ސޫރިޔާގެ ތެޔޮވަޅުތައް ހިމާޔަތްކުރަން އެމެރިކާ ސިފައިންގެ އިތުރު ފައުޖުތަކެއް ފޮނުވަނީ!
25 އޮކްޓޯބަރު 2019 | ހުކުރު 08:31އައިސިސް ޖަމާއަތުގެ އަތްދަށަށް ސޫރިޔާގެ ތެޔޮވަޅުތައް ދުވަހަކުވެސް ދިޔަ ނުދޭނެ ޓްރަމްޕް ވިދާޅުވި
ސޫރިޔާ
ސޫރިޔާގެ ތެޔޮވަޅުތައް ހިމާޔަތްކުރަން އެމެރިކާ ސިފައިންގެ އިތުރު ފައުޖުތަކެއް އެ ސަރަހައްދަން ފޮނުވަން އެމެރިކާގެ ރައީސް ޑޮނަލްޑް ޓްރަމްޕް ނިންމައިފިއެވެ.
އެ ފައުޖުތައް ސޫރިޔާއަށް ފޮނުވުމަށްޓަކައި ކުރުދީން އިސްވެ އުފައްދާފައިވާ، ސީރިއަން ޑިމޮކްރެޓިކް ފޯސަސް (އެސްއޯއެފް) އާއި އެމެރިކާ ސަރުކާރުން ގުޅިގެންވަނީ މިކަމުގެ މަސައްކަތްތައް ފަށާފައެވެ.
މިކަން މިގޮތަށް ހުރުމުގެ ސަބަބުން އެންމެ ބޮޑު މަގްސަދަކީ ސޫރިޔާގައި ހުރި ޒަމާންވީ ތެޔޮވަޅުތައް އައިސިސް ޖަމާއަތްތަކުގެ އަތްދަށުން ސަލާމަތް ކުރުމަށް ކަމަށް ޕެންޓަގަން އިން ބުނެއެވެ.
އެމެރިކާގެ ރައީސް ޓްރަމްޕް މިދިޔަ ބުރާސްފަތި ދުވަހު މީސްމީޑިއާގައި ވިދާޅުވެފައިވަނީ އައިސިސް ޖަމާއަތުގެ އަތްދަށަށް ސޫރިޔާގެ ތެޔޮވަޅުތައް ދުވަހަކުވެސް ދިޔަ ނުދޭނެ ކަމަށެވެ.
ޔުނިވަރސިޓީ އޮފް އޮކްލަހޯމާގެ މެދުއިރުމަތީ ސަރަހައްދުގެ ސްޕެޝަލިސްޓެއް ކަމަށްވާ ޖޯޝުއާ ލޭންޑިސް އަލްޖަޒީރާއަށް ދެއްވި ބަސްދީގަތުމެއްގައި ބުނެފައިވަނީ ޓްރަމްޕްގެ ނިންމެވުމަކީ އެމެރިކާގެ ފޮރިން ޕޮލިސީއަށް އައި ލޮޅުމެއް ކަމަށެވެ.
އަދި އެއީ އެއްވެސް ހަމައެއް ލަމައެއް ނެތް ގޮތެއްގައި ޓްރަމްޕް ކުރިޔަށް ގެންދަވާ ކަމެއް ކަމަށާއި މިއީ އެއްވެސް ވަރަކަށް ގަބޫލުކުރެވޭ ކަމެއް ނޫން ކަމަށް ލޭންޑިސް ފާހަގަކޮށްފައިވެއެވެ.
