ޝިމާ ގެއްލުނު މައްސަލަ މަރު ކޮމިޝަނުގެ މެންޑޭޓުގައި ނުހިމެނޭ: ސުއޫދު
13 ސެޕްޓެމްބަރު 2019 | ހުކުރު 16:26ޝިމާ ގެއްލުނީ ގެއްލިފައިވަނީ މިއަހަރުގެ ފެބްރުއަރީ 22 ގައި
އައިމިނަތު ޝިމާ
ޑިންގީއެއް ބަންޑުން ޖަހާލައިގެން ގެއްލިގެން ހޯދަމުން އަންނަ އައިމިނަތު ޝިމާގެ މައްސަލަ މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބަލާ ކޮމިޝަންގެ މެންޑޭޓުގައި ނުހިމެނޭ ކަމަށް އެކޮމިޝަންގެ ރައީސް ހުސްނުއް ސުއޫދު ވިދާޅުވެއްޖެއެވެ.
ޝިމާ ގެއްލުނު މައްސަލަ މަރު ކޮމިޝަނުން ބަލާނެ ކަމަށް އުއްމީދު ކުރާކަމަށް ބުނެ މީހަކު ކޮށްފައިވާ ޓްވީޓަކަށް ޖަވާބު ދެއްވަމުން ސުއޫދު ވިދާޅުވީ ޝިމާގެ މައްސަލައަކީ އެކޮމިޝަންގެ މެންޑޭޓުގައި ހިމެނޭ ކަމެއް ނޫންކަމަށެވެ.
ރައީސް އިބްރާހިމް މުހައްމަދު ސޯލިހުގެ ޚާއްސަ ގަރާރަކުން އުފައްދަވާފައިވާ އެ ކޮމިޝަނުގެ މެންޑޭޓުގައި ހިމެނެނީ 1 ޖެނުއަރީ 2012 އިން ފެށިގެން 17 ނޮވެމްބަރ 2018 ގެ މުއްދަތުގެ ތެރޭގައި ހިމެނޭ މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބަލައި އެކަމުގެ ހަގީގަތް ހޯދުމެވެ.
ޝިމާގެ މައްސަލަ މަރު ކޮމިޝަންގެ މެންޑޭޓުގެ ތެރޭގައި ނުހިމެނުނީ އޭނާ ގެއްލިފައިވަނީ މިއަހަރުގެ ފެބްރުއަރީ މަހުގެ ތެރޭގައި ވުމުންނެވެ.
ޝިމާ ގެއްލުނީ ލ.ކައްދޫއިން ފުރައިގެން އެ އަތޮޅު މާމެންދޫއަށް ޑިންގީ އެއްގައި ދަތުކުރަމުން ދަނިކޮށް ޑިންގީ ބަންޑުން ޖަހާލައިގެން ކަމަށް އެ ޑިންގީގައި އޭނާއާއި އެކު ދަތުރު ކުރި އިބްރާހީމް ފަޒީލު ބުނެފައި ވެއެވެ.
