އިރުފާން ރުޝްދީ ހޯދާތާ 3 އަހަރު، މުއައްސަސާތަކަށް އެކަމެއް ނުވި: މަރު ކޮމިޝަން
އިރުފާން ރުޝްދީ ހޯދުމަށް އެންމެ ފުރަތަމަ އިއުލާނު ކުރެވުނީ 2016 ވަނަ އަހރުގެ ޖޫން މަހުގައި
ފާތިރުގެ މަރުގެ މައްސަލައިގައި ތުހުމަތު ކުރެވޭ އިރުފާން ރުޝްދީ
ތޫނު އެއްޗަކުން ހަމަލާދީ މ. ސަރުމާގެ، ފާތިރު މުހައްމަދު މަރާލި މައްސަލައިގައި ފުލުހުން ހޯދަން އިއުލާނުކުރި މ. ކުރިރުއްމަގު، އިރުފާން ރުޝްދީ ހޯދާތާ 3 އަހަރުވީއިރު މުއައްސަސާތަކަށް އަދިވެސް އޭނާ ހޯދިފައި ނުވާކަމަށް މަރާލައިފައިވާ މީހުންނާއި ގެއްލުވާލައިފައިވާ މީހުންގެ މަރުތައް ތަހުގީގުކުރާ ކޮމިޝަނުން ބުނެފިއެވެ.
އިރުފާނު ހޯދުމަށް ބުރާސްފަތި ދުވަހު އިއުލާންކޮށްފައިވާއިރު، ހުކުރު ދުވަހު އެކަމާއި ބެހޭ އިތުރު މައުލޫމާތު ހިއްސާކޮށް ކޮށްފައިވާ ޓުވީޓެއްގައި ބުނެފައިވަނީ، 3 އަހަރު ވެގެންދިޔައިރު މުއައްސަސާތަކަށް އިރުފާން ހޯދިފައި ނުވާކަމަށާއި މީގެކުރިން އިމިގްރޭޝަނުން، 2015 ވަނަ އަހަރު ފާތިރު ރާއްޖެއިން ބޭރަށް ދިޔަ ފަހުން އެނބުރި އައިސްފައި ނުވާކަމަށް ބުނެފައިވާކަމަށެވެ.
ނަމަވެސް 2016 ވަނަ އަހަރުގެ ޖޫން މަހު މަރުގެ ހާދިސާއެއްގައި އެ ސަރަހައްދުގައި ހަރަކާތްތެރިވަނިކޮށް ސީސީޓީވީ ކެމެރާ ފުޓޭޖުން ފެންނަކަމަށް މަރުގެ ކޮމިޝަނުން ވަނީ ބުނެފައެވެ. އަދި އެކަމުގައި އާންމުންގެ އެހީތެރިކަމަށް އަނެއްކާވެސް ރިޔާސި ކޮމިޝަނުން ވަނީ އެދިފައެވެ.
އުމުރުން 14 އަހަރުގެ ފާތިރު މަރާލާފައިވަނީ 2016 ވަނަ އަހަރުގެ ޖޫން މަހުގެ ތިން ވަނަ ދުވަހުގެ ރޭ 9:20 ހާއިރު އެވެ. ފުލުހުން މައުލޫމާތު ދީފައިވާ ގޮތުގައި ފާތިރު މަރާލާފައިވަނީ ގްރޫޕަކުން ސަރުމާގެ އަށް ވަދެ ތޫނު އެއްޗެހި ބޭނުންކޮށްގެން ދިން ހަމަލާއެއްގަ އެވެ. އެ ހަމަލާއާ ގުޅިގެން އައިޖީއެމް ހޮސްޕިޓަލަށް ފާތިރު ގެންދިޔަ އިރުވެސް އޭނާ މަރުވެފައިވާ ކަމަށް ފުލުހުން ބުނެފައިވެ އެވެ.
ފާތިރު މަރާލުމުގެ ކުރިން އެ ދުވަހުގެ ހަވީރު، މާލޭގައި އިތުރު ކުއްޖަކު ވެސް މަރާލާފައި ވެއެވެ. ފުލުހުން ބުނި ގޮތުގައި އެ ދުވަހުގެ ހަވީރު މަރާލި ކ. ކާށިދޫ ރަންފަރު، އުމުރުން 14 އަހަރުގެ އަހުމަދު އިރުޝާން ހިލްމީގެ މަރާ ފާތިރުގެ މަރާ ވަނީ ގުޅިފަ އެވެ. އެގޮތުން އިރުޝާން މަރާލުމުގެ ފާތިރު ބައިވެރިވެފައިވާ ކަމަށާއި ފާތިރު މަރާލާފައިވަނީ އެ މަރުގެ ބަދަލު ހިފުމުގެ ގޮތުން ކަމަށް ވެސް ފުލުހުން ބުނެފައިވެ އެވެ.
އިރުޝާންގެ މަރާލި މައްސަލައާ ގުޅިގެން މިދިޔަ އަހަރުގެ އޯގަސްޓް މަހު ދައުލަތުން ވަނީ ތިން ކުއްޖެއްގެ މައްޗަށް ގަސްތުގައި މީހަކު މެރުމުގެ ކުށުގެ ދައުވާކޮށްފަ އެވެ. ފާތިރުގެ މަރާ ގުޅިގެން އުމުރުން 21 އަހަރުގެ އިރުފާން ހޯދުމަށް ފުލުހުން އެންމެ ފުރަތަމަ އިއުލާނުކުރީ 2016 ވަނަ އަހަރުގެ ޖޫން މަހުގެ ތެރޭގަ އެވެ. ފުލުހުން ބުނީ އިރުފާން ހޯދުމަށް ކުރި މަސައްކަތުން މިހާތަނަށް އޭނާ ހޯދައިގަނެވޭ ގޮތް ވެފައިނުވާ ކަމަށެވެ.
މަރު ކޮމިޝަނުން މީހުން ހޯދަން އިއުލާން ކޮށްފައިވާއިރު، މިނިވަން ނޫހުގެ ނޫސްވެރިޔާ އަހުމަދު ރިލުވާނު މަރާލި މައްސަލާގައި ތުހުމަތު ކުރެވޭ މީހުން ދިރިއުޅޭ ގެތައް މަރު ކޮމިޝަނުގެ ބޭނުމަށް ފުލުހުން ވަނީ ފާސްކޮށްފައެވެ. އެގޮތުން ފުލުހުން ވަނީ 13 ތަނެއް ބަލާ ފާސްކޮށްފައެވެ.
އެ އޮޕަރޭޝަނަކީ ފުލުހުންގެ ކްރިމިނަލް އިންވެސްޓިގޭޝަން ކޮމާންޑާއި ފޮރެންސިކް ސަރވިސް ޑިޕާރޓްމެންޓް އަދި ޑިވިޒަނަލް ޕޮލިސިންގ ކޮމާންޑުން ކުރިއަށްގެންދިޔަ އޮޕަރޭޝަނެކެވެ.
