2020 ވަނަ އަހަރުގެ ބަޖެޓަކީ ރާއްޖެ ބަދަލުކުރާނެ ބަޖެޓެއް: ރައީސް ނަޝީދު
ބަޖެޓް އެންމެ ފުރިހަމަވާ ކަމަކީ ލާމަރުކަޒީ ނިޒާމުން ބަޖެޓް ބައްޓަން ކޮށްފައިވާތީ
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
އަންނަ އަހަރަށް ލަފާކުރާ ދައުލަތުގެ ބަޖެޓަކީ ދިވެހިރާއްޖެ ބަދަލުކޮށްލާނެ ބަޖެޓެެއްކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެ އެވެ.
އަންގާރަ ދުވަހުގެ ޖަލްސާގައި ބަޖެޓަށް ބަހުސްކުރުމަށް ހުޅުވާލުމުގެ ކުރިން ވާހަކަފުޅު ދައްކަވަމުން ރައީސް ނަޝީދު ވިދާޅުވީ މިއީ ބޮޑު ބަޖެޓެއްކަމަށާއި ބަޖެޓުގެ ޖުމްލަ ޢަދަދު 37 ބިލިއަނަށް އަރާކަމުގަ އެވެ. 2008 ވަނަ އަހަރު ދައުލަތުގެ ބަޖެޓް ހުރީ 7 ބިލިއަން ރުފިޔާގައި ކަމަށާއި މިހާރު 37 ބިލިއަނަށް ބަޖެޓް އަރާފައިމިވަނީ ޓެކްސް ނެގުމާއި ބެހޭ ކަންކަން ޤާނޫނުތަކުގެ ތެރެއިން އެކަންކަން ހިނގަމުންދާތީ ކަމަށް ނަޝީދު ވިދާޅުވި އެވެ.
ނަޝީދު ވިދާޅުވީ އަންނަ އަހަރަށް ލަފާކުރާ ދައުލަތުގެ ބަޖެޓުން ސަތޭކަ ދުއިސައްތަ މިލިއަން ކޮންމެ ރަށަކަށް ޚަރަދު ކުރާ ކަމަށެވެ. އަދި މިބަޖެޓް އެންމެ ފުރިހަމަވާ ކަމަކީ ލާމަރުކަޒީ ނިޒާމުން ބަޖެޓް ބައްޓަންކޮށްފައިވާތީ ކަމަށް ނަޝީދު ވިދާޅުވި އެވެ.
ބަޖެޓަށް ބަހުސްކުރުމަށް އަންގާރަ ދުވަހު ފަށާފައިވާއިރު ރައީސް ނަޝީދު ވިދާޅުވީ ކޮންމެ މެމްބަރަކަށްވެސް ބަޖެޓަށް ބަހުސްކުރެއްވުމަށް 15 މިނެޓްގެ ފުރުސަތެއް ލިބިވަޑައި ގަންނަވާނެ ކަމަށެވެ. އަދި ވަގުތު ޖެހޭއިރު އެ މެމްބަރަކު ފްލޯރގައި ހާޒިރު ވެވަޑައިގެންނެތްނަމަ އެ މެމްބަރަކަށް ލިބޭ ފުރުސަތު ގެއްލިގެންދާނެ ކަމަށް ރައީސް ނަޝީދު ވިދާޅުވި އެވެ. އަދި މަޖިލިސް ފަހެއް ޖަހަންދެން ކުރިޔަށްދާނެ ކަމަށް ރައީސް ނަޝީދު ވިދާޅުވި އެވެ.
އަންނަ އަހަރަށް ލަފާކުރާ ދައުލަތުގެ ބަޖެޓަކީ 37.5 ބިލިއަން ރުފިޔާގެ ބަޖެޓެކެވެ.
