ގައުމީ ފެތުމުގެ މުބާރާތުގެ ޗެމްޕިއަންކަން ނިއުލެގޫންސް ސްވިމިންގ ކްލަބް ހޯދައިފި

ބީއެމްއެލް ގައުމީ 44 ވަނަ ފެތުމުގެ މުބާރާތުގެ ޗެމްޕިއަންކަން ނިއުލެގޫންސް ސްވިމިންގ ކްލަބް ހޯދައިފިއެވެ.

މުބާރާތުގެ އަންހެން އަދި ފިރިހެން ކެޓަގަރީތަކުގެ ޗެމްޕިއަންކަން ނިއުލެގޫންސް ހޯދިއިރު، މިއީ ފިރިހެން ކެޓަގަރީން ނިއުލެގޫންސް ޖެހިޖެހިގެން ޗެމްޕިއަންކަން ހޯދި ފަސްވަނަ ފަހަރެވެ.

މުބާރާތުގެ އިނާމުދިނުން ހޮނިހިރު ދުވަހުގެ ރޭ ޖަމާލުއްދީން ސްކޫލްގައި ބާއްވާފައިވާއިރު، މި ހަފްލާގެ ޝަރަފުވެރި މެހެމާނެއްގެ ގޮތުގައި ބައިވެރިވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ އަނބިކަނބަލުން ފަޒްނާ އަހުމަދުއެވެ.

މީގެއިތުރުން މި ހަފްލާގައި މިނިސްޓަރ އޮފް ޔޫތު ސްޕޯރޓްސް އެންޑް ކޮމިއުނިޓީ އެމްޕަވަރމަންޓް، އަޙްމަދު މަޙުލޫފް އާއި، ކޮމިޝަނަރ އޮފް ސްޕޯރޓްސް އަޙްމަދު ސަލީމްގެ އިތުރުން، ސްޕޯރޓްސް ކައުންސިލްގެ ރައީސް، އިބްރާޙީމް އިސްމާޢީލް ޢަލީ ވަނީ ބައިވެރިވެވަޑައިގަނެފައެވެ.

މި މުބާރާތް ކުރިޔަށް ގެންގޮސްފައިވަނީ 172 ފެތުންތެރިންނާއެކު މި މަހުގެ 16 ވަނަ ދުވަހުން ފެށިގެން 23 ވަނަ ދުވަހުގެ ނިޔަލަށެވެ.