މާލޭގައި މީހުން ދިރިއުޅޭ ސަރަހައްދުތަކުގައި ގިނަ އަދަދެއްގެ ކެމިކަލް ގުދަންތައް އެބަހުރި ކަމަށާއި އެތަންތަން ތިލަފުށި ފަދަ ސިނާއީ ސަރަހައްދުތަކަށް ބަދަލުކުރުމުގެ މަސައްކަތް ވީ އެންމެ އަވަހަކަށް ކުރާނެ ކަމަށް ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެއެވެ.
އަލިފާނުގެ ހާދިސާއާ ގުޅޭގޮތުން އެންމެ ފަހުގެ މާއުލޫމާތު ދިނުމަށް އެމްއެންޑީއެފްގެ ހެޑް ކުއާޓަރު، ބަނޑޭރި ކޮށީގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު މާރިޔާ ވިދާޅުވީ އަލިފާނުގެ ހާދިސާގައި ކަމާ ބެހޭ އެންމެހައި ފަރާތްތަކުން އެންމެ ޚާއްސަ އިސްކަމެއްދީގެން މަސައްކަތް ކުރީ މީހުން ސަލާމަތް ކުރުމަށް ކަމަށާއި، އިމާރާތްތަކުން މީހުން ނެރުމުގެ މަސައްކަތް ފަޔަރމަނުން ކުރީ ފުރާނަ އަތްމައްޗަށް ލައިގެން ކަމަށެވެ.
ހާދިސާ ރިޕޯޓްކުރިތާ 7 މިނެޓްތެރޭ ވެހިކަލްތައް ފޮނުވައިގެން އެހީ ދޭން ފެށިކަން ފާހަގަކުރައްވައި މިނިސްޓަރު ވިދާޅުވީ އެމްއެންޑީއެފާއި، އެމްއޭސީއެލްގެ 12 އަށްވުރެ ގިނަ ވެހިކަލް ބޭނުންކުރިއިރު 150 އަށްވުރެ ގިނަ ސިފައިން ބައިވެރިވިކަމަށެވެ.
މިނިސްޓަރު މާރިޔާ ވިދާޅުވީ ގަވައިދާ ޚިލާފަށް ތަކެތި ބަހައްޓާފައި ހުރި ގިނަ ގުދަންތައް މާލޭގައި އެބަހުރި ކަމަށާއި، ހުއްދަ ދެވެނީ ބްލީޗާއި، ދަވާދާއި ދަނޑުވެރިކަން ކުރާ ސާމާނު ފަދަ ތަކެތި ގުދަން ކުރަން ނަމަވެސް ނުރައްކާތެރި ތަކެތި ބަހައްޓާފައިވާ ކަމަށެވެ.އަދި އެތަންތަން ހުސްކުމަށްޓަކައި މަޝްވަރާތައް ކުރަމުން އަންނަ ކަމަށެވެ.
15 ޖެނުއަރީ 2019ގައި މާލޭގެ ތެރޭގައި ހުރި ގުދަންތައް އަލުން ބައްލަ ޗެކްކުރި. ރިޕޯޓެއް ހައްދަވާފައި ވަނީ ވެސް. 126 ގުދަން ޗެކްކުރި. 82 ގުދަން ހުރީ މީހުން ދިރިއުޅޭ ސަރައްހައްދުގައި. ރަނގަޅު ކުރަންޖެހޭ ކަންކަން ރަނގަޅުކުރުމަށް އިރުޝާދު ދެމުން އައީ.މިނިސްޓަރު މާރިޔާ ވިދާޅުވި
މިނިސްޓަރު މާރިޔާ ވިދާޅުވީ އެފަދަ ގުދަންތައް ތިލަފުށި ފަދަ ސިނާއީ ސަރަހައްދުތަކަށް ބަދަލުކުރުމަށް މަޝްވަރާ ކުރަމުން އަންނަ ކަމަށެވެ.
