މަޖިލިސް އިންތިހާބުން ފެއިލްވުމަށް ފަހު، ޕްރޮގްރެސިވް ކޮންގްރެސް ކޯލިޝަނުން ސަރުކާރު ޖަވާބުދާރީ ކުރުމަށް އެ ކޯލިޝަނުން ކުރަމުން އަންނަ މުޒާހަރާތަށް އިންތިހާއަށް ގިނައެވެ. މި މުޒާހަރާތަކުގައި އޮއްޓަރު ހުރި ވާހަކަތަކެއް ނުދައްކާކަމީ ހުރިހާ ދިވެހި ރައްޔިތުން ގަބޫލުކުރާ ހަގީގަތެކެވެ.

ދަނޑިވަޅެއްގެ ބޭނުން ހިފައި ސަރުކާރަށް ފާޑުކިޔައި ދީން ހިމާޔަތްކުރުމުގެ ނަމުގައި ވެރިކަން ވައްޓާލަންވެސް އުޅެފިއެވެ. ވީ ނާކާމިޔާބެވެ. މިއަދު ދައްކަވަނީ ބަދަލު ހިފުމުގެ ވާހަކައެވެ. އެ އިންޒާރު މާވަށު ދާއިރާގެ މެމްބަރ އަދި ޕީއެންސީގެ ނައިބު ރައީސް ދެއްވައިފިއެވެ. 2023 ވަނަ އަހަރު ޔާމީން ވެރިކަމަށް އަންނާނެކަމަށާއި އެނބުރި އަންނާނީ ބަދަލު ހިފަންކަމަށެވެ. ރައްޔިތުންގެ ހައްގުތަށް ދިފާއުކުރުމުގެ ނަމުގައި އަބަދުވެސް މަސައްކަތް ކުރައްވަނީ އަމިއްލަ މަސްލަހަތަށްކަން ރައްޔިތުންނަށް މި ބަސްތަކުން އެކަނިވެސް ސާބިތުވެގެން ގޮސްފިއެވެ.

ފުނޑާލައިފި ނަމުގައި ޕީޕީއެމް އިން ހުކުރު ދުވަހުގެ ރޭ ކާނިވާ ސަރަހައްދުގައި ބޭއްވި ޖަލްސާގައި ރައީސް ޔާމީނަކީ މި ޒަމާނުގެ މުހައްމަދު ތަކުރުފާނުކަމަށް ސިފަކުރައްވައި ވާހަކަ ދައްކަވަމުން ސައީދު ވިދާޅުވީ، ދިވެހިރާއްޖެއަށް ބަދަލެއް ގެންނަން ޖެހޭ ކަމަށް ދެކެވަޑައިގެން އެ ބަދަލު ގެންނެވުމަށް މާތްﷲ މިންވަރު ކުރެއްވި ލީޑަރަކި ރައީސް ޔާމީން ކަމަށެވެ. ސައީދު ވިދާޅުވި ގޮތުގައި، މިއަދު މުހައްމަދު ތަކުރުފާނު މި ދުނިޔެމަތީގައި ހުންނެވިނަމަ، ދައްކަވާނީ ރައީސް ޔާމިން ދައްކަވާ ވާހަކަފުޅުތައް ކަމާއި މެދު އެއްވެސް ޝައްކެއް ނެތް ކަމަށެވެ.

މުހައްމަދު ތަކުރުފާނާއި ރައިސް ޔާމީން ކުރެއްވި މަސައްކަތަކީ އެއް ވަރުގެ މަސައްކަތެއްކަމަށް ބަޔަކަށް ކިތަންމެ ވަރަކަށް ދައްކަން އުޅުނަސް، މުހައްމަދު ތަކުރުފާނާއި ކުރީގެ ރައީސް ޔާމީން ގައުމަށް ކޮށްދިން ހިތުމަތުގައި ހާސްތަން ތަފާތު އެބަހުއްޓެވެ. ގައުމާއި ވަތަނަށް ދިވެހިން ކުރާ ލޯބީގެ ނާޖައިޒު ފައިދާ ނަގައި، ދިވެހިންގެ ލޭ ކައްކުވަން ތިޔަ ޒާތުގެ ވާހަކަ ދެއްކެވުމުގެ އެއްވެސް ބޭނުމެއް ނެތެވެ.

އެ ބަތަލަކާއި މެދު އެންމެހޭ ދިވެހިން ފަހުރުވެރިވާ މުހައްމަދު ތަކުރުފާނު ޕޯޗްގީޒުންނާ ދެކޮޅަށް ފެއްޓެވި ޖިހާދަކީ މަތިވެރި ޖިހާދެކެވެ. އެ ޖިހާދު ފައްޓަވަން ޖެހުނީ ދިވެހިންނަށް އޭރު ލިބެމުން ދިޔަ އަނިޔާ ހުއްޓުވުމަށާއި މިގައުމުން އިސްލާމްދީން ފޮހެވިދާނެ ކަމުގެ ބިރައްޓަކައެވެ. ދިވެހި ގައުމިއްޔަތު މުޅިން ނެތިގެން ހިނގައިދާނެކަމުގެ ބިރައްޓަކައެވެ. ހިތްވަރުފުޅާއެކު ދަންވަރުގެ ވަގުތުތަކުގައި ރަށްރަށަށް އަރައި ޕޯޗްގީޒުންނާ ހަނގުރާމަ ކޮށް ދިވެހިންނަށް ނަސްރު ހޯއްދައިދެއްވިއެވެ.

ދެން އެ ބަތަލަކާ އެއްފަދަ ކުރައްވަމުން ގެންދަވާ ރައީސް ޔާމީންގެ މައްޗަށް ވައްކަމާއި ހިޔާނާތުގެ އެތައް ތުހުމަތުތަކެއް ވަނީ ކުރެވިފައެވެ. ތެދެއް. ރައީސް ޔާމީން ގައުމަށް ތަރައްގީ ގެނެސްދެއްވިއެވެ. އެކަމަކާއި ދެކޮޅު ހަދާކަށް އަޅުގަނޑު ނޫޅެމެވެ. ނަމަވެސް ދީނާ ވަހުދަތުގެ ދިފާއުގައި ކުރެއްވި ހަމައެކަނި ކަމަކީ އެ ވާހަކަތައް ދެއްކެވުމެވެ. މުސްލިމުންނަށް އަނިޔާވެރިވާ ބަޔަކުވެސް އެ މަނިކުފާނާއި އެ މަނިކުފާނުގެ ވާގިވެރިންނަށް ގޯސްވަނީ އެ ބޭފުޅުންގެ ސިޔާސަތުތަކަށް ފާޑު ކިޔުމުންނެވެ. ރުހުމުގެ ލޮލަކަށް އައިބެއް ނުފެންނާނެއޭ މުސްކުޅިން ބުނާ ބީދައިން ފަހަރުގައި އެކަންކަން ނުފެނުނީ ކަމަށް ވެދާނެއެވެ.

ފައިސާ ލިބުނީމާ އެއީ ހަލާލު އެއްޗެއްތޯ އެކަކު ވެސް ނުބަލާނެ ކަމަށާއި ފައިސާ ލިބުނީމާ އޭގައި ނުހިފާނީ ކާކުތޯއާއި ހުދު އަނބިމީހާވެސް ގިނަ އަދަދުން ފައިސާ ވަނީމާ ސުވާލު ނުކުރާނެ ފަދަ މޭރުމަކުން ތިޔަބުނާ ރައީސެއް ވާހަކަ ދެއްކެވިއެވެ. ނިވާކަން ކުޑަ ހެދުން ލައިގެން ނަށަން ތިބި އަންހެނުންނާއި ސްޓޭޖް ޝޯތައް ބޭއްވިއެވެ. ކަނޑު އަޑީގައި ބުދު މައުރަޒެއް ހުޅުވިގެން ދިޔައެވެ. ބެންކޮކް އަންހެނުންނަކީ ހިލޭ އަންހެނުން ނޫންކަމަށް ވިދާޅުވީވެސް ހަމަ އެ ދޫފުޅުންނެވެ.

މުހައްމަދު ތަކުރުފާނާއި ރައީސް ޔާމީނާއި ގުޅުވައި ވާހަކަ ދައްކަވަން، އިއްޒަތްތެރި މެމްބަރަށް ކެރިވަޑައިގެން ކަމާއި މެދު އަޅުގަނޑު ހަމަ އާޝޯހު ވެއްޖެއެވެ. ސައީދުއެވެ. އެ ވެރިކަމަކާއި މެދު ހިތްހަމަނުޖެހިގެން ވޯޓުން ނިންމަވާލެއްވި ރައީސްއަކާއި، ގައުމު އަދި އަދަށް ދާން ދެންވެސް އެ ބަތަލެއްގެ ޒިކުރާ އާކުރާ ބަތަލަކާއި އެއްފަދަ ކުރެއްވުމުން، ތިޔަ ކުރެއްވެނީ އެ ބަތަލުންގެ ހަނދާނަށް ބޮޑު މަލާމާތެކެވެ.