ތާވަލުގެ ފަސްވަނައަށް ޖެހިލާފައެވެ. ޔުނައިޓެޑުން ތާވަލުގެ ފަސްވަނައިގަ އޮތީ ލިބުނު 31 ޕޮއިންޓާއެކުގައެވެ. ލީގުގެ އެއްވަނައިގަ އޮތް ލިވަރޕޫލަށް 52 ޕޮއިންޓް ލިބިފައިވާއިރު ދެވަނައިގައި އޮތް ލެސްޓަރ ސިޓީއަށް ލިބިފައިވަނީ 42 ޕޮއިންޓެވެ. އަދި މެޗުން ބަލިވި ބާންލީ އޮތީ ލިބުނު 24 ޕޮއިންޓާ އެކު ލީގު ތާވަލުގެ 13 ވަނައިގައެވެ.