މޯލްޑިވްސް ރިފޯމް މޫވްމަންޓް (އެމްއާރުއެމް) ސިޔާސީ ޕާޓީއެއްގެ ގޮތުގައި ރަޖިސްޓްރީ ކުރިކަމުގެ ލިޔުން ހަވާލުކޮށްފިއެވެ.

ހޯމަ ދުވަހު އިލެކްޝަން ކޮމިޝަނުގައި ބޭއްވި ބައްދަލުވުމުގައި ވަނީ ރަޖިސްޓްރީ ހަވާލުކޮށްފައެވެ.

މި ބައްދަލުވުމުގައި ވާހަކަ ދައްކަވަމުން އިލެކްޝަންސް ކޮމިޝަނުގެ ރައީސް އަހުމަދު ޝަރީފް ވަނީ ޤާނޫނީ އިމުގެ ތެރެއިން ޕާޓީހިންގުމަށާއި، އިސްލާމީ މިންގަނޑުތަކާއި އެއްގޮތަށް ޕާޓީގެ ހަރަކާތްތައް ހިންގުމަށް އިލްތިމާސްކުރައްވާފައެވެ.

އެމްއާރުއެމަކީ ރައީސް މައުމޫން އިސްވެ ހުންނަވާ އުފެއްދެވި ތިން ވަނަ ސިޔާސީ ޕާޓީ އެވެ. އެގޮތުން އެންމެ ފުރަތަމަ އުފައްދަވާފައިވަނީ، ދިވެހި ރައްޔިތުންގެ ޕާޓީ (ޑީއާރުޕީ) އެވެ. ނަމަވެސް 2008 ވަނަ އަހަރުގެ ރިޔާސީ އިންތިޚާބު ނާކާމިޔާބުވެ ވަޑައިގެންނެވުމާއި، ޕާޓީގެ ތެރޭގައި ޚިޔާލު ތަފާތުވުންތައް އުފެދި، ޑީއާރުޕީގެ ތެރޭގައި "ޒެޑް ފެކްޝަން"އެއް އުފެދި، އެންމެފަހުން، ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އެފެއްދެވި އެވެ.

ޕީޕީއެމް އުފެދުމާއެކު، ޑީއާރުޕީގައި އިސްކޮށް އުޅުއްވި ގިނަ ބޭފުޅުންނާއި ކުރީގެ ރައީސް އަބްދުﷲ ޔާމީން އުފެއްދެވި ޕީޕަލްސް އެލަޔަންސް (ޕީއޭ)ގައި އިސްކޮށް އުޅުއްވި ގިނަ ބޭފުޅުން ޕީޕީއެމާ ގުޅި، ޕީޕީއެމް ސިޔާސީ ގޮތުން ވަރުގަދަ ކޮށްފައި ވެއެވެ. އެގޮތުން 2013 ވަނަ އަހަރުގެ ރިޔާސީ އިންތިޚާބުގައި ރައީސް ޔާމީން ރިޔާސީ ކެންޑިޑޭޓަކަށް ނިކުންނަވާ، އިންތިޚާބު ކާމިޔާބު ކުރެއްވިއިރު، ވެރިކަމަށް އަހަރެއް ނުވަނީސް، ޕީޕީއެމްގެ ރައީސް، ރައީސް މައުމޫނާއި، ރައީސް ޔާމީނާއި ދެބޭފުޅުންގެ މެދުގައި މައްސަލަތައް އުފެދެން ފެށިއެވެ. އެންމެފަހުން ރައީސް މައުމޫން ޕީޕީއެމުން ވަކި ކުރެއްވީ އެވެ.

ކުރީގެ ރައީސް މައުމޫން އަބްދުލް ޤައްޔޫމް އިސްނަންގަވައިގެން އުފެއްދެވި އެމްއާރްއެމްގެ އިންތިޤާލީ ރައީސަކީ ވެސް ރައީސް މައުމޫނެވެ. އެމްއާރްއެމް އުފެއްދުމަށް ބޭއްވި ޖަލްސާގައި ވަނީ ޕާޓީގެ ނަމާއި, ލޯގޯ އަދި އަސާސީ ޤަވާއިދު ފާސްކޮށްފަ އެވެ. ޕާޓީގެ ނަމެއްގެ ގޮތުގައި ''ދިވެހި އިސްލާހީ ހަރަކާތް'' ވަނީ ހުރިހާ މެމްބަރުންގެ ޢަޣުލަބިއްޔަތުން ފާސްވެފަ އެވެ.

އެމްއާރުއެމް އުފެއްދުމަށް ބޭއްވި ޖަލްސާ ބާއްވާފައިވަނީ މިމަހުގެ 7 ވަނަ ދުވަހުގެ ރެ އެވެ.