ރާއްޖޭގައި އެންމެ ގިނަ ވަޒީފާގެ ފުރުސަތުތައް އޮތީ ފަތުރުވެރިކަމުގެ ސިނާއަތުގައި ކަމަށާއި، މިއަހަރު އެކަނި ވެސް 10،000 އަށްވުރެ ގިނަ ވަޒީފާ އުފެއްދިފައިވާ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ދުނިޔޭގެ ފަތުރުވެރިކަމުގެ ދުވަސް 2019 ގާލާ ނައިޓް އިފްތިތާހްކޮށްދެއްވާ ރައީސް ސޯލިހު ވިދާޅުވީ އެންމެ ގިނަ ވަޒީފާގެ ފުރުސަތު އޮތީ މިސިނާއަތުގައި ކަމަށެވެ.
ދުނިޔޭގެ ފަތުރުވެރިކަމުގެ ޖަމިއްޔާއިން މިއަހަރު ކަނޑައަޅާފައިވާ ޝިއާރު ''ޓޫރިޒަމް އެންޑް ޖޮބްސް އަ ބެޓަރ ފިއުޗަރ ވޯލްޑް'' އަލިއަޅުއްވާލައްވާ ރައީސް ސޯލިހު ވިދާޅުވީ މިޝިއާރުން ވެސް ވަޒީފާގެ ގިނަ ފުރުސަތުތައް އޮތްކަން ޔަގީންވާ ކަމަށާއި، ފަތުރުވެރިކަމުގެ މަންފާ ލިބޭނެ ގޮތަށް ކަންކަން ރޭވުން ވަރަށް މުހިންމު ކަމަށެވެ. އަދި ރާއްޖޭގެ ފަތުރުވެރިކަމުން އާންމު ދިރިއުޅުމާއި ފަރުދީ ފުދުންތެރިކަމާ ގުޅިފައިވާ މިންވަރު މިޝިއާރުން ހާމަކޮށްދޭ ކަމަށް އެމަނިކުފާނު ވިދާޅުވިއެވެ.
ރައީސް ސޯލިހު ވިދާޅުވީ ރިސޯޓުތަކުގެ މަތީ މަގާމުތަކުން ދިވެހިންނަށް ފުރުސަތު ލިބުމަކީ މިސިނާއަތުގެ ކުރިއެރުވުމަށް ލިބޭ ވަރަށް ބޮޑު ބާރެއް ކަމަށާއި، ރިސޯޓުތަކުގެ ވަރަށް ޒިންމާދާރު މަގާމުތަކުގައި މިހާރު ވެސް ދިވެހިން އެބަތިބި ކަމަށެވެ. އަދި މިނިސްބަތް އިތުރުކުރަންޖެހޭ ކަމަށް ރައީސް ސޯލިހު ވިދާޅުވިއެވެ.
ރާއްޖޭގައި ދުނިޔޭގައި ނަން މަޝްހޫރު ހުރިހާ ހޮޓެލް ޗެއިންއެއްގެ ރިސޯޓުތައް ހުޅުވިފައިވާކަން ފާހަގަކުރައްވައި ރައީސް ސޯލިހު ވިދާޅުވީ މިސިނާއަތް ތަރައްގީކޮށް ކުރިއަށް ގެންދެވޭނީ ދިވެހިންނަށް ކަމަށެވެ. ރައީސް ސޯލިހު ވިދާޅުވީ ދިވެހިން މިދާއިރާގައި މަސައްކަތް ކުރަނީ ހަމައެކަނި ވަޒީފާއެއް އަދާކުރުމުގެ ގޮތުގައި ނޫން ކަމަށާއި، އަމިއްލަ ކަމެއްގެ ގޮތުގައި ދެކިގެން މިދާއިރާ ކުރިއެރުވުމަށް މަސައްކަތްކުރާ ކަމަށެވެ.
މިއަހަރުގެ މިހާތަނަށް ބަލާއިރު ފަތުރުވެރިކަން ކުރިއަރަމުން އަންނަނީ އަންދާޒާ ކޮށްފައިވާ ހަލުހި ދުވެއްޔެއްގައި. އޭގެ އެންމެ ބޮޑު ސަބަބަކީ ސިޔާސީ ގޮތުން ރާއްޖެއަށް ލިބުނު ހަމަޖެހުން. ރާއްޖެއަށް ލިބުނު ހަމަޖެހުމާ ގުޅިގެން ދިވެހި ފަތުރުވެރިކަމާ މެދު އިންވެސްޓަރުންނަށް ލިބުނު އިތުބާރާ ޔަގީންކަން. މިދެންނެވި ބަދަލުތަކާއެކު ރާއްޖޭގައި އިތުރު އެތައް ރިސޯޓެއް ހުޅުވިއްޖެ. ކިތަންމެ ރަށެއްގައި ގެސްޓް ހައުސްތައް އިތުރުވެއްޖެ.އިބްރާހިމް މުހައްމަދު ސޯލިހް / ރައީސުލްޖުމްހޫރިއްޔާ
ރައީސް ސޯލިހު ވިދާޅުވީ މިއަހަރުގެ މިހާތަނަށް 19 ރިސޯޓާއި އެއްޔޮޓް މެރީނާ މިހާރު ހުޅުވިފައިވާ ކަމަށެވެ. އެއީ އެނދުގެ ގޮތުން ބަލާނަމަ 4127 އެނދު ކަމަށާއި، ވަޒީފާގެ ގޮތުން ބަލާނަމަ މިއީ 10،000 އަށްވުރެ ގިނަ ވަޒީފާ ކަމަށެވެ.
ރައީސް ސޯލިހު ވިދާޅުވީ ފަތުރުވެރިކަމުގެ ދާއިރާގެ ވަޒީފާގެ ފުރުސަތުތައް އިތުރުވަމުން އަންނައިރު ދިވެހި ޒުވާނުން އުފައްދަން ޖެހޭ ކަމަށެވެ.
އާދައިގެ ވަޒީފާތަކަށް މީހުން ނެގުމާއި މިހާރު ގެންގުޅޭ އާންމު އުސޫލަކީ ކައިރި ރަށަކުން ޒުވާނަކަށް ވަޒީފާ ދިފަ ރިސޯޓަށް ގެނައުން. ދެން އެވަޒީފާގައި މަސައްކަތް ކުރުމުން އެމީހަކު އަމިއްލައަށް ތަމްރީން ލިބިގަތުން. އަޅުގަނޑު ހިތުން މިއީ މިކަން އޮންނަންވާނެ އެންމެ ރަނގަޅު ގޮތެއް ނޫން. ވަޒީފާގައި މީހުން ހަރުނުލުމަކީ ވެސް މިކަމާ ވަރަށް ބޮޑަށް ގުޅިފައިވާ ކަމެއް. ކިތަންމެ އާދައިގެ ވަޒީފާތަކެއް ވިޔަސް އެކަމާ ގުޅޭ ތަމްރީނާއި ތައުލީމާ އެކުގައި މީހުން ބިނާ ކުރުމަށް ވާޒީފާގައި ދެމިތިބޭ ނިސްބަތް އިތުރުކުރެވޭނެ.އިބްރާހިމް މުހައްމަދު ސޯލިހް / ރައީސުލްޖުމްހޫރިއްޔާ
ރައީސް ސޯލިހު ވިދާޅުވީ ފަތުރުވެރިކަމުގެ ސިނާއަތުގެ ވަޒީފާތަކުގައި ބިދޭސީން ތިބޭތިބުން ބަދަލުކޮށް އެފުރުސަތުތައް ދިވެހިންނަށް ހޯދައިދޭނެ ކަމަށެވެ. މިކަން ބަދަލުކުރުމަކީ ސަރުކާރުގެ ވަރަށް މުހިންމު ސިޔާސަތެއްކަން އެމަނިކުފާނު ފާހަގަކުރެއްވިއެވެ.
