ބަޖެޓު ކޮމިޓީގެ މުޤައްރިރަކަށް ކިނބިދޫ ދާއިރާގެ މެންބަރ ނާޝިޒް

އަންނަ އަހަރަށް ލަފާކުރާ ދައުލަތުގެ ބަޖެޓް ދިރާސާކުރާ ކޮމެޓީގެ މުގައްރިރަކަށް ކިނބިދޫ ދާއިރާގެ މެމްބަރ މުހައްމަދު ނާޝިޒް އަދި ނައިބު މުގައްރިރަކަށް އަލިފުށީ ދާއިރާގެ މެމްބަރ މުހައްމަދު ރަޝީދު ހުސައިން ހަމަޖައްސައިފި އެވެ.

މިރޭ ބޭއްވި ބަޖެޓް ކޮމެޓީގެ ބައްދަލުވުމުގައި މުގައްރިރު ކަމަށް ނާޝިޒުގެ ނަން ހުށަހެޅުއްވީ ހަނިމާދޫ ދާއިރާގެ މެމްބަރ ޢަބްދުލްޣަފޫރު މޫސާ އެވެ. އަދި އަބްދުލްޣަފޫރުގެ ހުށަހެޅުއްވުމަށް ތާޢީދު ކުރެއްވީ ކުޅުދުއްފުށީ އުތުރު ދާއިރާގެ މެމްބަރު ޔާސިރު ޢަބްދުއްލަތީފެވެ. ނާޝިޒު މުގައްރިރުކަމަށް ކަނޑައަޅަން ފެނޭތޯ ނެގުނު ވޯޓުގައި 18 މެމްބަރުން ވަނީ ނާޝިޒު މުގައްރިރުކަމަށް ފެންނަކަމަށް ވޯޓު ދެއްވާފަ އެވެ.

ނައިބު މުގައްރިރަކަށް އަލިފުށި ދާއިރާގެ މެމްބަރ މުހައްމަދު ރަޝީދު ހުސައިންގެ ނަން ހުށަހެޅުއްވީ ހަނިމާދޫ ދާއިރާގެ މެމްބަރ އަބްދުލްޣަފޫރު މޫސާ އެވެ. އަދި ހުށަހެޅުއްވުމަށް ތާޢީދު ކުރެއްވީ ކިނބިދޫ ދާއިރާގެ މެމްބަރ މުހައްމަދު ނާޝިޒެވެ. މުހައްމަދު ރަޝީދު ހުސައިންގެ ނަން ފާސްވެފައިވަނީ ކޮމެޓީގެ އަޣްލަބިއްޔަތުންނެވެ.

މީގެއިތުރުން ބަޖެޓް ކޮމެޓީގެ ބައްދަލުވުމުގައި ވަނީ ކޮމެޓީގެ ގަވާއިދު ހުށަހަޅާފައިވާ ގޮތަށް ފާސްކޮށްފަ އެވެ. އަދި ބަޖެޓާއި ގުޅޭގޮތުން މޯލްޑިވްސް މަނިޓަރީ އޮތޯރިޓީ(އެމްއެމްއޭ) އާއި އޮޑިޓަރ ޖެނެރަލްގެެ ޚިޔާލު ހޯއްދެވުމަށް ކޮމެޓީއަށް ގެނައުމަށް ފާސްކޮށްފަ އެވެ. އަދި ބަޖެޓް ދައުރު ނިމުމުގެ 7 ދުވަސް ކުރިން ތަޅުމަށް ފޮނުވަންޖެހޭތީ މިމަހުގެ 20 ށް ބަޖެޓް އެއްކޮށް ދިރާސާކޮށް ނިންމާލުމަށް މަސައްކަތް ކުރައްވާނެކަމަށް ކޮމެޓީގެ މުގައްރިރު ނާޝިޒު ވިދާޅުވި އެވެ.

އަންނަ އަހަރަށް ލަފާކުރާ ދައުލަތުގެ ބަޖެޓް ރައްޔިތުންގެ މަޖިލީހަށް ފިނޭންސް މިނިސްޓަރ ހުށަހެޅުއްވީ މިހަފްތާގެ ހޯމަ ދުވަހު އެވެ. އަންނަ އަހަރަށް ލަފާކުރާ ދައުލަތުގެ ބަޖެޓްގެ ޖުމްލައަކީ 37.5 ބިލިއަން ރުފިޔާ އެވެ. ޚަރަދުގެ ގޮތުގައި ހިނގާނެކަމަށް ލަފާކޮށްފައިވަނީ 35.6 ބިލިއަން ރުފިޔާ އެވެ.