އެމްއެމްޕީއާރުސީގެ މައްސަލައިގައި މިނިސްޓަރ ޒަހާ ފުލުސް އޮފީހަށް ހާޒިރުކޮށް ސުވާލުކޮށްފި

މޯލްޑިވްސް މާކެޓިންގ އެންޑް ޕީއާރު ކޯޕަރޭޝަން (އެމްއެމްޕީއާރުސީ) ގެ ހިޔާނާތުގައި މައްސަލައިގައި ފިޝަރީޒް މިނިސްޓަރ ޒަހާ ވަހީދު ފުލުސް އޮފީހަށް ހާޒިރުކޮށް ސުވާލުކޮށްފިއެވެ.

'ރާއްޖެ އެމްވީ' އަށް މައުލޫމާތު ދެއްވަމުން މިނިސްޓަރ ޒަހާ ވިދާޅުވީ އޭނާ ޕޮލިހަށް ހާޒިރު ކުރައްވާފައިވަނީ ބުރާސްފަތި ދުވަހުގެ ރޭގެ ވަގުތެއްގައި ކަމަށެވެ. އަދި ފުލުހަށް ހާޒިރުކުރުމަށް އެކަމުގައި ފުލުހުންނަށް އެއްބާރުލުން ދެއްވާފައިވާނެ ކަމަށް މިނިސްޓަރ ވިދާޅުވިއެވެ.

އެމްއެމްޕީއާރުސީގެ ހިޔާނާތުގެ މައްސަލައިގައި އެކި ފަރާތްތައް ޕޮލިހަށް ހާޒިރުކޮށް ދަނީ ސުވާލުކުރަމުންނެވެ. ފުލުހުން ބުނީ މި ދަނޑިވަޅުގައި ހާޒިރުކުރާ މީހުންގެ ނަންތައް ހާމަކުރެވޭކަށް ނެތް ކަމަށެވެ. ނަމަވެސް އެމްއެމްޕީއާރުސީގެ މައްސަލައިގައި މި ދުވަސްކޮޅު އެކި މީހުންނާ ސުވާލުކޮށް މައުލޫމާތު ސާފުކުރަމުންދާ ކަމަށެވެ. އެ މައްސަލައިގެ އިތުރު ތަފްސީލެއް ފުލުހުން ނުދެއެވެ.

އެމްއެމްޕީއާރުސީގެ މައްސަލައިގައި ތ. ގުރައިދޫ ދާއިރާގެ މެންބަރު ޣައްސާން މައުމޫން ވެސް ވަނީ ޕޮލިހަށް ހާޒިރުކޮށް ސުވާލުކޮށްފައެވެ.

އެމްއެމްޕީއާރުސީގެ ހިޔާނާތުގައި ބައިވެރިވި ކަމުގެ ތުހުމަތު މި ސަރުކާރުގެ ތިން މިނިސްޓަރަކަށް ވަނީ ކުރެވިފައެވެ. އޭގެ ތެރޭގައި މިނިސްޓަރ ޒަހާގެ އިތުރުން ޔޫތް މިނިސްޓަރ އަހުމަދު މަހުލޫފާއި ކޮމިއުނިކޭޝަން މިނިސްޓަރ މުހައްމަދު މަލީހު ޖަމާލް ހިމެނިވަޑައިގަންނަވައެވެ.

މީގެ އިތުރުން 18 ވަނަ މަޖިލީހުގެ 44 މެންބަރުން ހިމެނޭ ކަމަށާއި 19 ވަނަ މަޖިލީހުގެ 16 މެންބަރެއް މި ހިޔާނާތުގައި ބައިވެރިވާ ކަމަށް ފުލުހުން ހާމަކޮށްފައިވާ އިރު، މި ސަރުކާރުގެ 7 މީހަކާއި، 6 ފަނޑިޔާރެއް ހިމެނޭކަމަށް ހަބަރުތައް ވަނީ ފެތުރިފައެވެ.