13 އަހަރުގެ ކުއްޖަކު ބަލިވެއިން މައްސަލައިގައި ފިޔަވަޅު އަޅައިދިނުމަށް ވާނީ އެދިފައި: ޖެންޑާ

ކުޑަކުއްޖަކު ބަލިވެއިންކަމުގެ ރިޕޯޓު ލިބުމާއި ގުޅިގެން ޖެންޑަރ މިނިސްޓްރީން ފުރިހަމަ ކުރަންޖެހޭ އިޖުރާޢަތްތައް ވަގުތުން ފުރިހަމަކޮށް ތުހުމަތު ކުރެވޭ ބޮޑެތި މީހުންނާމެދު ފިޔަވަޅު އަޅައިދިނުމަށް އެދިފައިވާނެ ކަމަށް ޖެންޑަރ މިނިސްޓްރީން ބުނެފި އެވެ.

ލަނޑާ ނެގުމުގެ މަސައްކަތްކުރާ ދޯނީގައި އުޅުނު ރ. މަޑުއްވަރީ މީހަކަށް އަނިޔާކޮށް ކަނޑަށް އެއްލާލި މައްސަލަ ހުކުރު ދުވަހު ފެންމަތި ވެފައިވަނިކޮށް، އޭނާ އަކީ އުމުރުން 13 އަހަރުގެ ކުއްޖަކާ ކޯޓުން ބޭރުގައި ކައިވެނިކޮށްގެން އުޅޭ މީހެއް ކަމުގެ މައުލޫމާތު ވަނީ ލިބިފަ އެވެ. އަދި އެ ކުއްޖާ މިފަހުން ބަލިވެ އިނދެ އެ މައްސަލަ ޖެންޑަރއިން ބެލިކަން ވެސް ވަނީ އެނގިފައެވެ.

މިމައްސަލަ ފެންމަތިވުމާއެކު ގިނަ ބައެއްގެ ފާޑުކިޔުން ސޯޝަލް މީޑިޔާގައި ޖެންޑަރ

މިނިސްޓަރަށާއި އެ މިނިސްޓްރީއަށް ވަނީ އަމާޒުވެފައެވެ. މި ފާޑުކިޔުންތައް އަމާޒުވެފައި ވަނިކޮށް އެ މިނިސްޓްރީން ކޮށްފައިވާ ޓްވީޓެއްގައި ބުނެފައިވަނީ ކުޑަކުއްޖަކު ބަލިވެއިންކަމުގެ ރިޕޯޓް ލިބުމުން އެމައްސަލައިގައި ތުހުމަތު ކުރެވޭ ބޮޑެތި މީހުންނާމެދު ފިޔަވަޅު އަޅައިދިނުމަށް ތަޙުޤީޤީ އިދާރާއަށް ރަސްމީކޮށް އެދިފައިވާކަމުގެ ފުރިހަމަ ޔަޤީންކަން މިނިސްޓްރީން އަރުވާކަމުގަ އެވެ.

މިމައްސަލަގައި ފިޔަވަޅު އެޅުމަށް ޖެންޑާ މިނިސްޓްރީން ކަމާބެހޭ އިދާރާތަކަށް ފޮނުވީ ކޮންއިރަކު ކަމެއް ޖެންޑާ މިނިސްޓްރީން ނުބެނެއެވެ. ނަމަވެސް ފުލުހުން މިއަދު ބުނެފައިވަނީ 13 އަހަރުގެ އަންހެންކުއްޖަކު ބަނޑުބޮޑުވި މައްސަލައެއް ޖެންޑާ މިނިސްޓްރީ އާއި ފުލުހުން ގުޅިގެން ތަހުގީގު ކުރަމުންދާ ކަމަށެވެ.

އުމުރުން 13 އަހަރުގެ ކުދިންނާ ކައިވެނިކުރުމަކީ ގާނޫނާ ޚިލާފު ކަމެކެވެ. ކުޑަކުދިންގެ ހައްގުތައް ރައްކާތެރިކުރުމުގެ ގާނޫނުގައި ކުރިން އޮންނަ ގޮތުން ނަމަ 16 އަހަރު ފުރިއްޖެ ނަމަ، އާއިލާގެ އިއުތިރާޒެއް ނެތް ނަމަ ކޯޓުން ކައިވެނިކޮށްދެ އެވެ. ނަމަވެސް މީގެ ހަފުތާއެއްހާ ދުވަސް ކުރިން ރައްޔިތުންގެ މަޖިލީހުން ފާސްކުރި ކުޑަކުދިންގެ ހައްގުތައް ރައްކާތެރިކުރުމާ ގުޅޭ ގާނޫނުގައި، ކައިވެނިކޮށްދޭ އުމުރު ވަނީ 18 އަހަރަށް މަތިކޮށްފަ އެވެ.