ފިލިޕިންސާއި ގުއާމްއާ ދެކޮޅަށް ރާއްޖެ ކުޅޭ މެޗު ބަލާލުމަށް މަޖިލީހުގެ މެމްބަރުންނަށް ދައުވަތު އަރުވައިފި
ގައުމީ ޓީމުން ވަނީ ރައީސް ނަޝީދަށް ޖަރޒީއެއްވެސް އަރުވާފަ
ޖާރޒީ އެރުވުން
އޭއެފްސީ އޭޝިއަން ކަޕް ޖޮއިންޓް ކޮލިފިކޭޝަނުގައި ފިލިޕިންސާއިގުއާމްއާ ދެކޮޅަށް ރާއްޖެ ކުޅޭ މެޗު ބަލާލުމަށް ރައްޔިތުންގެ މަޖިލީހުގެ މެމްބަރުންނަށް ދިވެހި ރާއްޖޭގެ ގައުމީ ޓީމުގެ ކޮމެޓީގެ ފަރާތުން ދައުވަތު އަރުވައިފިއެވެ.
ބުދަ ދުވަހުގެ މަޖިލީހުގެ ޖަލްސާގައި އެކަން މެމްބަރުންގެ ސަމާލުކަމަށް ގެންނަވަމުން ރައްޔިތުންގެ މަޖިލީހުގެ ރައީސް، ރައީސް ނަޝީދު ވިދާޅުވީ މެޗުތައް ބަލާލުމަށް މަޖިލީހުގެ މެމްބަރުންނަށް ޓިކެޓުވެސް ދެއްވާފައިވާކަމަށެވެ. އަދި ގަލޮޅު ދަނޑަށް މެޗު ބައްލަވާލެއްވުމަށް ވަޑައިގަތުމަށް ރައީސް ނަޝީދު ހުރިހާ މެމްބަރުންނަށް އިލްތިމާސްކުރެއްވިއެވެ.
ގައުމީ ޓީމުގެ ޖާރޒީ ރައީސް ނަޝީދަށް ވަނީ އަރުވާފައެވެ. ޖާރޒީ ރައްޔިތުންގެ މަޖިލީހުގެ ރައީސަށް އެރުވީ ގައުމީ ޓީމު ކޮމެޓީގެ ޗެއަރމަން އަދި ޓުއަރިޒްމް މިނިސްޓަރ އަލީ ވަހީދެވެ. ޖާރޒީއާއި ހަވާލުވެޑައިގަތުމަށް ފަހު ރައީސް ނަޝީދު ވިދާޅުވީ ގައުމީ ޓީމުގެ މެޗުތައް ބެލުމަކީ އެމަނިކުފާނަށް ލިބިލައްވާ ވަރަށް ބޮޑު އުފަލެއް ކަމަށެވެ. މި މެޗުތަކުގެ މުހިއްމުކަން ރައީސް ނަޝީދު ވަނީ ފާހަގަކުރައްވާފައެވެ.
ރައީސް ރަޝީދު ވިދާޅުވީ ގައުމީ ޓީމަށް ވަރަށް ފުރިހަމަ ކާމިޔާބެއް ލިބޭނެކަމުގެ އުއްމީދު ކުރައްވާ ކަމަށެވެ.
ރާއްޖެއިން އޭއެފްސީ އޭޝިއަން ކަޕަށް ކޮލިފައިވުމަށް އަމާޒު ހިފައިފައިވާއިރު ފިލިޕީންސް އާއި ގުއާމްއާ ދެކޮޅަށް އަމިއްލަ ގައުމުގައި ކުޅުމަށް ހަމަޖެހިފައިވާ ދެ މެޗަކީ ވަރަށް މުހިންމު ދެމެޗެވެ. އެހެންކަމުން މި ދެ މެޗަށް ސަޕޯޓަރުން އިތުރު ކުރުމަށް އެފްއޭއެމްއާއި ސަރުކާރާއި އަދި މަޖިލިސް މެމްބަރުން ވެގެން މަސައްކަތް ކުރުމަށް ވަނީ ހަމަޖެހިފައެވެ.
