އަންނަ އަހަރު 143 ރަށެއްގައި ފެނާއި ނަރުދަމާ ނިޒާމުގެ މަސައްކަތް ކުރުމަށް 1.2 ބިލިއަން ރުފިޔާ

އަންނަ އަހަރު 143 ރަށެއްގައި ފެނާއި ނަރުދަމާ ނިޒާމުގެ މަސައްކަތްތައް ކުރިޔަށް ގެންދިޔުމަށްޓަކައި 1.2 ބިލިއަން ރުފިޔާ ބަޖެޓުގައި ހިމަނައިފި އެވެ.

އަންނަ އަހަރަށް ލަފާކުރާ ދައުލަތުގެ ބަޖެޓް ރައްޔިތުންގެ މަޖިލީހަށް ހުށަހަޅުއްވަމުން ފިނޭންސް މިނިސްޓަރ އިބްރާހީމް އަމީރު ވިދާޅުވީ ޢަމާޒަކީ ކުރިޔަށްއޮތް ދެ އަހަރުގެ ތެރޭގައި ރާއްޖޭގެ ހުރިހާ ރަށެއްގައިވެސް ސާފު ބޯފެނާއި ނަރުދަމާ ނިޒާމުތަކުގެ މަސައްކަތް ފެށުން ކަމަށެވެ.

އަންނަ އަހަރަށް ލަފާކުރާ ދައުލަތުގެ ބަޖެޓުގައިވާ ގޮތުން އެކިރަށްރަށުގައި އަލަށް ފަށާ ފެނާއި ނަރުދަމާ ނިޒާމު ޤާއިމުކުރުމުގެ މަޝްރޫޢުތަކަށް 146.8 މިލިއަން ރުފިޔާ ބަޖެޓް ކުރެވިފައިވެއެވެ. އެންމެ ބޮޑު ޚަރަދެއް ހިނގާނެކަމަށް ލަފާކޮށްފައިވަނީ ސައުދީ ފަންޑުގެ ލޯނުގެ އެހީގައި ކުރިޔަށްދާ ހުޅުމާލެ އައިލެންޑް ޑިވެލޮޕްމަންޓް މަޝްރޫޢަށެވެ. މި މަޝްރޫޢަށް ޕީއެސްއައިޕީ ބަޖެޓުން 201.5 މިލިއަން ރުފިޔާ ޚަރަދުވާނެކަމަށް ލަފާކޮށްފައިވެއެވެ. ހުޅުމާލޭ އައިލެންޑް ޑިވެލޮޕްމަންޓް މަޝްރޫޢު ކުރިޔަށް ގެންދިޔުމަށް ދިވެހި ސަރުކާރުން ސައުދީ އާއެކު ސޮއިކޮށްފައިވަނީ 2018 ވަނަ އަހަރު އެވެ.

އަންނަ އަހަރު ނަރުދަމާ ނިޒާމު ޤާއިމުކުރުމުގެ މަޝްރޫޢުތަކަށް 144.3 މިލިއަން ރުފިޔާ ޚަރަދުވާނެކަމަށް އަންދާޒާ ކޮށްފައިވެއެވެ. މީގެ ބޮޑުބައެއް ޚަރަދުވާނީ އޮފިޑް ފަންޑުގެ ލޯނުގައި އެކި ރަށްތަކުގައި ކުރިޔަށްގެންދާ ޕްރޮވިޝަން އޮފް ވޯޓަރ ސަޕްލައި ސެނިޓޭޝަން އެންޑް ވޭސްޓް މެނޭޖްމަންޓް ޕްރޮޖެކްޓަށެވެ. މީގެއިތުރުން މިހާރު ހިނގަމުންދާ ނަރުދަމާގެ މަޝްރޫޢުތަކަށް އަންނަ އަހަރު 84.5 މިލިއަން ރުފިޔާ ވަނީ ހިމަނާފަ އެވެ.

ހޫނު މޫސުމުގައި ފެން ބޭނުންވާ ރަށްތަކުގެ އިތުރުން އެކި ރަށްތަކުގައި ފެނުގެ ނިޒާމު ޤާއިމުކުރުމަށްޓަކައި ދައުލަތުގެ ޢާންމު ބަޖެޓުން 45.1 މިލިއަން ރުފިޔާ ބަޖެޓް ކޮށްފައިވެއެވެ. މީގެތެރޭގައި ގްރީންް ކްލައިމެޓް ފަންޑު ޖީސީއެފްގެ ހިލޭ އެހީގައި އެކި ރަށްތަކުގައި ފެން ރައްކާކުރާ ނިޒާމު ޤާއިމުކުރުމަށް 30.2 މިލިއަން ރުފިޔާ ހިމެނިފައިވެއެވެ.

ހިނގަމުންމިދާ 2019 ވަނަ އަހަރުގެ ބަޖެޓުގައި ފެނާއި ނަރުދަމާ ނިޒާމު ޤާއިމުކުރުމުގެ 136 މަޝްރޫއަށް، 1.3 ބިލިއަން ރުފިޔާ ބަޖެޓް ކޮށްފައިވެއެވެ. މީގެތެރޭގައި ނަރުދަމާގެ 32 މަޝްރޫޢާއި ފެނުގެ ނިޒާމު ޤާއިމުކުރުމުގެ 36 މަޝްރޫއުގެ އިތުރުން ފެނާއި ނަރުދަމާގެ 68 މަޝްރޫޢަކަށް ބަޖެޓު ކޮށްފައިވެއެވެ. މީގެ ތެރޭގައި 63 ރަށެއްގައި އަލަށް ފެނާއި ނަރުދަމާ އެޅުމުގެ މަސައްކަތަށް ޖުމުލަ 274.4 މިލިއަން ރުފިޔާ އަދި 26 ރަށެއްގައި ފެނުގެ ނިޒާމު ޤާއިމުކުރުމުގެ މަސައްކަތަށް 93.4 މިލިއަން ރުފިޔާ އަދި 11 ރަށުގައި ނަރުދަމާ ނިޒާމެއް އެޅުމަށް 62.2 މިލިއަން ރުފިޔާ ބަޖެޓުކުރެވިފައިވާނެއެވެ.

މިސަރުކާރުން އަލަށް 107 ރަށެއްގައި ފެނާއި ނަރުދަމާ ނިޒާމު ޤާއިމުކުރުމުގެ މަސައްކަތް މިހާރު ކުރަމުންދާއިރު މީގެތެރެއިން މަސައްކަތް ކުރިޔަށްދަނީ 4 ރަށެއްގަ އެވެ. 33 ރަށެއްގައި މަޝްރޫއު ކޮންޓްރެކްޓް ކޮށްފައިވާއިރު 70 ރަށެއްގެ މަޝްރޫޢު އުޅެނީ ޓެންޑަރިން މަރުޙަލާގައެވެ.