އޭގެ ތެރެއިން 2.1 ބިލިއަން ރުފިޔާގެ އިންޓްރެސްޓް ޕޭމެންޓްސް ގޮތުގައި ދައްކާނެ ކަމަށް
ފިނޭންސް މިނިސްޓަރ އިބްރާހިމް އަމީރު
ދަރަނި ދެއްކުމަށް (ޑެޓް ސަރވިސިންގ އަށް) ގާތްގަނޑަކަށް 4 ބިލިއަން ރުފިޔާ މިއަހަރު ހޭދަވާނެ ކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.
އަމީރު މިހެން ވިދާޅުވީ އަންގާރަ ދުވަހު މަޖީލީހަށް ހާޒިރުވެ، ހުޅުދޫ ދާއިރާގެ މެމްބަރު އިލްޔާސް ލަބީބް ކުރެއްވި ސުވާލަކަށް ޖަވާބު ދެއްވަމުންނެވެ. އިލްޔާސް ކުރެއްވި ސުވާލަކީ ރާއްޖެއިން ނަގާފައިވާ ލޯނުގެ ތެރެއިން 80 އިންސައްތަ ދަރަނީގެ ގޮތުގައި ދައްކަމުން ދަނީ އެންމެ ގައުމަކަށް ކަމަށާއި، އަހަރެއްގެ މައްޗަށް ކިހާވަރެއް ދައްކާތޯއެވެ.
މެމްބަރުގެ ސުވާލަށް ޖަވާބުދެއްވަމުން މިނިސްޓަރ ވިދާޅުވީ ޑެޓް ސާރވިސިންގްގައި އިންޓްރެސްޓް ޕޭމަންޓްސް އާއި ޕްރިންސިޕަލް ޕޭމަންޓްސް އަށް ދައްކާނެ އަދަދު ބަޖެޓުގައި ހިމަނާފައިވާނެ ކަމަށެވެ. އެގޮތުން ޑެޓް ސާރވިސިންގް އަށް ގާތްގަނޑަކަށް 4 ބިލިއަން ރުފިޔާ ދާނެ ކަމަށެވެ. އޭގެ ތެރެއިން 2.1 ބިލިއަން ރުފިޔާގެ އިންޓްރެސްޓް ޕޭމެންޓްސް ގޮތުގައި ދައްކާ، 2.1 ބިލިއަން ރުފިޔާ ޕްރިންސިޕަލް ޕޭމަންޓްސްގެ ގޮތުގައި ދައްކާނެ ކަމަށެވެ.
މި 80 އިންސައްތަ އެކްސްޓަރނަލް ދަރަނީގެ ތެރޭގައި ހިމެނޭ ހުޅުމާލޭގައި އަޅާ 7000 ހައުސިންގް ޔުނިޓާއި ގުޅިގެން މެމްބަރު ކުރި އިތުރު ސުވާލަކަށް ޖަވާބުދެއްވަމުން މިނިސްޓަރ ވިދާޅުވީ އެ މަޝްރޫއުއަކީ އިންފްލޭޓެޑް އަދަދަކަށް ދެވިފައިވާ މަސައްކަތެއް ކަމަށެވެ.
ސަރުކާރާއި ހަވާލުވީއިރު އެ 7000 ހައުސިންގް ޔުނިޓްސްގެ މަސައްކަތްތަށް ވަރަށް ބޮޑުތަން ނިމިފައިވާ ކަމަށެވެ. އަދި އިތުރަކަށް އެ މަސައްކަތް ހަވާލުކޮށްގެން ކުރަމުން ނުދާކަމަށެވެ. މިނިސްޓަރ ވިދާޅުވީ 7000 ހައުސިންގް ޔުނިޓްސްގެ މަޝްރޫއުއަކީ އިންފްލޭޓެޑް އަދަދަކަށް ދެވިފައިވާ މަސައްކަތެއް ކަމަށް ގަބޫލު ކުރައްވާ ކަަމަށާއި، ދަރަނި މެނޭޖް ކުރުމަށް މަސައްކަތްތަކެއް ކުރެވެމުންދާ ކަމަށެވެ. އެގޮތުން 2020 ވަނަ އަހަރަށް ބަޖެޓު ހުށެހެޅޭއިރު މުޅި ޖުމްލަ ޑެޓް ސްޓޮކް މަދު ކުރުމަށް ރާވާފައިވާ ކަންތައްތަކުގެ ތަފްސީލް ހާމަ ކުރައްވާނެ ކަމަށް މިނިސްޓަރ އަމީރު ވިދާޅުވިއެވެ. މިނިސްޓަރ ވިދާޅުވީ މިހާތަނަށް ޑައިރެކްޓް ކޮށް އޭގެ އަގު ދަށް ކުރުމަށް މަޝްވަރާ ކުރެވިފައި ނުވާ ކަމަށެވެ.
