14 އަހަރުން ދަށުގެ މުބާރާތުގެ ޗެމްޕިއަންކަން މާޒިޔާއަށް
8 އޮކްޓޯބަރު 2019 | އަންގާރަ 13:29ފައިނަލް މެޗު މާޒިޔާއިން ކާމިޔާބުކުރީ 2-0 ގެ ނަތީޖާ އަކުން
މާޒިޔާ ފުޓުބޯޅަ އެކަޑަމީގެ ކުޅުންތެރިން
ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމުކޮށް ގެން ބާއްވާ ދިރާގު ޔޫތް ލީގުގެ ޗެމްޕިއަންކަން މާޒިޔާ ފުޓުބޯޅަ އެކަޑަމީން ކާމިޔާބުކޮށްފިއެވެ.
އެފްއޭއެމްއިން މިދިޔަ އަހަރު ތަޢާރަފުކުރި ޔޫތް ލީގުގައި މިދިޔަ އަހަރު ބާއްވައިފައިވަނީ 13 އަހަރުންދަށުގެ ކުޅުން އެކަންޏެވެ. ނަމަވެސް މިއަހަރު މި މުބާރާތުގައި ވަނީ 12 އަހަރުންދަށުގެ އިތުރުން 14 އަހަރުންދަށުގެ މުބާރާތް ބޭއްވިއެވެ.
14 އަހަރުންދަށުގެ މުބާރާތުގެ ޗެމްޕިއަންކަން މާޒިޔާއިން ހޯދީ ފައިނަލުގައި ހުޅުމާލޭ ސްޕޯޓްސް ސްކޫލް 2-0 ގެ ނަތީޖާ އަކުން ބަލިކުރުމަށްފަހުއެވެ.
މިއަހަރުގެ 14 އަހަރުންދަށުގެ މުބާރާތުގެ ޗެމްޕިއަންކަން މާޒިޔާއިން ހޯދިއިރު މާޒިޔާގެ 14 އަހަރުން ދަށުގެ ޓީމުވަނީ އިންޑިއާގައި އޮތް އިންޓަރނޭޝަނަލް ކަޕް އޮފް ޖޯއީގެ ޗެމްޕިއަންކަން ވެސް ހޯދައިފައެވެ.
މި އަހަރުގެ ޔޫތް ލީގުގައި 11 އެކަޑަމީ އިން ވާދަ ކުރިއެވެ. އެއީ ބޯޖީ ސްޕޯޓްސް އެކަޑަމީ، ހުޅުމާލޭ ސްޕޯޓްސް ސްކޫލް، ހުޅުމާލޭ ސްޕޯޓްސް އެކަޑެމީ، މާޒިޔާ ފުޓުބޯޅަ އެކަޑެމީ، އީގަލްސް ފުޓުބޯޅަ އެކަޑަމީ، ޓީސީ ފުޓުބޯޅަ އެކަޑަމީ، މޯލްޑިވްސް ސޮކާ މޭޓްސް، އެމްއެސް ހެލްޕިން ހޭންޑް ސްޕޯޓްސް އެކަޑެމީ، އާލީ ޓަޗް ފުޓުބޯޅަ އެކަޑެމީ ވިކްޓްރީ ސްޕޯޓްސް ކުލަބް އެކަޑަމީ އަދި ހުޅުމާލޭ ޔޫތް އެންޑް ސްޕޯޓްސް އެކަޑެމީއެވެ.
ނިމިދިޔަ އަހަރުގެ ޔޫތް ލީގު ކާމިޔާބުކޮށްފައިވަނީ އާލީ ޓަޗް ފުޓުބޯލް އެކަޑަމީއެވެ.
