ބަޖެޓް 2020: އިޤްތިޞާދީ އަދި ސިނާއީ ކުރިއެރުމަށް 7.9 ބިލިއަން ރުފިޔާ!
އެންމެ ބޮޑު ހަރަދެއް ކުރަނީ އެކި ރަށްރަށުގެ ބިން ހިއްކުމަށް، އެއީ 955 މިލިއަން ރުފިޔާ
ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު އާއި ފިނޭންސް މިނިސްޓަރު އިބްރާހީމް އަމީރު ސަލާމް ކުރައްވަނީ --
އަންނަ އަހަރަށް ލަފާކުރާ ދައުލަތުގެ ބަޖެޓުގައި އިޤްތިޞާދީ އަދި ސިނާޢީ ކުރިއެރުމަށް 7.9 ބިލިއަން ރުފިޔާ ކަނޑައަޅާފައިވެއެވެ.
އަންނަ އަހަރަށް ލަފާކުރާ ދައުލަތުގެ ބަޖެޓުގެ ތަފުޞީލު ހޯމަ ދުވަހު ރައްޔިތުންގެ މަޖިލީހުގެ ޖަލްސާއަށް ފިނޭންސް މިނިސްޓަރު އިބްރާހީމް އަމީރު ބަޔާންކޮށް ދެއްވާފައިވާފައެވެ. އޭގެ ތަފުޞީލަށް ބަލާލާއިރު، އިޤްތިޞާދީ އަދި ސިނާޢީ ކުރިއެރުވުމަށް ހިންގޭ މަޝްރޫޢުތަކާއި އެހެނިހެން ޚަރަދުތަކަށް 2020 ވަނަ އަހަރުގެ ބަޖެޓުގައި 7,912.4 މިލިއަން ރުފިޔާ ހިމަނާފައިވެއެވެ. މީގެ ތެރޭގައި އެންމެ ބޮޑުބައެއް ޙިއްސާކުރާ މަސައްކަތްތެރިންނާއި ވިޔަފާރި ކުރިއެރުވުމަށް އަދި އިޤްތިޞާދު ފުޅާކުރުމަށް 4,096.7 މިލިއަން ރުފިޔާ ބަޖެޓުކުރެވިފައިވާކަން ހާމަވެއެވެ.
އިޤްތިޞާދީ އަދި ސިނާޢީ ކުރިއެރުމަށް ކުރާ ޚަރަދުގެ ގޮތުގައި އެންމެ ބޮޑު ޚަރަދެއް ކުރަން ނިންމާފައިވަނީ އެކި ރަށްރަށުގެ ބިން ހިއްކުމަށެވެ. އެއީ 955 މިލިއަން ރުފިޔާއެވެ.
މީގެއިތުރުން، ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމުގެ މަޝްރޫޢަށް 853 މިލިއަން ރުފިޔާ ކަނޑައަޅާފައިވާއިރު، ގްރޭޓަރ މާލެ ކަނެކްޓިވީ ޕްރޮޖެކްޓް (މާލެ-ތިލަފުށި ގުޅާލާ ބްރިޖް)އަށް 411 މިލިއަން ރުފިޔާ ބަޖެޓުން ޚަރަދު ކުރުމަށް ކަނޑައަޅާފައި ވެއެވެ.
ޕްރިޕެއަރިންގ އައުޓަރ އައިލެންޑް ފޯރ ސަސްޓެއިނަބަލް އެނަރޖީ ޑެވެލޮޕްމަންޓް ޕްރޮޖެކްޓަށް 247 މިލިއަން ރުފިޔާ ޚަރަދު ކުރަން ނިންމާފައިވާއިރު، ގުޅިފަޅު ހިއްކުމަށާއި ޕޯޓް ޑިވެލޮޕްމަންޓް ޕްރޮޖެކްޓަށް ވެސް 247 މިލިއަން ރުފިޔާ ކަނޑައަޅާފައި ވެއެވެ.
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުގެ ސަރުކާރުން ވަރަށް ބޮޑު އިސްކަމެއް ދެއްވައިގެން، އަދި މިހާރު ރައްޔިތުންގެ މަޖިލީހުގައި ވެސް ދިރާސާ ކުރަމުންދާ، ރާއްޖޭގައި ޤައުމީ ދަތުރުފަތުރުގެ ނިޒާމެއް ޤާއިމު ކުރުމުގެ ބިލުގައިވާގޮތައް، ފުރިހަމަ ދަތުރުފަތުރު ކުރުމުގެ ނިޒާމެއް ޤާއިމުކުރުމަށް 150 މިލިއަން ރުފިޔާ ޚަރަދު ކުރުމަށް ކަނޑައަޅާފައި ވެއެވެ.
މީގެއިތުރުން އައްޑޫ ސިޓީގެ މަގު ހެދުމުގެ މަޝްރޫޢަށް 135 މިލިއަން ރުފިޔާ ކަނޑައަޅާފައިވާއިރު، މާލެ ސިޓީގެ މަގު ހެދުމުގެ މަޝްރޫޢަށް 79 މިލިއަން ރުފިޔާ އަދި ފުވައްމުލައް ސިޓީގެ މަގު ހެދުމުގެ މަޝްރޫޢަށް 61 މިލިއަން ރުފިޔާ ޚަރަދު ކުރުމަށް ކަނޑައަޅާފައި ވެއެވެ.
އަންނަ އަހަރަށް ލަފާކުރާ ބަޖެޓުގައިވާ ގޮތުން އިޤްތިޞާދީ އަދި ސިނާޢީ ކުރިއެރުމަށް ކުރާ ޚަރަދުގެގޮތުގައި 7.9 ބިލިއަން ރުފިޔާ ކަނޑައަޅާފައިވާއިރު، އޭގެ ރިކަރަންޓް ޚަރަދަކީ 1.2 ބިލިއަން ރުފިޔާއެވެ. އަދި ކެޕިޓަލް ޚަރަދުގެ ގޮތުގައި 6.7 ބިލިއަން ރުފިޔާ ޚަރަދުވާނެ ކަމަށް ވެއެވެ.
އަންނަ އަހަރަށް ލަފާކުރާ މުޅި ބަޖެޓް ޢަމާޒުކޮށްފައި ވަނީ "ޖަޒީރާ ރާއްޖެ" މެނިފެސްޓޯއާއި ސްޓްރެޓީޖިކް އެކްޝަން ޕްލޭންގައި ހިމެނޭ 5 ދާއިރާގައިވާ ކަންކަން ކަނޑައެޅިފައިވާ މުއްދަތުގެ ތެރޭގައި ނިންމުމަށް ފަހިކުރުމަށެވެ.
އެގޮތުން "ނޫ އިޤްތިޞާދު" ސިޔާސަތު ހިންގުމަށް ބަޖެޓުގެ 11 އިން ސައްތަ ކަނޑައަޅާފައިވާއިރު، "އޯގާތެރި ސަރުކާރު" ސިޔާސަތު ހިންގުމަށް ބަޖެޓުގެ 33 އިން ސައްތަ ކަނޑައަޅާފައި ވެއެވެ. އަދި "ފަޚުރުވެރި ޢާއިލާ" ސިޔާސަތަށް ބަޖެޓުން 10 އިން ސައްތަ ކަނޑައަޅާފައިވާއިރު، "ޖަޒީރާ ދިރިއުޅުން" ސިޔާސަތަށް 16 އިން ސައްތަ އަދި "ހެޔޮވެރިކަން" ސިޔާސަތަށް ބަޖެޓުން 30 އިން ސައްތަ ކަނޑައަޅާފައި ވެއެވެ.
