އާދީއްތަ 08 ޑިސެންބަރު 2019
12 ދޮށަ
1441 ރަބީޢުލްއާޚިރު 11
ފަތިސް 04:42
އިރުއަރާ 05:59
މެންދުރު 12:02
އަސްރު 15:22
މަޣްރިބް 17:56
އިޝާ 19:13
ކުޅިވަރު - މިލޮރަޑް ކިޔާޗް

ގައުމީ ފިރިހެން ވޮލީ ޓީމަށް ދުނިޔޭގެ ފެންވަރުގެ ކޯޗެއް ހަމަޖައްސައިފި

  • މިލޮރަޑް ކިޔާޗް ނަމަކަށް ކިޔާ މި ކޯޗު ވަނީ އިރާން އަދި ބަލްގޭރިއާއަށް އިރުޝާދު ދީފައި

ލީވާން އަލީ
MrLeevaan

ކ. މާލެ 11 އޮކްޓޯބަރ 2019 | ހުކުރު 02:23 2,629

މިލޮރަޑް ކިޔާޗް - ގޫގުލް

ގައުމީ ފިރިހެން ވޮލީ ޓީމުގެ ކޯޗަކަށް މީގެ ކުރިން އިރާން އަދި ބަލްގޭރިއާ ގައުމީ ޓީމަށް އިރުޝާދު ދިން ސާބިއާއަށް ނިސްބަތްވާ މިލޮރަޑް ކިޔާޗް ހަމަޖައްސައިފިއެވެ.

ގައުމީ ވޮލީ ޓީމުގެ ކޯޗަކަށް މިލޮރަޑް ހަމަޖެއްސިކަން އިއުލާންކުރެއްވީ ޔޫތު މިނިސްޓަރ އަހުމަދު މަހްލޫފް ކުރެއްވި ޓުވީޓަކުންނެވެ. މިނިސްޓަރ ވިދާޅުވީ، މިލޮރަޑަކީ ގިނަ ކާމިޔާބީތައް ހޯދާފައިވާ މޮޅު ކޯޗެއް ކަމަށެވެ.

އުމުރުން 70 އަހަރުގެ މިލޮރަޑް އޭނާގެ ކޯޗިން ކެރިޔަރު 1989 ވަނަ އަހަރު ފަށާފައިވާއިރު، އޭނާ ވަނީ ސާބިއާގެ އެކި ޓީމުތަކަށް ކޯޗުކޮށްދީފައެވެ. އަދި އޭނާ ވަނީ އެ ގައުމުގެ ޗެމްޕިއަންކަން 8 ފަހަރު ހޯދާފައެވެ.

ޔޫގޯސްލާވިއާގެ ޖޫނިއާ ޓީމަށް ކޯޗުކޮށްދީފައިވާ މިލޮރަޑް ވަނީ އެ ގައުމުގެ ސީނިއާ ޓީމާއެކު 1996 ވަނަ އަހަރު އޮތް ވޯލްޑް ކަޕްގެ ތިންވަނަ ހޯދާފައެވެ. އެއަށްފަހު އޭނާ ވަނީ ބަލްގޭރިއާ ކްލަބްތަކަށް ކޯޗުކޮށްދިނުމުގެ އިތުރުން 2002 ވަނަ އަހަރު އެ ގައުމުގެ ސީނިއާ ޓީމާ ހަވާލުވެފައެވެ.

ބަލްގޭރިއާއާއެކު ވޯލްޑް ލީގުގެ ފަސްވަނަ މިލޮރަޑް ހޯދިއެވެ. އޭނާ ދެން ހަވާލުވީ 2006 ވަނަ އަހަރު އިރާންގެ ކޯޗުކަމާއެވެ. އެއަށްފަހު އޭނާ ވަނީ ޔޫއޭއީގެ ބައެއް ކްލަބްތަކުގައިވެސް މަސައްކަތް ކޮށްފައެވެ.

މިލޮރަޑްއާއެކު ސާބިއާގެ ޓްރެއިނަރެއްވެސް ގައުމީ ވޮލީ ޓީމާއެކު މަސައްކަތް ކުރުމަށް ވަނީ ހަމަޖެހިފައެވެ. އޭނާ ވަނީ ސާބިއާގެ އެކި ވޮލީ ޑިވިޝަންތަކުގެ ކްލަބްތަކާއެކު މަސައްކަތް ކޮށްފައެވެ.

ގައުމީ ވޮލީ ޓީމުގެ ކޯޗަކަށް އެންމެ ފަހުން ހުރީ މުހައްމަދު ސާޖިދު (ކާއްޓޭ) އެވެ. އޭނާ ޓީމާ ހަވާލުވީ 2017 ވަނަ އަހަރުގެ ފަހުކޮޅެވެ. އޭނާގެ އިރުޝާދުގެ ދަށުން ރާއްޖެއިން ވަނީ މިދިޔަ އަހަރު ސެންޓްރަލް ޒޯން އާއި މިދިޔަ އަހަރުގެ އޭޝިއަން ގޭމްސް އާއި މި އަހަރު އޮތް އިންޑިއަން އޯޝަން އައިލޭންޑް ގޭމްސް (އައިއޯއައިޖީ) ގެ އިތުރުން މި އަހަރުގެ ސެންޓްރަލް ޒޯން މުބާރާތުގައި ވާދަކޮށްފައެވެ.

މިނިސްޓަރ މަހްލޫފް އަންނަނީ ވޮލީއަށް ގިނަ ކުރިއެރުންތަކެއް ހޯދައިދެއްވުމަށް މަސައްކަތް ކުރައްވަމުންނެވެ. އެގޮތުން މި އަހަރު އޮތް އައިއޯއައިޖީގެ ކުރިން ސާބިއާގައި ޓްރެއިނިން ކޭމްޕެއް ފުރިހަމަ ކުރުމަށް ފުރުސަތު ހޯދައިދީފައިވާއިރު، މިއީ ރާއްޖޭގެ ގައުމީ ޓީމެއް ޔޫރަޕްގައި ތަމްރީން ހެދި ފުރަތަމަ ފަހަރެވެ.

މީގެއިތުރުން ސެންޓްރަލް ޒޯން މުބާރާތުގެ ކުރިން ލަންކާއާ ދެކޮޅަށް ރާއްޖޭގައި ތިން މެޗު ކުޅުމަށްވެސް ފުރުސަތު ވަނީ ހޯދައިދެއްވާފައެވެ.

އެންމެ ފަހުން އަޕްޑޭޓް ކުރީ: 2 މަސް ކުރިން | ރިވިއު ކުރީ: ސިމާހާ ނަސީމް

މި ލިޔުން ކިޔާލުމުން

ޚަބަރެއް ނުވަތަ މައުލޫމާތެއް ރާއްޖެއެމްވީ އަށް ދެއްވުމަށް [email protected] އަށް އީމެއިލް ކުރައްވާ ނުވަތަ 3007773 ނަންބަރަށް ގުޅުއްވާ.

އެންމެ ފަހުގެ
ކޮމެންޓް