އެހެން ގައުމުތަކުގެ ކަނޑުގެ ސަރަހައްދުގަ ހުއްދަ ނެތި މަަސްވެރިކަން ކުރާނަމަ، އެކަމުގެ ނޭދެވޭ އަސަރު މުޅި ރާއްޖޭގެ މަސްވެރިކަމަށް ކުރާނެ : ފިޝަރީޒް

އެހެން ޤައުމެއްގެ ކަނޑުގެ ސަރަޙައްދުން އެގައުމެއްގެ ހުއްދަނެތި މަސްވެރިކަންކުރުމަކީ މުޅި ދިވެހިރާއްޖޭގެ މަސްވެރިކަމަށް އެކަމުން ބޮޑު އަސަރެއް ކޮށްފާނެކަމެއް ކަމަށާއި، މިފަދަ އުޅަނދު ބްލެކް ލިސްޓު ކުރުމުގެ ފުރުޞަތު އެބައޮތް ކަމަށް ފިޝަރީޒް މިނިސްޓްރީން ބުނެފިއެވެ.

މިނިސްޓްރީން މިހެން ބުނެފައިވަނީ އަވައްޓެރި ޤައުމެއްގެ ކަނޑުގެ ސަރަޙައްދުގައި ދިވެހި މަސްވެރި އުޅަނދުފަހަރު ޙަރަކާތްތެރިވުމަކީ ޤާނޫނާއި، ގަވާއިދާ ޚިލާފު އަމަލެއްކަން ބަޔާކޮށް، އެކަމަށް ސަމާލުވުމަށް އިލްތިމާސްކޮށް ޢާއްމު ކުރި ބަޔާނެއްގައެވެ. މިނިސްޓްރީން ޢާއްމުކުރި ބަޔާނުގައި ވަނީ އެހެން ޤައުމެއްގެ ކަނޑުގެ ސަރަޙައްދުން އެގައުމެއްގެ ހުއްދަނެތި މަސްވެރިކަންކުރާ އުޅަނދުފަހަރު އިންޑިއަން އޯޝަންގެ ކަނޑުމަހުގެ މަސްވެރިކަން ބެލެހެއްޓުމުގެ ޒިންމާ މަތިކޮށްފައިވާ، އިންޑިއަން އޯޝަން ޓޫނާ ކޮމިޝަން (އައި.އޯ.ޓީ.ސީ)ގެ ފަރާތުން ބެލެކް ލިސްޓުކުރުމުގެ ފުރުޞަތު އޮތް ކަމަށެވެ. މިހާތަނަށް ރާއްޖޭގެ މަސްވެރި އުޅަނދެއް މިލިސްޓުގައި ހިމެނިފައިނުވާކަން ފާހަގަކޮށް، ދިވެހިރާއްޖޭގެ މަސްވެރިކަމާއިމެދު މަސް ގަންނަ ފަރާތްތަކުގެ މެދުގައި އޮތް ތަސައްވުރު މިފަދަ އަމަލެއްގެ ސަބަބުން ބަދަލުވެގެން ގޮސް މުޅި ދިވެހިރާއްޖޭގެ މަސްވެރިކަމަށް މިކަމުގެ ނޭދެވޭ އަސަރުކުރުމުގެ ފުރުޞަތު އޮތްކަން މިނިސްޓްރީގެ ބަޔާނުގައި ފާހަގަކޮށްފައިވެއެވެ. އަދި މިފަދަ ގޮތަކަށް މަސްވެރިކަންކުރަނިކޮށް ހިފެހައްޓާ އުޅަނދުފަހަރާމެދު މަސްވެރިކަންކުރުމުގެ ޤާނޫނުގެ ދަށުން ފިޔަވަޅު އަޅާނެ ކަމަށް މިނިސްޓްރީން ބުނެއެވެ.

މިނިސްޓްރީން އިތުރަށް ސަމާލުވުމަށް ގޮވާލާފައި މިވަނީ، ރާއްޖޭގެ މަސްވެރި އުޅަނދެއް އިންޑިއާ ކަނޑުގެ ސަރަޙައްދުގެ ތެރެއިން މަލިކާއި ގާތްގަނޑަކަށް 3 މޭލު ކައިރިން ހިފަހައްޓާފައިވާކަމުގެ މަޢުލޫމާތު ސޯޝަލް މީޑިއާގައި ދައުރުވަމުންދަނިކޮށެވެ. މިއަމަލު މިނިސްޓްރީން ސިފަކޮށްފައިވަނީ ރާއްޖޭގައި މަސްވެރިކަމުގެ ޤާނޫނާއި ގަވާއިދުތަކާއި ހިލާފު ޙާރަކާތެއްގެ ގޮތުގައެވެ. އަދި ޤާނޫނާއި ގަވާޢިދާ ޚިލާފަށް ބެލެހެއްޓުމެއްނެތި ކުރާ މަސްވެރިކަން ހުއްޓުވުމަކީ ދިވެހިރާއްޖޭގެ މައްޗަށް ބައިނަލްއަޤްވާމީ ޤަނޫނުތަކުން ލާޒިމުކުރާ ކަމެއްކަމުގައިވެސް ފިޝަރީޒް މިނިސްޓްރީން ފާހަގަކުރެއެވެ.

އަދި މީގެ އިތުރުން، ދިވެހިރާއްޖެއިން ފިނިކުރި އަދި ރޯމަހުގެ ގޮތުގައި އެކްސްޕޯޓްކުރާ ހުރިހާ ކަނޑުމަހަކާއިއެކު މިނިސްޓްރީގެ ފަރާތުން ދޫކުރާ [ކެޗް ސެޓިފިކެޓް]އެއް ދޫކުރަމުންދަކަމަށާއި، މިސެޓިފިކެޓަކީ ޔޫރަޕަށް މަސް އެތެރުކުރުމުގައި ޔޫރަޕިއަން ކޮމިޝަންގެ ގަވާޢިދުތަކުގެ ދަށުން މިހާރު ލާޒިމުކުރާ ކަމެއްކަމުގައި މިނިސްޓްރީން ފާހަގަކުރެއެވެ. މިސެޓިފިކެޓަކީ، ދިވެހިރާއްޖެއިން އެކްސްޕޯޓްކުރާ މަހަކީ ޤާނޫނާއި ގަވާއިދާ އެއްގޮތަށް ބެލެހެއްޓިގެންކުރާ މަސްވެރިކަމަކުން ބާނާ މަސް ކަމުގައި ސެޓިފައިކޮށް ދިވެހި ދަޢުލަތުގެ ފަރާތުން ދޫކުރަންޖެހޭ ލިއުމަކަށް ވީހިނދު، ދިވެހިރާއްޖޭގެ ކަނޑުގެ ސަރަޙައްދުން ބާނާފައިވާ މަސް ފިޔަވައި އެހެން މަހަށް މިފަދަ ސެޓިފިކެޓް ދޫނުކުރާނެކަމަށް މިނިސްޓްރީން ބުނެއެވެ.

ދިވެހިރާއްޖޭގެ އުތުރުގައި މަސްވެރިކަންކުރުމުގައި ރާއްޖޭގެ ސަރަޙައްދު ތެރޭގައި ޙަރަކާތްތެރިވުމަށް ޚާއްސަ ސަމާލުކަމެއް ދިނުމަށް މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރގ އިން ވަނީ އިލްތިމާސްކޮށްފައެވެ.