ބަންގްލަދޭޝްގެ މަޝްހޫރު އަންހެން ރާޅާ އެޅުންތެރިޔާ އައިޝާގެ ދިރިއުޅުމުގެ މައްޗަށް ބިނާކޮށް ހެދި ފިލްމު "ނޮޑޮރައި" ދެއްކުން މަނާކުރުމަށް އެ ޤައުމުގެ ހައި ކޯޓަށް ޕެޓިޝަނެއް ހުށަހަޅައިފިއެވެ.
އިސްލާމްދީނުގެ އާދަކާދަތަކާއި ނުގުޅޭ ނުވަތަ ދީނަށް ފުރައްސާރަ ކުރާ ކަންތައްތަކެއް އެ ފިލްމުގައި ހިމެނޭ ކަމަށް ބުނެ ފިލްމު މަނާކުރުމަށް ޕެޓިޝަނެއް ހައިކޯޓަށް ހުށަހަޅާފައިވަނީ އެގައުމުގެ ސުޕްރީމް ކޯޓުގެ ލޯޔަރ އެއްކަމަށްވާ ހުއްޒަތުލް އިސްލާމެވެ. ޕެޓިޝަން ހުށަހަޅާފައިވަނީ އެފިލްމަށް ދީފައިވާ ސެންސަރ ސެޓްފިކެޓް ކެންސަލް ކުރުމަށެވެ. އިސްލާމް ރޮއިޓަރސް އަށް މައުލޫމާތު ދެމުން ބުނެފައިވަނީ އެމީހުން ބޭނުންވަނީ އެ ގައުމުގެ ސެންސަރ ބޯޑުން ފިލްމަށް ދީފައިވާ ސެޓްފިކެޓް ކެންސަލްކޮށް ފިލްމު ދެއްކުން ހުއްޓުވުމަށެވެ. އަދި ފިލްމު އުފެއްދި މީހުން މަޢާފަށް އެދުމަށްވެސް އެދޭކަމަށް އިސްލާމް ބުނެފައިވެއެވެ.
ފިލްމުގެ ޕްރޮޑިޔުސަރު މެހެބޫބް ރަހުމާން ރޮއިޓަރސް އަށް މައުލޫމާތު ދެމުން ބުނެފައިވަނީ އެފިލްމަށް ދީފައިވާ ސެންސަރ ސެޓްފިކެޓް ކެންސަލް ކޮށްފައި ނުވާ ސަބަބު އަންނަ މަހުގެ ނިޔަލަށް ހައިކޯޓަށް ހާމަކޮށްދޭންޖެހޭކަމަށެވެ.
ނޮވެމްބަރ 29 ވަނަ ދުވަހު ރިލީޒް ކޮށްފައިވާ މިފިލްމަކީ ބަންގްލަދޭޝްގެ ގެ އަންހެންކުއްޖެއް ކަމަށްވާ އައިޝާ ރާޅާއެޅުމަށް އުފެދިފައިވާ ޝައުގުވެރިކަމާއެކު އެކަން ކުރުމަށް އޭނާ ކުރަމުންދާ މަސައްކަތްތަކާއި އެކަމަށް އޭނާއަށް ދިމާވާ ގޮންޖެހުންތައް ދައްކުވައިދޭ ފިލްމެކެވެ. އަދި މިކަމުގެ ތެރޭގައި އޭނާއަށް ޅައުރުމުގައި ކައިވެނި ކުރަން މަޖުބޫރު ވެގެންދެ އެވެ.
މިފިލްމަކީ ބަންގްލަދޭޝްގެ އަންހެން ރާޅާ އެޅުންތެރިންނާއި ފަގީރުކަމާއި އަންހެނުންނާ މެދު އެގައުމުގައި ގެންގުޅޭ ތަފާތުކުރުންތައް ދައްކުވައިދޭ ގޮތަށް އެގައުމުގައި އުފައްދާފައިވާ މިފަދަ ފުރަތަމަ ފިލްމެވެ. ފިލްމު ދެއްކުން މަނާކުރުމަށް ގޮވާލާ ފިލްމަށް ފާޑުކިޔާ މީހުން ބުނަމުންދަނީ މިފިލްމުގައި އައިޝާ ބިކިނީ ލައިގެން އުޅޭ މަންޒަރު ދައްކުވައިދޭ ކަމަށެވެ. ނަމަވެސް ފިލްމުގެ ޕްރޮޑިޔުސަރ ރަހްމާން ބުނަނީ ފިލްމުގައި އެފަދަ މަންޒަރެއް ނުހިމެނޭ ކަމަށާއި އެފަދަ ވާހަކަތައް ދައްކާ މީހުން ވާހަކަ ދައްކަނީ ފިލްމު ނުވެސް ބަލާކަމުގަ އެވެ.
އަންހެނުން ރާޅާ އެޅުމަކީ ބަންގްލަދޭޝްގައި އާންމު ކަމެއް ނޫނެވެ. ކުޑަކުދިންނާ ކައިވެނި ކުރުމަކީ ބަންގްލަދޭޝްގައި މަނާ ކަމެއް ނަމަވެސް ބަންގްލަދޭޝްގެ 18 އަހަރުން ދަށުގެ ކުދިންގެ ދެބައި ކުޅަ އެއްބައި ކުދިންނަނީ އުމުރުން 18 އަހަރު ވުމުގެ ކުރިން ކައިވެނި ކުރުމަށް މަޖުބޫރުވެ ކައިވެނިކުރާ ކުދިންކަމަށް އދ އިން ބުނެއެވެ.