ނޫމަޑި މައްސަލާގައި ކުރީގެ މިނިސްޓަރު މުއިއްޒު ކޮމެޓީއަށް ހާޒިރު ކުރަނީ!
29 އޮކްޓޯބަރު 2019 | އަންގާރަ 06:22ގެއްލުމުގެ ބަދަލުގެ ގޮތުގައި ދައުލަތުން ވަނީ 55 މިލިއަން ޑޮލަރު ނޫމަޑިއަށް ދީފަ
ކުރީގެ ހައުސިން މިނިސްޓަރު މުހައްމަދު މުއިއްޒު--
ހައުސިން ޔުނިޓްތަކެއް އަޅަން ނޫމަޑިއާއެކު ސަރުކާރުންވި އެއްބަސްވުން އުވާލުމުން، ގެއްލުމުމުގެ ބަދަލުގެ ގޮތުގައި ދައުލަތުން ބޮޑު ބަދަލެއް ދޭންޖެހުނު މައްސަލާގައި ކުރީގެ ހައުސިން މިނިސްޓަރ ޑރ. މުޙައްމަދު މުއިއްޒު ރައްޔިތުންގެ މަޖިލީހުގެ މާލިއްޔަތު ކޮމެޓީއަށް ހާޒިރު ކުރުމަށް ނިންމައިފި އެވެ.
މާލިއްޔަތު ކޮމެޓީއަށް މުއިއްޒު ހާޒިރު ކުރަނީ، ނޫމަޑި މައްސަލާގެ އާބިޓްރޭޝަނަށް މުއިއްޒު ދެއްވި ބަޔާނާއި ގުޅިގެން ނެވެ. މާލިއްޔަތު ކޮމެޓީއަށް މުއިއްޒު ހާޒިރު ކުރުމަށް ހަމަޖެހިފައިވަނީ އަންނަ ހަފުތާގެ ހޯމަ ދުވަހު އެކޮމެޓީން ބާއްވާ ބައްދަލު ވުމަށެވެ.
ނޫމަޑި އެއްބަސްވުން ބާޠިލުކުރިއިރު މުއިއްޒަކީ ކުރީގެ ރައީސް ޢަބްދުﷲ ޔާމީންުގެ ސަރުކާރުގެ ހައުސިން މިނިސްޓަރެވެ.
ނޫމަޑިއަށް ގެއްލުމުގެ ބަދަލުގެ ގޮތުގައި ދައުލަތުގެ މާލިއްޔާއިން ބޮޑު ބަދަލެއް ދޭންޖެހުނީ ރައީސް ޔާމީނުގެ ސަރުކާރުން ޢަމަލުކުރި ގޮތުން ކަމަށާއި އަދި އެމައްސަލަ ކޯޓުން ބޭރުން ޙައްލެއް ހޯދަން އުޅުންނަމަ ދައުލަތަށް ލިބޭ ގެއްލުން ކުޑަކުރެވުނީސް ކަމަށް ރައީސް އިބްރާހީމް މުޙައްމަދު ޞާލިޙުގެ ސަރުކާރުގެ އިސްވެރިންނާއި ރައްޔިތުންގެ މަޖިލީހުގެ މާލިއްޔަތު ކޮމެޓީންގެ މެމްބަރުންވެސް ގެންދަވަނީ ވިދާޅުވަމުން ނެވެ.
ނޫމަޑި އެއްބަސްވުންތައް ބާޠިލުކުރީ ގޯސްކޮށް ކަމަށް އާބިޓްރޭޝަނަށް ހުށަހެޅުއްވި ލިއުމެއްގައި ކުރީގެ މިނިސްޓަރ މުއިއްޒު ދައުލަތާ ދެކޮޅަށް ބަޔާން ދެއްވާފަ ކަމަށް މިސަރުކާރުގެ އިސްވެރިން ގެންދަވަނީ ތުހުމަތު ކުރައްވަމުން ނެވެ. އަދި ދައުލަތަށް އެހާ ބޮޑެތި ގެއްލުންތަކެއް ދިން ބަޔަކު، ރަށުތެރޭގައި މިނިވަންކަމާއެކު އުޅެމުންދާ ކަމަށާއި، އެމީހުންގެ ވާހަކަތައް މިހާރުވެސް ބައްޓަން ވެފައި ހުންނަނީ ދައުލަތަށް ގެއްލުންދޭ ގޮތައްކަމަށް ތުހުމަތުކުރައްވާ މިސަރުކާރަށް ނިޞްބަތްވާ އިސްވެރިންނާއި ރައްޔިތުންގެ މަޖިލީހުގެ ބައެއް މެމްބަރުންގެ ގެންދަވަނީ ނުރުހުން ފާޅު ކުރަމުން ނެވެ.
ރައީސް ޔާމީނުގެ ސަރުކާރުން ބާޠިލުކުރި ދެ އެއްބަސްވުމެއްގެ މައްސަލަ ނޫމަޑިން ވަނީ ނެދަލޭންޑްސްގެ ދަ ހޭގްގައި ހުންނަ ޕާރމަނަންޓް ކޯޓް އޮފް އާބިޓްރޭޝަނަށް ހުށަހަޅާފަ އެވެ.
އެމައްސަލަތަކުގެ ގެއްލުމުގެ ބަދަލުގެ ގޮތުގައި ދައުލަތުން ނޫމަޑިއަށް 55 މިލިއަން ޑޮލަރު (849،750،000ރ) ދައްކަން ޖެހުނެވެ. އެފައިސާ މިސަރުކާރުން ވަނީ ދައްކާފަ އެވެ.
އެއްބަސްވުން އުވާލި މައްސަލަތަކުގައި ނޫމަޑިން، އާބިޓްރޭޝަނަށް ހުށަހެޅީ 155 މިލިއަން ޑޮލަރު (2.3 ބިލިއަން ރުފިޔާ) ހޯދުމަށެވެ. ކޯޓުގައި މި މައްސަލަ ހިނގަމުން ދަނިކޮށް އެ ކުންފުންޏާ ވާހަކަ ދައްކައި ބަދަލު ދިނީ، ރައީސް އޮފީހުގައި އޮންނަ ސެޓްލްމެންޓް ކޮމިޓީން ނިންމައިގެންނެވެ.
