ފިއްލެވި މައްސަލައިގައި ގާނޫނު ހިންގުމަށް ހުރަސް އެޅުމުގެ ދައުވާ އަދީބަށް ކޮށް ޝަރީއަތް ފަށަނީ

ޕާސްޕޯޓް ހިފަހައްޓާފައިވަނިކޮށް ޓަގުބޯޓެއްގައި މިދިޔަ ޖުލައި މަހުގެ ތެރޭގައި ރާއްޖެއިން ބޭރަށް ވަޑައިގެންނެވި މައްސަލައިގައި ކުރީގެ ނައިބު ރައީސް އަހުމަދު އަދީބަށް ގާނޫނު ހިންގުމަށް ހުރަސް އެޅުމުގެ ދައުވާ އުފުލުމަށްފަހު ޝަރީއަތް ފެށުމަށް ކްރިމިނަލް ކޯޓުގައި ތާވަލު ކޮށްފިއެވެ.

އެ މައްސަލައިގެ ޝަރީއަތް ތާވަލު ކޮށްފައިވަނީ އަންގާރަ ދުވަހުގެ 11:30 އަށެވެ.

އަދީބު ފިއްލެވުމުން އިންޑިއާގެ ކަމާބެހޭ ފަރާތްތަކުން ވަނީ ރާއްޖެ އަނބުރާ ފޮނުވާލާފައެވެ. ދިވެހި ފުލުހުންގެ އެހީތެރިކަމާއެކު އަދީބު ހިފަހައްޓައިގެން ރާއްޖެ ގެނެސްފައިވަނީ އޮގަސްޓް މަހުގެ 4 ވަނަ ދުވަހުއެވެ.

ޅ. މާބިންހުރާ ކުއްޔަށް ދީގެން ދައުލަތަށް ލިބެންޖެހޭ ފައިސާއަށް ޚިޔާނާތްތެރިވި މައްސަލަ އަދީބުގެ މައްޗަށް ސާބިތުނުވާ ކަމަށް ހުކުމްކުރުމާއި ގުޅިގެން ދައުލަތުން އެ މައްސަލަ ސުޕްރީމް ކޯޓުގައި އިސްތިއުނާފް ކުރިއެވެ. އެ މައްސަލާގައި އަދީބު މުޖުތަމައަށް ދޫވެފައި ހުރެއްޖެނަމަ މުޖުތަމައަށް ނުރައްކާ ވެދާނެތީ އާއި ފިއްލަވާފާނެތީ އަދި އެކަން ކަށަވަރު ވެފައިވާތީ ޝަރީއަތް ނިމެންދެން އަދީބު ހައްޔަރު ކޮށްފައި ބެހެއްޓުމަށް ދައުލަތުން އެދުމުން ސުޕްރީމް ކޯޓުން ވަނީ ޝަރީއަތް ނިމެންދެން އަދީބު ބަންދުގައި ބެހެއްޓުމަށް އަމުރު ނެރެފައެވެ.

އޮގަސްޓް 8 ވަނަ ދުވަހު ސުޕްރީމް ކޯޓުން ނެރުނު އެ އަމުރާއި އެކު އޭނާ ހުންނެވީ އަދިވެސް ބަންދުގައެވެ. ޖަލު ބަންދުގައި ހުންނެވުމަށްފަހު އަދީބު ގެއަށް ބަދަލު ކޮށްފައިވަނީ ޑޮކްޓަރުންގެ ލަފާގެ މަތިން ބަލި ހާލަތަށް ބެލުމަށް ފަހު ކަމަށް ކަރެކްޝަނުން ވަނީ ބުނެފައެވެ. އަދީބު ގޭބަންދަށް ބަދަލުކޮށްފައި ވަނީ މިދިޔަ މަހުގެ 28 ގައެވެ.